لندن،عالمی منڈی میں خام تیل کی قیمتوں میں مزید 2 فیصد کمی ریکارڈ کی گئی ہے جبکہ برینٹ کروڈ حالیہ مہینوں کی کم ترین سطح پر آ گیا۔

عالمی منڈی میں خام تیل کی قیمتوں میں گراوٹ کا سلسلہ جاری ہے اور تازہ ترین تجارتی سیشن کے دوران تیل کی قیمتوں میں مزید 2 فیصد کمی ریکارڈ کی گئی ہے۔ اس کمی کے بعد برینٹ خام تیل کی قیمت کم ہو کر 77 ڈالر فی بیرل کی سطح پر آ گئی ہے۔

رپورٹ کے مطابق عالمی مارکیٹ میں امریکی خام تیل (ڈبلیو ٹی آئی) کی قیمت بھی کم ہو کر 73 ڈالر فی بیرل جبکہ متحدہ عرب امارات کا مربن خام تیل 69 ڈالر فی بیرل میں فروخت ہو رہا ہے۔

معاشی ماہرین کے مطابق امریکہ اور ایران کے درمیان جنگ کے آغاز کے بعد سے اب تک عالمی منڈی میں برینٹ خام تیل کی یہ سب سے کم ترین سطح ہے۔ قیمتوں میں اس نمایاں کمی کی وجہ عالمی سطح پر تیل کی طلب میں کمی اور سپلائی کی صورتحال میں بہتری کو قرار دیا جا رہا ہے۔

یو این آئی۔ ع ا۔

تہران ، ایران میں رہبر شہید کے جنازے کی تیاریاں عروج پر ہے ،شہیدِ ایران آغا” کے بینرز آویزاں کردیئے گئے۔

تفصیلات کے مطابق ایران کے دارالحکومت تہران کی سڑکوں پر رہبر شہید کے نمازِ جنازہ کے عالمی اجتماع کے لیے بڑے پیمانے پر تیاریاں شروع کر دی گئی ہیں اور پورے شہر میں تعزیتی و انقلابی بینرز آویزاں کر دیے گئے ہیں۔ تہران کی اہم شاہراہوں اور چوکوں پر لگائے گئے ان بینرز پر رہبر شہید کو ’’شہیدِ ایران آغا‘‘ کے معزز عنوان سے خراجِ عقیدت پیش کیا گیا ہے۔

اس تاریخی اور عالمی اجتماع کے لیے انتظامیہ اور عوامی حلقوں کی جانب سے ایک خصوصی اور باقاعدہ مرکزی نعرہ بھی جاری کیا گیا ہے۔ جنازے کے اس بڑے اجتماع کے لیے مخصوص کیا گیا نعرہ ’’باید برخاست‘‘ (ہمیں اٹھنا ہوگا) مقرر کیا گیا ہے۔ تہران کی سڑکوں پر آویزاں بینرز پر اس نعرے کی تشریح کرتے ہوئے واضح پیغام درج کیا گیا ہے کہ “ہر صورت ہمیں کھڑے ہونا ہوگا اور ڈٹ جانا ہوگا”۔

تہران میں اس وقت فضا انتہائی سوگوار ہے اور دنیا بھر سے لاکھوں عقیدت مندوں کی آمد کا سلسلہ متوقع ہے جو اس تاریخی جنازے میں شرکت کریں گے۔

یو این آئی۔ ع ا۔

پیرس، یورپی ممالک شدید گرمی کی زد میں ہیں، فرانس میں پارہ 43 ڈگری سیلسیس کو چھو گیا، شدید گرمی کے دوران غیر محفوظ مقامات پر نہاتے ہوئے کم از کم 40 افراد ڈوب کر ہلاک ہو گئے۔

فرانس میں پیر اور منگل کی درمیانی شب ملکی تاریخ کی سب سے گرم رات ریکارڈ کی گئی، اسی دوران فرانسیسی وزیرِ اعظم سباسٹین لیکرنو نے بتایا کہ 18 جون کے بعد سے ملک بھر میں شدید گرمی سے بچنے کی کوشش کرتے ہوئے 40 افراد ڈوب کر ہلاک ہو چکے ہیں، جن میں اکثریت نوجوانوں کی ہے۔

وزیر اعظم نے اموات کو ایک افسوسناک آفت قرار دیا اور کہا یہ اس بحران کے پہلے متاثرین ہیں جس کا ہم سامنا کر رہے ہیں۔ فرانسیسی محکمۂ موسمیات کے مطابق، ملک کے جنوب مغربی علاقے میں منگل کو درجۂ حرارت 43 ڈگری سینٹی گریڈ (109 فارن ہائیٹ) تک پہنچ گیا تھا۔ فرانس میں ایئر کنڈیشننگ کا استعمال وسیع پیمانے پر رائج نہیں ہے، جس کی وجہ سے ریکارڈ توڑ گرمی نے معمولاتِ زندگی کو بری طرح متاثر کیا ہے۔

شدید درجۂ حرارت کے باعث متعدد اسکول بند کر دیے گئے، مختلف تقریبات منسوخ کرنی پڑیں اور ریل سروس بھی متاثر ہوئی۔ حکام کے مطابق 800 سے زائد اسکول بند کر دیے گئے ہیں، شدید گرمی کے سبب پیرس کا ایفل ٹاور بھی بند کر دیا گیا ہے۔ مقامی حکام کے مطابق جنوب مشرقی فرانس کے شہر کارپنٹراس میں 2 اور 4 سال عمر کے 2 بچے اپنے گھر کے باہر ایک گاڑی میں بے ہوش پائے گئے اور بعد ازاں ان کی موت واقع ہو گئی۔

حکام کا کہنا ہے کہ اس کی سب سے ممکنہ وجہ شدید گرمی تھی۔ اسی طرح بورڈوکس کے علاقے میں 80 اور 95 سال عمر کے 3 افراد گرمی سے متعلق طبی پیچیدگیوں کے باعث جان کی بازی ہار گئے۔ خیال رہے کہ برطانیہ میں ریڈ وارننگ جاری کر دی گئی ہے، انگلینڈ اور ویلز میں 300 سے زائد اسکول بند کیے گئے ہیں، پنکھوں کی فروخت بڑھ گئی ہے، اسپین، اٹلی اور بلیجیئم میں بھی شدید گرمی کی وارننگ جاری کی گئی ہے۔

یو این آئی۔ ع ا۔