خبراردو:

ریاست میں رواں برس منعقد ہونے والے اسمبلی و پارلیمانی انتخابات پر گرما گرم بحث کے بیچ وزیر اعظم نریندر مودی، وزیرداخلہ راج ناتھ سنگھ اور بی جے پی کے قومی صدر امت شاہ نے ’ایک ملک،یکساں انتخابات‘ کے فارمولے کی تجویز پیش کی ہیں تاہم تینوں لیڈران کاماننا ہے کہ انتخابات کو ایک ساتھ منعقد کرانے کے حوالے سے حتمی رائے الیکشن کمیشن آف انڈیاہی لینے کا مجاز ہے۔ ادھر معلو م ہوا ہے کہ ریاست میں منعقد ہونے والے انتخابات سے متعلق بی جے پی کی اعلیٰ قیادت 20جنوری 2019کو سرمائی دارالحکومت جموں میں اہم نشست منعقد کررہی ہے جس میں اسمبلی و پارلیمانی انتخابات سے متعلق حتمی لائحہ عمل ترتیب دیا جائے گا۔

ریاست جموں وکشمیر میں رواں برس منعقد ہونے والے اسمبلی و پارلیمانی انتخابات پر جاری گرما گرم بحث کے بیچ وزیر اعظم نریندر مودی، وزیر داخلہ راج ناتھ سنگھ اور بی جے پی کے قومی صدر امت شاہ نے ملک بھر میں ’یکساں انتخابات ‘ کے فارمولے کی تجویز پیش کرتے ہوئے کہا ہے کہ ریاست جموں وکشمیر میں ایک ساتھ ہی اسمبلی و پارلیمانی انتخابات منعقد ہونے چاہیے۔ بی جے پی لیڈران نے تاہم واضح کیا ہے کہ الیکشن سے متعلق کوئی بھی فیصلہ چیف الیکشن کمیشن آف انڈیا کے دائرے اختیار میں آتا ہے اور وہ جو بھی فیصلہ لیں گے اُسے بسر وچشم قبول کیا جائے گا۔بی جے پی لیدران نے بتایا کہ ریاست میں جنگجوئیت کو مدنظر رکھتے ہوئے اسمبلی و پارلیمانی الیکشن کو ایک ساتھ منعقد کرانے کے لیے حتمی فیصلہ صرف الیکشن کمیشن آف انڈیا ہی لے سکتا ہے تاکہ دونوں انتخابات پرامن اور خوشگوار ماحول میں منعقد ہوں ۔پارٹی کے ریاستی شاخ سے وابستہ سینئر لیڈران جنہوں نے حال ہی میں پارٹی کی اعلیٰ قیادت سے ریاست میں منعقد ہونے والے اسمبلی و پارلیمانی انتخابات پر خصوصی تبادلہ خیال کیا ، کا کہنا ہے کہ مرکزی حکومت کے ساتھ ساتھ بی جے پی کی اعلیٰ قیادت کا مؤقف اس معاملے میں متفق علیہ ہے اور دونوں فریقین نے ریاست میں رواں سال منعقد ہونے والے اسمبلی و پارلیمانی انتخابات کو ایک ساتھ منعقد کرانے کے ،لیے تیار ہے۔انہوں نے بتایا کہ مرکزی حکومت اور بی جے پی کی اعلیٰ قیادت کا اس معاملے میں مؤقف یکساں ہے کہ ریاست میں دونوں انتخابات ایک ساتھ ہی کرائے جائیں ۔ یاد رہے ریاست جموں وکشمیر میں اسمبلی انتخابات مئی کے مہینے میں منعقد ہونے جارہے ہیں جس دوران علاقائی و قومی سیاسی پارٹیوں نے انتخابات میں اپنی کامیابی کو یقینی بنانے کی خاطر بڑے پیمانے پر سیاسی سرگرمیوں کا آغاز کردیا ہے۔

