نئی دہلی، صدرِ جمہوریہ دروپدی مرمو نے قومی مفاد کو سب سے اہم قرار دیتے ہوئے اراکینِ پارلیمنٹ سے زور دار اپیل کی ہے کہ وہ سیاسی اختلافات سے اوپر اٹھ کر ’’وکست بھارت‘‘ جیسے قومی اہمیت کے موضوعات پر باہمی اتفاق کے ساتھ کام کریں اور ملک کی ترقی کو نئی توانائی فراہم کریں۔

پارلیمنٹ کے بجٹ اجلاس کے پہلے دن دونوں ایوانوں کے مشترکہ اجلاس سے خطاب کرتے ہوئے صدرِ جمہوریہ نے کہا کہ قوم سے جڑے اہم معاملات پر اراکینِ پارلیمنٹ کا یک زبان ہونا ضروری ہے اور یہی آئین کی روح بھی ہے۔ انہوں نے گزشتہ 11 برسوں کے دوران حکومت کے کام کاج کا حوالہ دیتے ہوئے کہا کہ ملک نے مختلف شعبوں میں تیز رفتار ترقی کی ہے اور ہندوستان ہر میدان میں تیزی سے خود کفالت کی سمت بڑھ رہا ہے۔ انہوں نے دفاع، صحت، تعلیم، خلائی تحقیق، بنیادی ڈھانچے اور زراعت جیسے شعبوں میں حکومت کی کامیابیوں کا خصوصی ذکر کیا۔ ساتھ ہی کہا کہ حکومت بدعنوانی کے خاتمے، سماجی انصاف اور خواتین کے بااختیار بنانے کے لیے پُرعزم ہے۔

صدرِ جمہوریہ نے کہا کہ وکست بھارت کا ہدف کسی ایک حکومت یا نسل تک محدود نہیں بلکہ یہ ایک مسلسل سفر ہے، جس میں سب کی کوششیں اور تسلسل نہایت اہم ہیں۔ انہوں نے کہا “مختلف نظریات اور خیالات کے درمیان یہ بات سب کو تسلیم کرنی چاہئے کہ ملک سے بڑھ کر کچھ نہیں۔ وکست بھارت کا عزم، ہندوستان کی سلامتی، خود انحصاری، سوَدیشی کی مہم، اتحاد کی کوششیں، صفائی اور قوم سے جڑے ایسے موضوعات پر اراکینِ پارلیمنٹ کو متحد ہونا ہی چاہیے اور یہی آئین کی روح ہے۔”

صدرِ جمہوریہ مرمو نے مہاتما گاندھی، پنڈت نہرو، بابا صاحب امبیڈکر، سردار پٹیل، جے پی لوہیا، پنڈت دین دیال اپادھیائے اور اٹل بہاری واجپئی جیسی عظیم شخصیات کا ذکر کرتے ہوئے کہا کہ ان سب کا یہی نظریہ تھا کہ جمہوریت میں اختلافِ رائے فطری ہے، مگر کچھ معاملات اختلافات سے بالاتر ہوتے ہیں۔ انہوں نے کہا:“میری آپ سب سے گزارش ہے کہ ہر رکنِ پارلیمنٹ قومی مفاد کے موضوعات پر متحد ہو کر، ملک کی ترقی کا حصہ بنے اور ملک کی ترقی میں نئی توانائی بھرے۔”

انہوں نے کہا کہ ملک اس وقت مستقبل کے ایک اہم موڑ پر کھڑا ہے اور آج کئے گئے فیصلوں کا اثر آنے والے برسوں میں نظر آئے گا۔ انہوں نے اس یقین کا اظہار کیا کہ پارلیمنٹ، حکومت اور عوام تینوں مل کر وکست بھارت کے عزم کو پورا کریں گے اور آئینی اقدار کے ساتھ آگے بڑھیں گے۔

