لندن،عالمی منڈی میں خام تیل کی قیمتوں میں مزید 2 فیصد کمی ریکارڈ کی گئی ہے جبکہ برینٹ کروڈ حالیہ مہینوں کی کم ترین سطح پر آ گیا۔

عالمی منڈی میں خام تیل کی قیمتوں میں گراوٹ کا سلسلہ جاری ہے اور تازہ ترین تجارتی سیشن کے دوران تیل کی قیمتوں میں مزید 2 فیصد کمی ریکارڈ کی گئی ہے۔ اس کمی کے بعد برینٹ خام تیل کی قیمت کم ہو کر 77 ڈالر فی بیرل کی سطح پر آ گئی ہے۔

رپورٹ کے مطابق عالمی مارکیٹ میں امریکی خام تیل (ڈبلیو ٹی آئی) کی قیمت بھی کم ہو کر 73 ڈالر فی بیرل جبکہ متحدہ عرب امارات کا مربن خام تیل 69 ڈالر فی بیرل میں فروخت ہو رہا ہے۔

معاشی ماہرین کے مطابق امریکہ اور ایران کے درمیان جنگ کے آغاز کے بعد سے اب تک عالمی منڈی میں برینٹ خام تیل کی یہ سب سے کم ترین سطح ہے۔ قیمتوں میں اس نمایاں کمی کی وجہ عالمی سطح پر تیل کی طلب میں کمی اور سپلائی کی صورتحال میں بہتری کو قرار دیا جا رہا ہے۔

یو این آئی۔ ع ا۔

واشنگٹن، امریکی وزیرخارجہ مارکو روبیو نے کہا کہ آبنائے ہرمز پر کوئی ملک ٹول یا فیس عائد نہیں کرسکتا۔

ایران اور امریکہ کے درمیان ممکنہ معاہدے پر خلیجی اتحادیوں کو اعتماد میں لینے کے لیے امریکی وزیرِ خارجہ مارکو روبیو متحدہ عرب امارات کے دارالحکومت ابوظہبی پہنچ گئے ہیں۔ امریکی میڈیا کے مطابق اس دورے کے دوران امریکہ کی جانب سے خلیجی ممالک کو نئی سکیورٹی یقین دہانیاں کرائے جانے کا قوی امکان ہے۔

ابوظہبی پہنچنے پر صحافیوں سے گفتگو کرتے ہوئے امریکی وزیرِ خارجہ مارکو روبیو نے آبنائے ہرمز کے حوالے سے امریکی مؤقف کو دہراتے ہوئے کہا کہ آبنائے ہرمز ایک بین الاقوامی آبی گزرگاہ ہے اور عالمی قوانین کے مطابق کسی بھی ملک کو اس اہم تجارتی راستے پر کوئی ٹول یا فیس عائد کرنے کی اجازت نہیں دی جا سکتی۔

انہوں نے واضح کیا کہ عالمی آبی راستے پر کسی قسم کا ٹیکس یا فیس لگانا بین الاقوامی قانون کی کھلی خلاف ورزی ہے اور خطے کے تمام ممالک اس معاملے پر امریکہ کے مؤقف سے مکمل اتفاق کرتے ہیں۔

ایرانی سیاست پر بات کرتے ہوئے مارکو روبیو نے کہا کہ ایران کو اب ایک انقلابی تحریک کے بجائے ایک ذمہ دار ریاست کے طور پر کام کرنا ہو گا۔ اگر ایران ایک عام ریاست کے طور پر طرزِ عمل اختیار کرے تو اس کے لیے بڑی ترقی کے مواقع موجود ہیں، تاہم جب تک خطے میں ایرانی پراکسیز حملے کرتے رہیں گے، تب تک کشیدگی کا خاتمہ ممکن نہیں ہو سکتا۔

