تحریر:عبدالحکیم کشمیری:

وزیراعظم فاروق حیدر نے چند دن قبل اپنی ایک تقریر میں ایکٹ 74کے حوالے سےپاکستان زیر انتظام کشمیر کے تین سابق سیاستدانوں ،سردار ابراہیم، کے ایچ خورشید اور سردار عبدالقیوم کے بارے میں کہا کہ میرا جی چاہتا ہے کہ ”میں تمہاری قبروں پر جاکر سوٹیاں (لاٹھیاں) ماروں کہ تم نے ہمیں ایکٹ 74دیا“
فاروق حیدر کے اس بیان پرپاکستان زیر انتظام کشمیر بھر میں رد عمل دیکھنے میں آیا تاہم یہ رد عمل مخالفت برائے مخالفت کا ہے۔۔۔ خیال یہ تھا، دلیل سامنے آئے گی اور اس دلیل کی روشنی میں حقائق بھی سامنے آئیں گے اور بحیثیت کشمیری قوم ہم یا ہمارے سیاستدان اپنا محاسبہ کرتے ہوئے ماضی کے برعکس بہتر مستقبل کا تعین کرنے کی کوشش کریں گے، پہلی بات یہ کہ فاروق حیدر نے کو کچھ کہا کہ وہ غلط یا درست اس حوالے سے ہر دو مکتبہ فکر کی اپنی رائے ہے لیکن دوسری اہم بات یہ کہ فاروق حیدر ماضی میں اسی مسلم کانفرنس کا حصہ رہے جس کی اس وقت کی مرکزی قیادت نے ایکٹ 74قبول کیا۔۔۔۔

1985سے لے کر 2010تک 25سال پر مشتمل پارلیمانی نظام میں سے کم و بیش 17سال مسلم کانفرنس اقتدار میں رہی ،فاروق حیدر نے کبھی بھی اس پر بات نہیں کی، ہاں انہوں نے کشمیر کونسل کے خاتمے کی بات 2009میں ضرور کی لیکن ایکٹ 74کے ذمہ داران کے لیے ان کا یہ لب و لہجہ پہلی مرتبہ دیکھنے میں آیا، فاروق حیدر اپنی بات مناسب الفاظ میں بھی کر سکتے تھے لیکن انہوں نے قبروں پر سوٹیاں مارنے کی بات کر کے خود براہ راست سوٹی ماردی جس پر رد عمل آنا فطرتی بات ہے۔۔۔۔
ویسے بھی 1947کے بعد پاکستان زیر انتظام کشمیرکے سیاستدانوں نے اتنی غلطیاں کیں جن کی گنتی مشکل ہے ، فاروق حیدر بحیثیت وزیراعظم آج بھی وہی غلطیاں کر رہے ہیں ،جن پر وہ سابق سیاستدانوں کی قبروں پر سوٹیاں مارنے کی خواہش رکھتے ہیں۔
ایکٹ 74مسلط ہوا۔۔۔۔۔۔ فاروق حیدر کی بات مان لیتے ہیں۔ جنہوں نے اس ایکٹ کو قبول کیا۔۔۔۔بقول فاروق حیدر ایکٹ 74غلامی کی دستاویز ۔۔اس کو قبول کرنے والے قصور وار۔۔۔۔۔۔ ہم سب فاروق حیدر کے ساتھ کھڑے ہو جاتے ہیں اور ان سے پوچھتے ہیں کہ وہ 13ویں ترمیم میں اپنی پوزیشن واضح کریں ، کیا بجلی کا اختیار پاکستان زیر انتظام کشمیر کے پاس ہے؟؟ کیا کارپوریشنز پر ٹیکسز کا اختیار آزادکشمیر کے پاس ہے اگر ہے بھی تو کون سی کارپوریشنز پر؟ کیا کسٹم ڈیوٹیز حکومت پاکستان زیر انتظام کشمیر کے اختیار میں ہے؟ کیا لینٹ آفیسرز کی تعیناتی کا پینل حکومت پاکستان زیر انتظام کشمیر بھیج سکتی ہے؟ کیا ججز کی تقرری کا مکمل اختیار حکومت پاکستان زیر انتظام کشمیر کے پاس ہے؟ کیا الیکشن کمیشن کی تقرری کا اختیار حکومت پاکستان زیر انتظام کشمیر کے پاس ہے؟۔۔۔۔۔۔۔فاروق حیدر ایکٹ 74قبول کرنے والی قبروں پر سوٹیاں ضرور ماریں، لیکن یہ بتائیں کہ ان کے دور میں نیلم جہلم پراجیکٹ مکمل ہوتا ہے اور پاکستان زیر انتظام کشمیر سے معاہدہ کیے بغیر بجلی پیداوار کیسے شروع ہو گئی؟ فاروق حیدر نے جس دن کہا کہ کوہالہ پراجیکٹ پر کام شروع نہیں ہو گا اسی دن اسمبلی میں کوہالہ ہائیڈرل پراجیکٹ پر کام روکنے کے لیے قرار داد پیش ہوئی اور اسی دن کوہالہ ہائیڈرل پراجیکٹ کا سنگ بنیاد رکھا گیا ۔۔۔ ان ہی دو سال میں فاروق حیدر کی انتظامیہ نے کوہالہ پراجیکٹ کے لیے 594کنال جگہ ایوارڈ کی اور 1147کنال جگہ مزید ایوارڈ کرنے کے لیے فہرستیں مرتب ہو رہی ہیں ۔۔۔۔۔۔ یقینا اس سارے عمل سے فاروق حیدر کو اندازہ ہو جانا چاہیے کہ سردار ابراہیم ، کے ایچ خورشید اور سردار عبدالقیوم خان نے ایکٹ74کیوں قبول کیا؟کیا فاروق حیدر نہیں جانتے ایسے معاملات میں پاکستان زیر انتظام کشمیر کے سیاستدانوں سے زبردستی انگوٹھا لگوایا جاتا ہے اس کی وجہ یہ ہے کہ پاکستان زیر انتظام کشمیرکے سیاستدانوں کے درمیان سیاسی اختلافات ہمیشہ پاکستان زیر انتظام کشمیر کے اجتماعی مفادات سے طاقتور رہے اور جس کے نتائج ہمارے سامنے ہیں۔۔۔۔۔ معاہدہ کراچی کن حالات میں ہوا؟ کیا چوہدری غلام عباس کی طرف سے درج ذیل عبارت کہ ”مجھے اس معاہدے کی ان باتوں سے اتفاق ہے جو مسلم کانفرنس کے متعلقہ ہیں“لکھنے کے بعد دستخط کرنا ان کی بے بسی اور ”خوابوں کے محور و مرکز“ کا جبر ثابت نہیں کرتا۔

