ہندوستان

ملک کی اصل طاقت ہمارا متوسط طبقہ ہے: کیجریوال

Published

1 year ago

January 22, 2025

نئی دہلی، عام آدمی پارٹی (اے اے پی) کے قومی کنوینر اروند کیجریوال نے کہا کہ ملک کا اصلی سپر پاور ہمارا متوسط طبقہ ہے۔

مسٹر کیجریوال نے بدھ کو ایک پریس کانفرنس میں کہا کہ آج کوئی بھی پارٹی متوسط طبقے کے مفاد کی بات کرنے کو تیار نہیں ہے۔ آزاد ہندوستان کے 75 سال میں ایک حکومت کے بعد دوسری حکومت آئی اور ان سب نے متوسط طبقے کو دباکر، ڈراکر اور نچوڑکر رکھا ہوا ہے۔ ملک چلانے کے لیے لاکھوں کروڑوں کی تعداد میں مڈل کلاس ٹیکس بھر بھر کر دیتا ہے لیکن بدلے میں ان کوکچھ نہیں ملتا۔

انہوں نے کہا کہ ہندوستان کا متوسط طبقہ حکومت کا صرف اور صرف اے ٹی ایم بن کر رہ گیا ہے۔ سچ یہ ہے کہ ہندوستان کا متوسط طبقہ ٹیکس دہشت گردی کا شکار ہے۔ آخر یہ متوسط طبقہ کون ہے؟ اساتذہ، ڈاکٹرز، آئی ٹی پروفیشنلز، انجینئرز، اکاؤنٹنٹ، بینکرز، دکاندار اور وکلاء جیسے ہزاروں عام لوگ جو مل کر ہمارا ملک چلاتے ہیں، یہ مڈل کلاس ہیں۔ مڈل کلاس کے کوئی بہت بڑے خواب نہیں ہیں۔ سچ یہ ہے کہ آج زیادہ تر حکومتیں متوسط طبقے کے لیے نہ تو اچھے اسکول، نہ ہی اچھے اسپتال بنارہی ہیں۔ سچائی یہ ہے کہ اس طبقے کو سب سے زیادہ ہمارے ملک میں پریشان کیا جاتا ہے۔

اے اے پی لیڈر نے کہا کہ اگر ایک مڈل کلاس خاندان سال میں 10-12 لاکھ روپے کماتا ہے تو 50 فیصد سے زیادہ آمدنی صرف حکومت کو ٹیکس ادا کرنے میں چلی جاتی ہے۔ اب تو دودھ، دہی اور پوپ کارن پر بھی ٹیکس لگتا ہے۔ یہاں تک کہ پوجا کی اشیاء پر بھی ٹیکس بھرنا پڑتا ہے۔ گھر خریدنا ہے تو ٹیکس، گھر فروخت کرنا ہے تو ٹیکس، گاڑی خریدو تو ٹیکس، فروخت کرو تو ٹیکس۔ بچوں کو اچھی تعلیم دینی ہے تو پہلے پرائیویٹ اسکول کی مہنگی فیس کی مار اور اس کے اوپر اچھے کالج بھیجنے کے لئے ایجوکیشن لون لو اور اس کی ایم ایم آئی پر ڈبل مار پڑتی ہے۔ جیتے جی ٹیکس تو دینا پڑتا ہے لیکن اب تو حکومت نے ایسی حالت کردی ہے کہ مرنے کے بعد بھی ٹیکس دینا پڑتا ہے۔

انہوں نے کہا کہ ہم مرکزی حکومت سے بھی اپیل کرتے ہیں کہ ہمارے ملک کی اصلی سپر پاور مڈل کلاس کو پہچانے۔ عام آدمی پارٹی سڑکوں سے پارلیمنٹ تک متوسط طبقے کی آواز بنے گی۔ ان کی آواز اٹھائیں گے اور ان کے مسائل اٹھائیں گے۔

اے اے پی لیڈر نے مرکزی حکومت سے سات مطالبات کرتے ہوئے کہا کہ تعلیمی بجٹ کو 2 فیصد سے بڑھا کر 10 فیصد کیا جائے اور ملک بھر کے پرائیویٹ اسکولوں کی فیس پر لگام لگائی جائے۔ اعلیٰ تعلیم کے لیے سبسڈی اور اسکالرشپ دی جائے۔ صحت کا بجٹ بھی بڑھاکر 10 فیصد کیا جائے اور ہیلتھ انشورنس سے ٹیکس ختم کیا جائے۔ انکم ٹیکس چھوٹ کی حد کو 7 لاکھ روپے سے بڑھا کر کم از کم 10 لاکھ کی جائے۔ ضروری اشیاء پر جی ایس ٹی ختم کیا جائے۔ بزرگ شہریوں کے لیے مضبوط ریٹائرمنٹ پلان اور پنشن پلان بنایا جائے اور ملک بھر کے تمام سرکاری اور نجی اسپتالوں میں بزرگ شہریوں کو مفت اور اچھا علاج فراہم کیا جائے۔ اس سے پہلے ریلوے میں بزرگ شہریوں کو 50 فیصد رعایت ملتی تھی جسے دوبارہ شروع کیا جانا چاہیے۔

