سرینگر، پٹن، بارہمولہ میں جمعرات کو “شامِ شفقت” کے عنوان سے ایک رنگا رنگ ثقافتی میلہ منعقد کیا گیا، جس میں ہندوستان کے بھرپور اور متنوع ثقافتی ورثے کا جشن منایا گیا۔

سرکاری بیان کے مطابق اس میلے کا مشترکہ طور پر نارتھ زون کلچرل سینٹر، وزارتِ ثقافت، حکومتِ ہند، اور ہندوستانی فوج نے انعقاد کیا۔ اس موقع پر پنجاب، راجستھان، گجرات، مہاراشٹر، منی پور اور اڈیشہ کے معروف فنکاروں نے اپنی شاندار پرفارمنس کے ذریعے حاضرین کو محظوظ کیا اور ہندوستان کی لوک روایات کی گہرائی اور تنوع کو اجاگر کیا۔

پورے دن جاری رہنے والے اس پروگرام میں لوک رقص، روایتی موسیقی اور ملک کے مختلف علاقوں کی ثقافتی جھلکیاں پیش کی گئیں۔ ہر پرفارمنس نے اپنے علاقے کی منفرد ثقافتی شناخت کو نمایاں کیا، جبکہ مجموعی طور پر “اتحاد میں تنوع” کے ہندوستانی تصور کی عکاسی کی۔

فنکاروں کی پُرجوش پیشکشوں نے جشن کا سماں باندھ دیا اور حاضرین میں حب الوطنی اور قومی فخر کے جذبات کو فروغ دیا۔

منتظمین کے مطابق اس میلے کا مقصد ہندوستان کے ثقافتی ورثے کو محفوظ، فروغ اور مقبول بنانا تھا، ساتھ ہی شمالی کشمیر کے نوجوانوں اور ملک کے دیگر حصوں کے درمیان ثقافتی روابط کو مضبوط کرنا بھی اس کا اہم ہدف تھا۔

اس تقریب میں شمالی کشمیر کے طلبہ اور سول سوسائٹی کے ارکان نے بڑی تعداد میں شرکت کی۔ حاضرین نے بھرپور تالیوں کے ذریعے اس اقدام اور اس کے ثقافتی یکجہتی اور قومی اتحاد کے پیغام کو سراہا۔

یواین آئی۔ ظ ا

جموں، مرکزی وزیر ڈاکٹر جتیندر سنگھ نے جمعرات کو کہا کہ شاہ پور کنڈی منصوبہ جموں و کشمیر اور پنجاب کے سرحدی اضلاع میں آبپاشی کی سہولیات اور زرعی ترقی کو فروغ دے کر ان علاقوں کی تقدیر بدلنے والا ہے۔

ڈاکٹر سنگھ نے سوشل میڈیا پلیٹ فارم ایکس پر ایک پوسٹ میں کہاکہ “یہ بات واضح ہے کہ شاہ پور کنڈی منصوبہ بہتر آبپاشی اور زرعی ترقی کے ذریعے جموں و کشمیر اور پنجاب کے سرحدی اضلاع میں انقلابی تبدیلی لائے گا۔”

انہوں نے مزید کہا کہ یہ منصوبہ اب تقریباً مکمل ہو چکا ہے اور اس کی تکمیل علاقے کے عوام کی کئی دہائیوں پرانی خواہش کی تکمیل ہے۔

انہوں نے لکھا کہ ضلع کٹھوعہ کی سرحد پر واقع شاہ پور کنڈی قومی منصوبہ ایک اہم داستان رکھتا ہے۔ 1960 کے معاہدۂ سندھ طاس کے بعد ہندوستان کے حصے میں تین دریا راوی، بیاس اور ستلج آئے تھے، جن میں دریائے راوی سب سے بڑا تھا۔

1970 کی دہائی کے آخر میں دریائے راوی پر ایک قومی منصوبے کا تصور پیش کیا گیا تاکہ ہندوستان کے حصے کا پانی پاکستان میں بہنے کے بجائے ہندوستان کے اندر استعمال کیا جا سکے۔

ڈاکٹر سنگھ نے مزید کہا کہ 1984 میں اس منصوبے کا سنگِ بنیاد اس وقت کی وزیر اعظم اندرا گاندھی نے رکھا تھا، لیکن چند ماہ بعد ان کے قتل کے بعد یہ منصوبہ پس منظر میں چلا گیا اور بعد کی مرکزی و ریاستی حکومتوں نے بھی اس پر خاطر خواہ توجہ نہیں دی۔

