نئی دہلی، وزیر اعظم نریندر مودی نے منگل کو کہا کہ مغربی بنگال میں بھارتیہ جنتا پارٹی (بی جے پی) کی حکومت بننے کے بعد اب ریاست کے لوگوں کو آیوشمان بھارت صحت بیمہ اسکیم کا فائدہ مل سکے گا انہوں نے زور دے کر کہا کہ نئی ’ڈبل انجن حکومت‘ مرکزی فلاحی پروگراموں کے مؤثر نفاذ کو یقینی بنائے گی مسٹر مودی نے سوشل میڈیا پلیٹ فارم ’ایکس‘ پر ایک پوسٹ میں کہا، “مغربی بنگال کے میرے بھائیوں اور بہنوں کی فلاح اولین ترجیح ہے۔ مجھے بہت خوشی ہے کہ ریاست کے لوگوں کو آیوشمان بھارت تک رسائی حاصل ہوگی، جو دنیا کی سب سے بڑی صحت کی دیکھ بھال کی اسکیم ہے اور معیاری اور سستی طبی خدمات کو یقینی بناتی ہے۔ اس کے ساتھ ہی ڈبل انجن حکومت مرکزی اسکیموں کی بلا رکاوٹ فراہمی کو یقینی بنائے گی۔”

وزیر اعظم کا یہ بیان مغربی بنگال میں بی جے پی کی جانب سے باضابطہ طور پر اقتدار سنبھالنے کے بعد سامنے آیا ہے۔ ریاست میں ترنمول کانگریس کی 15 سالہ حکومت ختم ہو گئی اور سابق وزیر اعلیٰ ممتا بنرجی کی قیادت والی حکومت اقتدار سے باہر ہو گئی۔ بی جے پی نے آیوشمان بھارت کے نفاذ اور مرکز کے ساتھ بہتر تال میل کو اپنے انتخابی مہم کا اہم موضوع بنایا تھا اور سابقہ ترنمول حکومت پر سیاسی وجوہات کی بنا پر کئی مرکزی اسکیموں کو روکنے کا الزام عائد کیا تھا۔

آیوشمان بھارت، جسے سرکاری طور پر پردھان منتری جن آروگیہ یوجنا کہا جاتا ہے، معاشی طور پر کمزور خاندانوں کوسیکنڈری اور ٹرٹیری اسپتالوں میں بھرتی ہونے کے لئے فی خاندان پانچ لاکھ روپے تک سالانہ صحت بیمہ کوریج فراہم کرتی ہے۔ ترنمول حکومت کے دوران مغربی بنگال اس اسکیم سے باہر رہا تھا اور اس کی جگہ اپنی صحت بیمہ اسکیم ’سواستھیہ ساتھی‘ چلا رہا تھا، جسے محترمہ بنرجی حکومت نے ایک زیادہ جامع متبادل کے طور پر پیش کیا تھا۔

یواین آئی۔الف الف

جینت رائے چودھری

نئی دہلی ہندوستان میں پیٹرول اور ڈیزل کی قیمتوں میں ہونے والا اضافہ اب سیاسی کرتب دکھانے کے بجائے معاشی جوڑ توڑ کا معاملہ زیادہ بن گیا ہے گزشتہ کئی مہینوں سے دباؤ آہستہ آہستہ بڑھ رہا ہے اور اس کے پیچھے ایک بڑی وجہ خام تیل کی بڑھتی ہوئی قیمتیں ہیں ماہرین کا خیال ہے کہ اگر مغربی ایشیا میں جنگ نہ بھی ہو، تب بھی 2026 میں خام تیل کی قیمتیں 95 سے 105 ڈالر فی بیرل کے درمیان رہ سکتی ہیں۔ یہ گزشتہ سال کے 65-70 ڈالر کے اوسط کے مقابلے میں بہت زیادہ ہے۔

ریزرو بینک نے اس سال کے لیے خام تیل کی قیمت 85 ڈالر رہنے کا تخمینہ لگایا تھا، لیکن گزشتہ ماہ ہندوستان کو اوسطاً 114.48 ڈالر فی بیرل کی قیمت پر تیل خریدنا پڑا۔ ماہرین کے مطابق اس سال کی پہلی ششماہی میں قیمتیں 100 ڈالر سے نیچے آنے کی امید بہت کم ہے۔