24اکتوبر 1947کی حکومت کے اعلامیہ کی روشنی میں پاکستان زیر انتظام کشمیر حکومت کے اختیارات اور آج کی پاکستان زیر انتظام کشمیر کی حکومت کے اختیارات میں جو فرق ہے اس کی ذمہ دار مسلم کانفرنس ہے۔1947سے لے کر2018تک 71سال کی اہم ترین شخصیات میں چوہدری غلام عباس، سردار ابراہیم خان، راجا حیدر خان، کے ایچ خورشید، سردار عبدالقیوم خان، سکندر حیات، سردار عتیق ،سلطان محمود، فاروق حیدر، چوہدری عبدالمجید شامل ہیں، 71سال میں 20سے 22سال کا عرصہ ایسا ہے جس میں سے 4دور حکومت مجموعی طور پر 14سال پیپلزپارٹی اور 5سال کے ایچ خورشید اقتدار میں رہے، اور 2سال کا عرصہ ن لیگ کا ہے،جبکہ باقی سارا عرصہ مسلم کانفرنس یا ان کے حمایت یافتہ لوگوں کا تھا ۔سو فاروق حیدر تین قبروں کے ساتھ ساتھ ان دیگر شخصیات کی قبروں کو اپنی فہرست میں شامل کریں۔۔۔۔اور ایک سوٹی مستقبل کی ضرورت کے پیش نظر کسی بینک لاکر میں رکھوا دیں ۔۔۔ نیلم جہلم اور کوہالہ پراجیکٹ میں آزادکشمیر کے لوگوں کے حقوق کے تحفظ میں ناکام ہونے والے کی قبر بھی تو سوٹیوں کی مستحق ہو گی۔

نوٹ: ادارہ کا ان کی رائے سے اتفاق ہونا ضروری نہیں