صدرِ جمہوریہ نے کہا کہ ترقی یافتہ ہندوستان (وکست بھارت) کے عزم کو عملی جامہ پہنانے کے لیے حکومت ’’ریفارم ایکسپریس‘‘ کی رفتار کو مسلسل تیز کرتی رہے گی۔ انہوں نے کہا کہ حکومت بدعنوانی اور گھوٹالوں سے پاک نظام قائم کرنے میں کامیاب ہو رہی ہے، جس کے باعث ٹیکس دہندگان کی ایک ایک پائی ملک کی ترقی اور عوامی فلاح پر خرچ ہو رہی ہے۔ انہوں نے کہا کہ ہندوستان جدید بنیادی ڈھانچے میں بے مثال سرمایہ کاری کر رہا ہے اور زمین، سمندر اور فضا ہر شعبے میں ملک کی تیز رفتار پیش رفت عالمی سطح پر موضوعِ بحث بنی ہوئی ہے۔

صدرِ جمہوریہ نے ماؤ نواز دہشت گردی کے خلاف کارروائیوں میں کامیابی کا ذکر کرتے ہوئے کہا کہ جہاں کبھی 126 اضلاع میں خوف اور عدم تحفظ کا ماحول تھا، وہ اب سکڑ کر آٹھ اضلاع تک محدود رہ گیا ہے، جن میں سے صرف تین اضلاع ہی اب شدید طور پر متاثر ہیں۔ انہوں نے امید ظاہر کی کہ وہ دن دور نہیں جب ملک سے ماؤ نوازوں کی دہشت گردی مکمل طور پر ختم ہو جائے گی۔ انہوں نے کہا کہ اس نظریے نے کئی نسلوں کا مستقبل تاریک کیا اور اس کا سب سے زیادہ نقصان نوجوانوں، آدیواسیوں اور دلت بھائی بہنوں کو ہوا۔

انہوں نے بتایا کہ گزشتہ ایک سال میں ماؤنوازوں سے وابستہ تقریباً دو ہزار افراد نے خودسپردگی کی ہے جس سے لاکھوں شہریوں کی زندگی میں امن لوٹا ہے اور ماؤ نواز سے پاک علاقوں میں تبدیلی واضح نظر آ رہی ہے۔ انہوں نے کہا کہ بیجاپور کے ایک گاؤں میں 25 سال بعد بس پہنچی تو لوگوں نے اسے تہوار کی طرح منایا، بستر اولمپک میں نوجوان بڑھ چڑھ کر حصہ لے رہے ہیں اور ہتھیار چھوڑنے والے افراد جگدل پور کے پنڈم کیفے میں عوام کی خدمت کر رہے ہیں۔

صدرِ جمہوریہ نے کہا کہ حکومت کی ترقی پسند سوچ اور پالیسیوں کے سبب خواتین نے ہر شعبے میں تیز رفتار ترقی کی ہے۔ لکھ پتی دیدی اسکیم کے تحت مستفید خواتین کی تعداد دو کروڑ سے تجاوز کر چکی ہے، جسے جلد ہی تین کروڑ تک پہنچانے کا ہدف ہے۔ انہوں نے کہا کہ این ڈی اے سے خواتین کیڈٹس کے پہلے بیچ کی پاس آؤٹ تقریب نے اس یقین کو مزید مضبوط کیا ہے کہ ملک کی ترقی میں ’’ناری شکتی‘‘ کا کردار مرکزی ہے۔

انہوں نے عدالتی نظام، مصنوعی ذہانت (اے آئی) کے غلط استعمال سے پیدا ہونے والے خطرات، عالمی چیلنجز کے باوجود ہندوستان کی مضبوط اقتصادی پیش رفت، قبائلی، درج فہرست ذاتوں اور پسماندہ طبقات کی فلاحی اسکیموں، توانائی، زراعت، صنعت، مینوفیکچرنگ، بنیادی ڈھانچے، ڈیجیٹل معیشت اور سماجی تحفظ سے متعلق حکومت کی کامیابیوں کا تفصیلی ذکر کیا۔

صدرِ جمہوریہ نے اپنے خطاب کے اختتام پر کہا کہ گزشتہ ایک دہائی میں ہندوستان نے اپنی ترقی کی بنیاد کو مضبوط کیا ہے، کروڑوں لوگوں کو غربت سے باہر نکالا گیا ہے اور ملک مسلسل ترقی کی راہ پر گامزن ہے۔ انہوں نے اس یقین کا اظہار کیا کہ مشترکہ عزم، نظم و ضبط اور مسلسل کوششوں سے ہندوستان ترقی یافتہ ملک بن کر ابھرے گا۔

یواین آئی۔ م س