سری نگر، ضلع کپواڑہ کے کنڈی خاص علاقے میں محکمہ جنگلات کی جانب سے جمعہ کو چلائی گئی انسدادِ تجاوزات مہم اس وقت احتجاج کا سبب بن گئی جب ایم ایل اے شیخ خورشید احمد موقع پر پہنچ گئے اور انہدامی و بے دخلی کارروائی کی مخالفت کرتے ہوئے الزام لگایا کہ تجاوزات ہٹانے کے نام پر ایک مخصوص برادری کو نشانہ بنایا جا رہا ہے۔

عوامی اتحاد پارٹی کے جاری کردہ بیان کے مطابق، مقامی افراد نے ایم ایل اے لنگیٹ شیخ خورشید کو اس مہم کے بارے میں اطلاع دی، جس کے بعد وہ اپنے والد کے حالیہ انتقال کے باعث گھر پر جاری تعزیتی اجتماع چھوڑ کر فوری طور پر کنڈی خاص روانہ ہو گئے۔ موقع پر پہنچ کر شیخ خورشید نے انہدامی کارروائی کی سخت مخالفت کی اور حکام کو بے دخلی مہم آگے بڑھانے کی اجازت نہیں دی۔

بیان میں کہا گیا کہ انہوں نے الزام لگایا کہ نام نہاد انسدادِ تجاوزات مہم کو ایک مخصوص برادری سے تعلق رکھنے والے غریب اور کمزور خاندانوں کو ہراساں کرنے اور بے دخل کرنے کے لیے استعمال کیا جا رہا ہے۔

شیخ خورشید نے کہا کہ متاثرہ خاندان اصل میں کمکڑی لشدت کے مہاجر ہیں، جو کئی دہائیاں قبل سرحد پار گولہ باری کے باعث بے گھر ہوئے تھے۔ ان کا کہنا تھا کہ گھر بار کھونے اور برسوں مشکلات میں زندگی گزارنے کے باوجود انہیں آج تک نہ مناسب معاوضہ ملا اور نہ ہی مکمل بازآبادکاری فراہم کی گئی۔

انہوں نے مزید کہا کہ یہ خاندان تقریباً چار دہائیوں سے کنڈی خاص میں انتہائی دشوار حالات میں رہ رہے ہیں، لیکن اب ایک بار پھر انہیں بے دخل کرنے کی کوشش کی جا رہی ہے۔ ان کے بقول، “دہائیوں تک بے گھری، غربت اور نظراندازی جھیلنے کے بعد انہیں دوبارہ بے گھر ہونے کی طرف دھکیلا جا رہا ہے۔”

عوامی اتحاد پارٹی نے کہا کہ موقع پر موجود مقامی لوگوں نے ایم ایل اے لنگیٹ کی مداخلت کو سراہا، خاص طور پر اس بات کو کہ انہوں نے اپنے گھر میں جاری تعزیتی اجتماع چھوڑ کر ذاتی طور پر علاقے میں پہنچ کر بے دخلی کا سامنا کرنے والے خاندانوں کے ساتھ یکجہتی کا اظہار کیا۔

یواین آئی۔ ظ ا

جموں و کشمیر پیپلز ڈیموکریٹک پارٹی (پی ڈی پی) کے رہنما محمد رفیق راتھر نے حکومت پر زور دیا ہے کہ عید کے موقع پر تمام زمروں کے ملازمین، بشمول مستقل، ڈیلی ویجرز، ایڈہاک ٰعارضی اور ریٹائرڈ ملازمین کی تنخواہوں کی فوری ادائیگی کو یقینی بنایا جائے۔

اپنے ایک بیان میں رفیق راتھر نے کہا کہ عید محض ایک تہوار نہیں بلکہ قربانی، خوشی، ہمدردی اور باہمی بھائی چارے کی علامت ہے، اور یہ انتظامیہ کی اجتماعی ذمہ داری بنتی ہے کہ ہر گھرانے کو باوقار طریقے سے عید منانے کا موقع فراہم کیا جائے۔ انہوں نے تنخواہوں اور اجرتوں کی ادائیگی میں تاخیر پر گہری تشویش کا اظہار کیا، جس کا سب سے زیادہ اثر کمزور طبقے کے ملازمین پر پڑ رہا ہے۔

انہوں نے کہا، “ڈیلی ویجرز، ایڈہاک اور عارضی ملازمین پہلے ہی معاشی غیر یقینی صورتحال سے دوچار ہیں۔ ایسے اہم موقع پر ان کی جائز تنخواہوں کی عدم ادائیگی ان کی مشکلات میں اضافہ کرتی ہے اور ان کے خاندانوں کو عید کی بنیادی خوشیوں سے بھی محروم کر دیتی ہے۔”

رفیق راتھر نے مزید کہا کہ اس عید پر بہت سے خاندان قربانی کے جانور خریدتے ہیں جس کی وجہ سے اخراجات میں اضافہ ہو جاتا ہے، لہٰذا ملازمین کو بروقت تنخواہیں ملنا اور بھی ضروری ہو جاتا ہے۔ “یہ موقع مالی اعتبار سے اہم تقاضے رکھتا ہے اور اجرتوں میں تاخیر پہلے سے پریشان حال خاندانوں پر اضافی بوجھ ڈالتی ہے،” انہوں نے کہا۔

رفیق راتھر نے کہا کہ جموں و کشمیر میں یہ ایک دیرینہ روایت رہی ہے کہ عید سے قبل سرکاری ملازمین کی تنخواہیں جاری کی جاتی ہیں تاکہ لوگ خوشی سے تہوار منا سکیں۔ “یہ روایت انتظامی حساسیت اور عوام دوست طرز حکمرانی کی عکاس ہے۔