ہندوستان اپنی ضرورت کا 85 فیصد سے زیادہ خام تیل بیرون ملک سے درآمدکرتا ہے۔ تیل کی قیمتوں میں ہر 10 ڈالر کے اضافے سے ہندوستان کے درآمدی بل پر تقریباً 1.5 سے 2 ارب ڈالر کا اضافی بوجھ پڑتا ہے۔ حکومت نے گزشتہ ماہ پیٹرول اور ڈیزل پر ایکسائز ڈیوٹی (پیداواری محصول) میں 10 روپے کی کٹوتی کی تھی تاکہ قیمتیں نہ بڑھیں، لیکن یہ ریلیف زیادہ عرصے تک برقرار نہیں رہ سکتا کیونکہ تیل کمپنیاں پہلے ہی بھاری نقصان میں چل رہی ہیں۔

دانشوروں کا کہنا ہے کہ انتخابات ختم ہونے کے بعد اب تیل کی قیمتوں میں تبدیلی کو روکنا مشکل ہوگا، کیونکہ نہ تو کمپنیاں اتنا نقصان برداشت کر سکتی ہیں اور نہ ہی حکومت اپنے بجٹ سے اس کی تلافی کر سکتی ہے۔

وزیر اعظم نریندر مودی نے بھی اس خطرے کو بھانپتے ہوئے لوگوں سے اپیل کی ہے کہ وہ غیر ضروری چیزوں کی درآمد کم کریں اور توانائی کی بچت کریں۔ انہوں نے سونے کی خریداری ایک سال تک کے لیے روکنے کی اپیل کی ہے۔ ہندوستانیوں کو سونے سے اس قدر لگاؤ ہے کہ گزشتہ سال ہندوستان نے اس کی درآمد پر تقریباً 72 ارب ڈالر خرچ کر دیے۔

سونا ہندوستانیوں کے لیے صرف زیور نہیں بلکہ بچت کا ایک ذریعہ بھی ہے۔ ریزرو بینک بھی اپنے سونے کے ذخائر میں تیزی سے اضافہ کر رہا ہے، جو مارچ 2026 تک 880 ٹن تک پہنچ گیا ہے۔ اب ہندوستان کے کل غیر ملکی زر مبادلہ کے ذخائر میں سونے کا حصہ بڑھ کر تقریباً 16.7 فیصد ہو گیا ہے۔

مجموعی طور پر ہندوستان کے سامنے دو بڑے چیلنجز ہیں- تیل اور سونا۔ تیل خریدنے میں غیر ملکی کرنسی خرچ ہوتی ہے اور سونے کی درآمد میں وہ بچائی جا سکتی ہے۔ مزید برآں، ڈالر کی مضبوطی نے مشکلات میں اضافہ کر دیا ہے۔ ایک سال پہلے جو ڈالر 85.41 روپے کا تھا، وہ اب 95.24 روپے پر پہنچ گیا ہے اور جلد ہی اس کے 100 روپے تک پہنچنے کا خدشہ ہے۔

یواین آئی۔ایف اے

نئی دہلی وزیر اعظم نریندر مودی کی توانائی کے تحفظ کی اپیل پر اپوزیشن جماعتوں کی تنقید کے درمیان وزیر دفاع راج ناتھ سنگھ نے واضح کیا ہے کہ ملک میں کسی بھی پٹرولیم مصنوعات کی کوئی کمی نہیں ہے اور عوام کو گھبراہٹ میں خریداری سے بچنا چاہیے۔

مسٹر سنگھ نے پیر کے روز یہاں مغربی ایشیا کے بحران کے حوالے سے تشکیل دیے گئے وزراء کے غیر رسمی گروپ کی پانچویں میٹنگ کی صدارت کی۔ میٹنگ میں تنازع کی تازہ صورتحال کا جائزہ لیا گیا اور ہندوستان کی تیاریوں کو مضبوط بنانے کے ساتھ ساتھ عوام پر اس کے اثرات کو کم سے کم کرنے کے اقدامات پر تبادلہ خیال کیا گیا۔ میٹنگ کے بعد جناب سنگھ نے سوشل میڈیا پر ایک پوسٹ میں تمام ضروری اشیاء کی فراہمی کو یقینی بنانے کے لیے حکومت کی کوششوں کی ستائش کی۔ انہوں نے عوام سے پرسکون رہنے کی اپیل کی اور کہا کہ سپلائی چین میں کسی بھی قسم کی رکاوٹ کو روکنے کے لیے تمام ٹھوس اقدامات کیے جا رہے ہیں۔