یواین آئی۔الف الف

ہندوستان

سربراہ اجلاس سے الگ برطانیہ، عرب امارات، جاپان، کوریا اور مصر کے لیڈروں سے کی مودی نے بات

Published

5 hours ago

June 17, 2026

Online Desk

نئی دہلی، وزیر اعظم نریندر مودی نے فرانس کے ایویاں میں جی-7 سربراہ اجلاس سے الگ برطانیہ کے وزیر اعظم سر کیر اسٹارمر اور متحدہ عرب امارات کے صدر شیخ محمد بن زاید آل نہیان سے منگل کو دوطرفہ ملاقات کی مسٹر مودی نے جنوبی کوریا کے صدر لی جے-میونگ، جاپان کی وزیر اعظم سنائے تاکائیچی، کینیا کے صدر ولیم روٹو اور مصر کے صدر عبدالفتاح السیسی سے بھی الگ الگ ملاقات کے دوران دوطرفہ اور عالمی اہمیت کے مسائل پر تبادلہ خیال کیا۔ مسٹر اسٹارمر اور مسٹر مودی نے گزشتہ سال باہمی دوروں کے بعد سے ہندوستان-برطانیہ تعلقات میں مضبوط رفتار کا جائزہ لیا اور ’ویژن 2035‘ کے تمام اہم ستونوں—تجارت اور اقتصادی ترقی، دفاع اور سکیورٹی، ماحولیاتی کارروائی اور گرین انرجی، ٹیکنالوجی اور اختراع نیز تعلیم اور لوگوں کے باہمی تعلقات—میں ہوئی پیش رفت کا خیرمقدم کیا۔ دونوں رہنماؤں نے جامع اقتصادی اور تجارتی معاہدے کے جلد نافذ ہونے کی امید ظاہر کی۔ انہوں نے مضبوط تعلیمی شراکت داری پر اطمینان کا اظہار کیا اور بنگلورو میں یونیورسٹی آف لیورپول کی طرف سے اپنا کیمپس قائم کرنے اور ممبئی میں یونیورسٹی آف یارک اور یونیورسٹی آف برسٹل کے کیمپس کھولنے کے لیے حال ہی میں ہوئی پیش رفت کا ذکر کیا۔

دونوں رہنماؤں نے مغربی ایشیا اور یوکرین سمیت باہمی دلچسپی کے علاقائی اور عالمی حالات پر خیالات کا تبادلہ کیا۔ انہوں نے ہندوستان-برطانیہ جامع اسٹریٹجک پارٹنرشپ کو مزید مضبوط کرنے کے اپنے مشترکہ عزم کو دہرایا۔ مسٹر مودی اور مسٹر آل نہیان کے درمیان اس سال یہ تیسری ملاقات تھی جس سے ہندوستان-یو اے ای کی مضبوط اور متحرک اسٹریٹجک شراکت داری کا پتہ چلتا ہے۔ دونوں رہنماؤں نے اس سال جنوری میں صدر آل نہیان کے دورۂ ہندوستان اور مئی میں وزیر اعظم مودی کے دورۂ متحدہ عرب امارات کے نتیجے میں ٹیکنالوجی، تجارت، سرمایہ کاری، توانائی اور دفاع کے شعبوں میں دوطرفہ تعاون میں ہوئی پیش رفت اور مثبت تبدیلیوں کا جائزہ لیا۔ انہوں نے باہمی دلچسپی کے علاقائی اور عالمی حالات پر بھی خیالات کا تبادلہ کیا۔

وزیر اعظم نے مغربی ایشیا کے خطے میں مستقل امن، سکیورٹی اور استحکام کو فروغ دینے کے لیے مذاکرات، سفارت کاری اور بین الاقوامی قانون، خودمختاری اور علاقائی سالمیت کے احترام کی اہمیت پر زور دیا۔ دونوں فریقین نے آبنائے ہرمز سے مسلسل بلا رکاوٹ، محفوظ اور پرامن آمد و رفت اور تجارت جاری رکھنے کی اپیل کی۔ وزیر اعظم نے صدر آل نہیان کو اس سال کے آخر میں ہندوستان کی میزبانی میں ہونے والے برکس بربراہ اجلاس میں شرکت کے لیے مدعو کیا۔