اس سے انحراف ہزاروں خاندانوں کے لیے مایوسی کا باعث بنتا ہے جو ان آمدنیوں پر انحصار کرتے ہیں،” انہوں نے مزید کہا۔

انہوں نے زور دے کر کہا کہ بروقت تنخواہوں کی ادائیگی کوئی رعایت نہیں بلکہ ہر ملازم کا بنیادی حق ہے، اور خاص طور پر مذہبی مواقع پر اس میں تاخیر کسی صورت قابل قبول نہیں۔ انہوں نے حکومت سے اپیل کی کہ فوری اقدامات اٹھاتے ہوئے تمام بقایا جات کی ادائیگی کو ترجیحی بنیادوں پر یقینی بنایا جائے۔

ڈیلی ویجرز اور عارضی ملازمین کی حالت زار کا ذکر کرتے ہوئے انہوں نے کہا کہ یہ افراد اہم خدمات کی فراہمی میں ریڑھ کی ہڈی کی حیثیت رکھتے ہیں، مگر مالی تحفظ کے معاملے میں سب سے زیادہ نظرانداز ہوتے ہیں۔ “حکومت کو چاہیے کہ ان کی خدمات کو تسلیم کرے اور ان کے ساتھ انصاف اور عزت کا برتاؤ کرے،” انہوں نے کہا۔

رفیق راتھر نے متعلقہ محکموں اور مالیاتی حکام سے اپیل کی کہ تمام ضروری کارروائیاں تیز کی جائیں تاکہ تنخواہیں بروقت جاری ہو سکیں اور ملازمین اپنے اہل خانہ کے ساتھ بغیر مالی دباؤ کے عید منا سکیں۔

انہوں نے کہا، “عید ہمیں ہمدردی اور باہمی تعاون کا درس دیتی ہے۔ حکومت کو اس موقع پر ذمہ داری کا مظاہرہ کرنا چاہیے اور یہ یقینی بنانا چاہیے کہ کسی بھی خاندان کو انتظامی کوتاہیوں کی وجہ سے مشکلات کا سامنا نہ کرنا پڑے۔”

جموں، سدھرا علاقے میں شروع کی گئی انہدامی مہم کے بعد التجا مفتی نے حکومت کو تنقید کا نشانہ بناتے ہوئے الزام عائد کیا کہ نیشنل کانفرنس (این سی) بھارتیہ جنتا پارٹی (بی جے پی) کی ہدایات پر عمل کر رہی ہے۔

متاثرہ خاندانوں سے ملاقات کے لیے سدھرا کے دورے کے دوران صحافیوں سے گفتگو کرتے ہوئے التجا مفتی نے کہاکہ “برسرِ اقتدار این سی حکومت بی جے پی کی جانب سے جاری تمام ہدایات پر عمل کر رہی ہے، جس کے نتیجے میں انسدادِ تجاوزات مہم کے نام پر کئی مکانات منہدم کیے گئے ہیں۔”

انہوں نے کہا کہ “جموں شدید گرمی کی لہر کی زد میں ہے اور ایسے موسمی حالات میں سینکڑوں افراد بے گھر ہو گئے ہیں۔

شدید گرمی کے باعث بچے جلد اور آنکھوں کی بیماریوں میں مبتلا ہو رہے ہیں۔” انہوں نے مزید کہا کہ “بی جے پی رہنما کے سدھرا دورے اور تعمیرات کو غیر قانونی قرار دینے کے بعد ہی این سی حکومت نے کارروائی شروع کی۔”

التجا مفتی نے مزید الزام لگایا کہ “این سی نے جموں و کشمیر میں بھی اترپردیش طرز کا بلڈوزر ماڈل نافذ کرنا شروع کر دیا ہے، جس کے باعث سیکڑوں افراد بے گھر ہوئے ہیں۔” ان کے مطابق اس سے قبل ایسا کٹھوعہ، آر ایس پورہ اور اب جموں میں بھی ہوا ہے۔

انہوں نے کہا کہ پارٹی کارکنوں اور رہنماؤں سے کہا گیا ہے کہ متاثرہ خاندانوں کے لیے فوری طور پر کھانا، خیمے، پانی، راشن اور دیگر ضروری اشیاء کا انتظام کیا جائے۔

التجا مفتی نے کہا کہ پپلز ڈیموکریٹک پارٹی (پی ڈی پی) زمین سے متعلق بل لائی تھی، لیکن نہ تو این سی اور نہ ہی بی جے پی نے اس کی حمایت کی۔ ان کے مطابق این سی نے ان لوگوں کو “زمین پر قبضہ کرنے والے” قرار دیا جبکہ بی جے پی نے انہیں “لینڈ جہادی” کہا، اور این سی وہی کر رہی ہے جو بی جے پی کی جانب سے کہا جا رہا ہے۔

انہوں نے حکومت سے اپیل کی کہ متاثرہ خاندانوں کو فوری طور پر رہائش فراہم کی جائے تاکہ انہیں کچھ راحت مل سکے۔

قابلِ ذکر ہے کہ جموں و کشمیر کے جنگلات کے وزیر جاوید احمد رانا پہلے ہی سدھرا علاقے کے قریب مہامایا جنگلات میں محکمہ جنگلات کی جانب سے کی گئی انہدامی کارروائی کی تحقیقات کا حکم دے چکے ہیں۔

یواین آئی۔ ظ ا