وزراء کے گروپ کو بتایا گیا کہ ملک میں ضروری اشیاء وافر مقدار میں دستیاب ہیں اور موجودہ بچت کے اقدامات صرف طویل مدتی صلاحیت سازی کے مقصد سے کیے جا رہے ہیں تاکہ بحران کے طویل ہونے کی صورت میں اس سے نمٹا جا سکے۔ یہ بھی کہا گیا کہ سپلائی کا انتظام اطمینان بخش ہے اور لوگوں کو ایندھن یا دیگر اشیاء کی ضرورت سے زیادہ خریداری کرنے کی ضرورت نہیں ہے۔

وزیر دفاع نے زور دے کر کہا کہ موجودہ حالات میں ہندوستان کی ترجیح توانائی کی فراہمی کو بلا تعطل برقرار رکھنا، معاشی استحکام کو یقینی بنانا اور سمندری تجارتی راستوں کی حفاظت کرنا ہے۔ انہوں نے تمام متعلقہ فریقوں کو ہر صورتحال سے نمٹنے کے لیے چوکس رہنے کی ہدایت دی۔ انہوں نے کہا کہ مغربی ایشیا کی صورتحال کو محض ایک الگ واقعے کے طور پر نہیں دیکھنا چاہیے، کیونکہ عالمی سطح پر جڑے ہوئے ماحول میں کسی بھی قسم کا بین الاقوامی بحران براہ راست یا بالواسطہ تمام ممالک کو متاثر کرتا ہے۔

مسٹر سنگھ نے حکام کو ہدایت دی کہ وزیر اعظم کی اپیل کو زمینی سطح پر نافذ کرنے کے لیے ٹھوس اقدامات کیے جائیں۔ وزیر اعظم نے عوام سے میٹرو اور عوامی ٹرانسپورٹ کے استعمال، کار پولنگ اپنانے، غیر ضروری غیر ملکی دوروں سے بچنے، گھریلو سیاحت کو فروغ دینے اور ایک سال تک غیر ضروری سونے کی خریداری سے گریز کرنے کی اپیل کی تھی، تاکہ پٹرول اور ڈیزل کی کھپت کم ہو اور غیر ملکی زر مبادلہ کے ذخائر محفوظ رہیں۔

وزراء کے گروپ کو مطلع کیا گیا کہ جہاں دنیا کے دیگر ممالک نے گھریلو کھپت میں بھاری کٹوتی کے لیے ہنگامی اقدامات کیے ہیں، وہیں ہندوستان میں کسی بھی پٹرولیم مصنوعات کی کوئی کمی نہیں ہے۔ ہندوستان کے پاس 60 دن کا خام تیل، 60 دن کی قدرتی گیس اور 45 دن کا ایل پی جی ذخیرہ دستیاب ہے۔ غیر ملکی زر مبادلہ کے ذخائر 703 ارب ڈالر کی اطمینان بخش سطح پر ہیں۔ ہندوستان دنیا کا تیسرا بڑا تیل صاف کرنے والا ملک ہے اور پٹرولیم مصنوعات کا چوتھا بڑا برآمد کنندہ ہے، جو 150 سے زائد ممالک کو برآمدات کر رہا ہے۔ تاہم، بین الاقوامی مارکیٹ میں خام تیل کی قیمتیں مسلسل اونچی سطح پر رہنے کی وجہ سے ملک کو بھاری لاگت برداشت کرنی پڑ رہی ہے، جسے ایندھن کی بچت سے کم کیا جا سکتا ہے۔

گروپ کو بتایا گیا کہ ہندوستان ان چند ممالک میں شامل ہے جہاں عالمی عدم استحکام کے باوجود تنازع شروع ہونے کے 70 دن بعد بھی پٹرولیم قیمتیں مستحکم ہیں۔ کئی ممالک میں قیمتیں 30 سے 70 فیصد تک بڑھ چکی ہیں۔ ہندوستان کی تیل کمپنیاں روزانہ تقریباً 1000 کروڑ روپے کا نقصان برداشت کر رہی ہیں تاکہ عالمی قیمتوں کا بوجھ ہندوستانی شہریوں پر نہ پڑے۔ لہٰذا، کسی بھی قسم کی تشویش کی ضرورت نہیں ہے اور شہریوں کو پٹرول پمپوں پر بھیڑ لگانے کی حاجت نہیں ہے۔

میٹنگ میں جے پی نڈا، ہردیپ سنگھ پوری، اشونی ویشنو، کرن ریجیجو، کے آر موہن نائیڈو، سربانند سونووال اور ڈاکٹر جتیندر سنگھ نے شرکت کی۔

یواین آئی۔ایف اے