ادھر معلوم ہو اہے کہ بی جے پی کی اعلیٰ قیادت نے 20جنوری 2019کو ریاستی یونٹ سے وابستہ لیڈران کو جموں طلب کیا ہے جہاں پارٹی کی اعلیٰ قیادت مقامی لیڈران کے ساتھ اسمبلی و پارلیمانی انتخابات سے متعلق آگے کا لائحہ عمل وضع کرے گی۔ذرائع نے کشمیر نیوز سروس کو بتایا کہ پارٹی کی مرکزی و ریاستی لیڈرشپ جموں میں منعقد ہونے والی نشست میں مل بیٹھ کر دونوں انتخابات سے متعلق خصوصی سٹریٹجی ترتیب دے گی تاکہ پارٹی جموں کے ساتھ ساتھ گرمائی دارالحکومت کشمیر میں بھی اپنا کھاتہ کھول کر بیشتر نشستوں پر جیت درج کرپائے۔انہوں نے بتایا کہ نشست میں وادی کشمیر کے جنوبی صوبوں پر خصوصی توجہ مرکوز رہے گی جہاں پارٹی نے گزشتہ برس منعقد ہوئے پنچایتی انتخابات میں بیشتر نشستوں پر جیت درج کرکے علاقائی سیاسی پارٹیوں کو ورطہ حیرت میں ڈال دیا۔

ذرائع سے معلوم ہوا ہے کہ الیکشن سے متعلق جمو ں میں منعقد ہونے والی میٹنگ میں پارٹی کے جنرل سیکرٹری شام لعل کے علاوہ پارٹی کے قومی جنرل سیکرٹری رام مادھو اور کشمیر اُمور کے ماہر اویناش رائے کھنہ 20جنوری کو جموں پہنچ رہے ہیں جہاں پارٹی کی مرکزی لیڈرشپ مقامی لیڈران کے ساتھ اسمبلی و پارلیمانی انتخابات سے متعلق انتظامات کو حتمی شکل دیں گے۔ میٹنگ کے دوران پارٹی لیڈران وزیر اعظم نریندر مودی کے دورہ جموں سے متعلق بھی تیاریوں کا جائزہ لیں گے۔ پارٹی کے اندرون ذرائع نے بتایا کہ وزیر اعظم نریندر مودی 3فروری کو سرمائی دارالحکومت جموں کا دورہ کررہے ہیں جس دوران وہ وجے پور میں کئی اہم تعمیراتی پروجیکٹوں کا سنگ بنیاد رکھنے کے ساتھ ساتھ ایک عوامی ریلی سے بھی خطاب کریں گے۔ پارٹی ذرائع کا کہنا ہے کہ وجے پور کی ریلی جہاں وزیر اعظم نریندر مودی عوام سے خطاب کریں گے کو پارٹی کی ریاستی لیڈر شب انتخابی کارڈ کے بطوراستعمال کرے گی اور اس روز ریاست میں بی جے پی کی افرادی قوت کا بھی بھر پور اظہار ہوگا۔پارٹی لیڈران نے بتایا کہ وزیر اعظم نریندر مودی، وزیر داخلہ راج ناتھ سنگھ اور پارٹی صدر امت شاہ کا یہ ابتدا سے مؤقف رہا ہے کہ ریاست جموں وکشمیر میں اسمبلی اور لوک سبھا انتخابات ایک ساتھ منعقد ہونے چاہیے۔

انہوں نے بتایا کہ پارٹی مجموعی طور پر وزیر اعظم کے ’اک ملک، یکساں انتخابات‘ کے فارمولے کی مکمل حمایت کرتی ہے تاہم بی جے پی کا ماننا ہے کہ وہ الیکشن کمیشن آف انڈیا کے اختیارات میں مداخلت نہیں کرے گی۔ انہوں نے بتایا کہ پارٹی الیکشن کمیشن آف انڈیا کے کام میں کبھی بھی مداخلت کی مرتکب نہیں ہوگی اور کمیشن کا جو بھی فیصلہ سامنے آئے گا وہ پارٹی کو قابل قبول ہوگا۔انہوں نے بتایا کہ الیکشن کمیشن آف انڈیا ریاستی انتظامیہ اور اپنے ماتحت عملے کے ساتھ انتخابات سے متعلق بھر پور صلاح و مشورہ کرکے ہی کوئی فیصلہ کرے گا اور اُس فیصلے کی پارٹی دل سے تائید کرے گی۔واضح رہے وزیر داخلہ راج ناتھ سنگھ نے پارلیمنٹ کے دونوں ایوانوں میں اس بات کو واضح کیا ہے کہ الیکشن کمیشن آف انڈیا کو ریاست جموں وکشمیر میں اسمبلی و پارلیمانی انتخابات کو ایک ساتھ منعقد کرانے کی خاطر جو بھی درکار ہوگا ، مرکزی حکومت اس سلسلے میں کمیشن کو بھر پور تعاون فراہم کرے گی۔