انہوں نے کہا کہ تقریباً تین دہائیوں بعد، جب 2014 میں بھارتیہ جنتا پارٹی کی حکومت اقتدار میں آئی تو اس منصوبے کو دوبارہ شروع کرنے کی کوششیں کی گئیں۔ جموں و کشمیر اور پنجاب کے چیف سیکریٹریوں کو اس عمل میں شامل کیا گیا، نئے دستاویزات تیار کیے گئے اور فروری 2019 میں جموں میں ایک عوامی جلسے کے دوران وزیر اعظم نریندر مودی نے اس منصوبے کی بحالی کا اعلان کیا۔

یواین آئی۔ ظ ا

سرینگر، پیپلز ڈیموکریٹک پارٹی (پی ڈی پی) کی صدر اور جموں و کشمیر کی سابق وزیر اعلیٰ محبوبہ مفتی نے جمعرات کو کشمیری عوام سے اپیل کی کہ وہ سالانہ امرناتھ یاترا پر آنے والے یاتریوں کا گرمجوشی اور مہمان نوازی سے استقبال کریں۔

انہوں نے کہا کہ یہ یاترا کشمیر اور ملک کے دیگر حصوں کے درمیان تعلقات کو مضبوط بنانے کا ایک اہم موقع فراہم کرتی ہے۔

ضلع گاندربل کے سونمرگ کے دورے کے دوران محبوبہ مفتی نے مقامی متعلقہ فریقوں سے ملاقات کی اور یاترا کے دوران درپیش مسائل اور چیلنجز کے بارے میں ان کے تحفظات سنے۔

انہوں نے پہلگام میں دیے گئے اپنے سابقہ پیغام کو دہراتے ہوئے کہا کہ یاترا کی حفاظت اور اس کے پُرامن انعقاد کو یقینی بنانا صرف سیکیورٹی اداروں کی ذمہ داری نہیں ہے۔

انہوں نے کہاکہ “امرناتھ یاترا کی حفاظت صرف سیکیورٹی ایجنسیوں کی ذمہ داری نہیں بلکہ کشمیر کے عوام کی اجتماعی ذمہ داری بھی ہے۔”

پی ڈی پی سربراہ نے تمام متعلقہ فریقوں پر زور دیا کہ وہ اس بات کو یقینی بنائیں کہ ہر یاتری کشمیر میں اپنے قیام کے دوران خود کو خوش آمدید، باعزت اور محفوظ محسوس کرے۔

انہوں نے کہاکہ “ہمیں یہ یقینی بنانا چاہیے کہ ہر زائر کشمیر کی مہمان نوازی، محبت اور انسان دوستی کا سفیر بن کر اپنے گھر واپس جائے۔”

محبوبہ مفتی نے یاترا کو ملک کے مختلف علاقوں کے لوگوں کے درمیان ایک پل قرار دیتے ہوئے کہاکہ “یہ یاترا ہمیں پورے بھارت کے لوگوں سے جڑنے کا موقع فراہم کرتی ہے۔ ہماری مہمان نوازی، شفقت اور ہمدردی ہی تعصب اور بداعتمادی کا بہترین جواب ہونی چاہیے۔”

انہوں نے کہا کہ سالانہ یاترا کشمیریوں کو یہ موقع فراہم کرتی ہے کہ وہ بقائے باہمی اور فرقہ وارانہ ہم آہنگی کی ان روایات کو اجاگر کریں جو طویل عرصے سے اس خطے کی شناخت رہی ہیں۔

انہوں نے مزید کہاکہ “کشمیر آنے والا ہر زائر یہاں سے ہمارے اقدار، ہمارے عقیدے اور ہمارے لوگوں کے بارے میں بہتر فہم لے کر جائے۔ یہ ہمارے لیے اسلام اور کشمیر کی حقیقی روح کو دنیا کے سامنے پیش کرنے کا موقع ہے۔”

امرناتھ یاترا 3 جولائی سے پہلگام اور بالتال کے دو راستوں سے شروع ہونے والی ہے، جس کے لیے انتظامیہ اور سیکیورٹی اداروں کی جانب سے وسیع پیمانے پر تیاریاں کی جا رہی ہیں۔

یواین آئی۔ ظ ا