یو این آئی ایف اے

ہندوستان

‘ٹیلی گرام بین’ پر راہل کا مرکزی حکومت پر الزام، ”پیپر لیک مافیا پر نہیں، طالب علموں کے خلاف کارروائی کر رہی ہے حکومت“

Published

11 hours ago

June 17, 2026

Online Desk

نئی دہلی، لوک سبھا میں اپوزیشن لیڈر راہل گاندھی نے مبینہ ’ٹیلی گرام بین‘ کے تعلق سے مرکزی حکومت پر الزام لگایا ہے کہ پیپر لیک روکنے کے نام پر حکومت اصل قصورواروں کے بجائے طالب علموں کو نشانہ بنا رہی ہے مسٹر گاندھی نے کہا کہ لاکھوں طالب علم برسوں سے ٹیلی گرام کا استعمال پڑھائی، نوٹس، ٹیسٹ سیریز، مباحثہ اور مسابقتی امتحانات کی تیاری کے لیے کرتے ہیں۔ ایسے میں اس سہولت کو بند کرنا پیپر لیک کا حل نہیں ہو سکتا۔ انہوں نے طنز کرتے ہوئے کہا کہ حکومت چور کو پکڑنے کے بجائے متاثرہ کے گھر پر تالا لگا رہی ہے۔ انہوں نے دعویٰ کیا کہ یہ قدم نہ تو مؤثر ہے اور نہ ہی پیپر لیک روکنے کا مستقل علاج۔ انہوں نے سوال کیا کہ اگر اس سے بھی مسئلے کا حل نہیں ہوا تو کیا اگلی پابندی واٹس ایپ پر لگائی جائے گی

کانگریس لیڈر نے کہا کہ امتحان کے دوران طالب علموں کی سخت تلاشی، جیبیں کاٹ کر جانچ اور سوالناموں کو فضائیہ (ایئرفورس) سے بھیجنے جیسے اقدامات محض دکھاوا ہیں۔ ان کے مطابق، حکومت پیپر لیک کے اصل مسئلے پر کارروائی کرنے سے بچ رہی ہے، جبکہ پیپر لیک مافیا نوجوانوں کے مستقبل سے لگاتار کھلواڑ کر رہا ہے۔ انہوں نے وزیر اعظم نریندر مودی سے اپیل کی کہ دکھاوٹی اقدامات کے بجائے پیپر لیک مافیا پر سخت کارروائی کی جائے، طالب علموں پر نہیں۔ مسٹر گاندھی نے انتباہ دیا کہ اگر نوجوانوں کی آواز نہیں سنی گئی تو ملک کا نوجوان اپنے حقوق کے لیے جدوجہد کرنا جانتے ہے۔

یو این آئی ایف اے

ہندوستان

’جمہوریت کو نقصان پہنچانے کے لیے شاہ چلا رہے ہیں دھوکہ دہی پرمبنی مہم ‘: رمیش

Published

13 hours ago

June 17, 2026

Online Desk

نئی دہلی، کانگریس پارٹی کے جنرل سکریٹری جے رام رمیش نے مرکزی وزیر داخلہ امت شاہ پر اپوزیشن کو نشانہ بنانے اور ہندوستانی جمہوریت کو کمزور کرنے کا الزام لگایا ہے۔

مسٹر رمیش نے سوشل میڈیا پلیٹ فارم ’ایکس‘ کے ذریعے بدھ کو کہا، ”وزیر داخلہ امت شاہ 17 اپریل 2026 کو لوک سبھا میں حد بندی بلوں کو پاس نہیں کرا پانے کے بعد اپنی ”بے عزتی“ کی تلافی کرنے کے لیے لگاتار اپوزیشن پر حملے کر رہے ہیں۔“

مسٹر رمیش نے الزام لگایا کہ وزیر داخلہ کی طرف سے دیئے جانے والے لالچ کے باعث ایسے کئی لیڈر بی جے پی میں شامل ہو رہے ہیں، جو محض دو سال پہلے مضبوط بی جے پی مخالف ایجنڈے پر منتخب ہوئے تھے۔ انہوں نے دعویٰ کیا کہ ان لیڈروں کو دیے جا رہے لالچ ”حیران کن“ ہیں۔

کانگریس لیڈر نے کہا کہ وزیر داخلہ ایک ” تنگ ذہنی اور دھوکہ دہی پرمبنی مہم“ چلا رہے ہیں، جو مختلف وسائل سے لیس ہیں اور مبینہ طور پر الگ الگ افراد کی ضروریات کے مطابق منصوبے بنارہے ہیں اورلالچ دے رہے ہیں ۔ انہوں نے الزام لگایا کہ اس مہم میں اخلاقیات کی تمام حدیں پار کی جا رہی ہیں لیکن بالاخر یہ اپنے مقصد میں کامیاب نہیں ہوگی۔

یو این آئی اف اے