امریکی وزیرِ خارجہ نے مزید کہا کہ عراق کی سرزمین سے ہونے والے میزائل اور ڈرون حملے علاقائی امن و سلامتی کے لیے ایک بڑا خطرہ ہیں۔ ان کا کہنا تھا کہ عراق میں بھی حماس اور حزب اللہ جیسے گروہ دہشت گردی کی کارروائیوں میں ملوث ہیں اور امریکہ-ایران مذاکرات میں یہ موضوع بھی بہت جلد زیرِ بحث لایا جائے گا۔

واضح رہے کہ امریکی وزیرِ خارجہ کا یہ بیان عمان اور ایران کے اس مشترکہ اعلامیے کے بعد سامنے آیا ہے، جس میں دونوں ممالک نے کہا تھا کہ وہ آبنائے ہرمز کے مستقبل کے انتظام اور وہاں فراہم کی جانے والی خدمات کے عوض بحری جہازوں سے وصول کی جانے والی فیس کا جائزہ لیں گے۔

یو این آئی۔ ع ا۔

پیرس، یورپی ممالک شدید گرمی کی زد میں ہیں، فرانس میں پارہ 43 ڈگری سیلسیس کو چھو گیا، شدید گرمی کے دوران غیر محفوظ مقامات پر نہاتے ہوئے کم از کم 40 افراد ڈوب کر ہلاک ہو گئے۔

فرانس میں پیر اور منگل کی درمیانی شب ملکی تاریخ کی سب سے گرم رات ریکارڈ کی گئی، اسی دوران فرانسیسی وزیرِ اعظم سباسٹین لیکرنو نے بتایا کہ 18 جون کے بعد سے ملک بھر میں شدید گرمی سے بچنے کی کوشش کرتے ہوئے 40 افراد ڈوب کر ہلاک ہو چکے ہیں، جن میں اکثریت نوجوانوں کی ہے۔

وزیر اعظم نے اموات کو ایک افسوسناک آفت قرار دیا اور کہا یہ اس بحران کے پہلے متاثرین ہیں جس کا ہم سامنا کر رہے ہیں۔ فرانسیسی محکمۂ موسمیات کے مطابق، ملک کے جنوب مغربی علاقے میں منگل کو درجۂ حرارت 43 ڈگری سینٹی گریڈ (109 فارن ہائیٹ) تک پہنچ گیا تھا۔ فرانس میں ایئر کنڈیشننگ کا استعمال وسیع پیمانے پر رائج نہیں ہے، جس کی وجہ سے ریکارڈ توڑ گرمی نے معمولاتِ زندگی کو بری طرح متاثر کیا ہے۔

شدید درجۂ حرارت کے باعث متعدد اسکول بند کر دیے گئے، مختلف تقریبات منسوخ کرنی پڑیں اور ریل سروس بھی متاثر ہوئی۔ حکام کے مطابق 800 سے زائد اسکول بند کر دیے گئے ہیں، شدید گرمی کے سبب پیرس کا ایفل ٹاور بھی بند کر دیا گیا ہے۔ مقامی حکام کے مطابق جنوب مشرقی فرانس کے شہر کارپنٹراس میں 2 اور 4 سال عمر کے 2 بچے اپنے گھر کے باہر ایک گاڑی میں بے ہوش پائے گئے اور بعد ازاں ان کی موت واقع ہو گئی۔

حکام کا کہنا ہے کہ اس کی سب سے ممکنہ وجہ شدید گرمی تھی۔ اسی طرح بورڈوکس کے علاقے میں 80 اور 95 سال عمر کے 3 افراد گرمی سے متعلق طبی پیچیدگیوں کے باعث جان کی بازی ہار گئے۔ خیال رہے کہ برطانیہ میں ریڈ وارننگ جاری کر دی گئی ہے، انگلینڈ اور ویلز میں 300 سے زائد اسکول بند کیے گئے ہیں، پنکھوں کی فروخت بڑھ گئی ہے، اسپین، اٹلی اور بلیجیئم میں بھی شدید گرمی کی وارننگ جاری کی گئی ہے۔

یو این آئی۔ ع ا۔