لائن آف کنٹرول پر جنگ کا سماں
آرٹلری توپوں کا استعمال، آر پارفوجی اہلکار سمیت متعدد افراد ہلاک،کئی زخمی،لوگوں میں خوف وہراس

سرینگر: لائن آف کنٹرول(ایل او سی)پرگذشتہ کئی ماہ سے جاری کشیدگی اور تناؤ کے بیچ ہند۔پاک افواج کے درمیان گذشتہ36گھنٹوں سے جاری فائر نگ و آتشی گولہ باری کے نتیجے میں آر پار ایک فوجی اہلکار سمیت متعدد افراد ہلاک اور کئی زخمی ہوئے۔برصغیر کی دو ایٹمی طاقتوں کی افواج کے درمیان جاری شدید گولہ باری کے نتیجے میں لائن آف کنٹرول پر جنگ جیسی صورتحال پیدا ہوگئی ہے جبکہ آرپار سرحدی علاقوں میں رہا ئش پذیر لوگوں میں خوف وہراس کی لہر دوڑ گئی ہے،کئی کنبوں کو محفوظ مقامات پر منتقل کیا گیا۔

جموں میں مقیم دفاعی ترجمان لیفٹیننٹ کرنل دویندر آنندنے کہا کہ پاکستانی فوج نے پونچھ میں کئی سیکٹروں میں سیز فائر معاہدے کی خلاف ورزی کرتے ہوئے بھارتی فوج کی اگلی چوکیوں کیساتھ ساتھ آبادی والے علاقوں کو نشانہ بنا کر فائرنگ کی اور ماٹر گولے داغے،جسکے نتیجے میں ایک فوجی اہلکار ازجان ہوا جبکہ فوج نے سیز فائر معاہدے کی خلاف ورزی کا معقول جواب دیا۔

کشمیر نیوز سروس(کے این ایس) کے مطابق دفعہ370کی تنسیخ کے فیصلے کے بعد سے لائن آف کنٹرول پر کافی کشیدگی اور تناؤ کی صورتحال پائی جارہی ہے جبکہ برصغیر کی دو ایٹمی طاقتوں کی افواج لائن آف کنٹرول (ایل او سی) پر آمنے سامنے ہے۔گذشتہ38گھنٹوں سے جموں کے ضلع پونچھ میں کئی سیکٹروں جن میں بالا کوٹ،مینڈ ھر وغیرہ شامل ہے،میں ہند۔پاک کی افواج ایکدوسرے خلاف جنگی ہتھیاروں کا استعمال کررہی ہیں۔

طرفین کے مابین وقفے وقفے سے جاری فائر نگ اور ماٹر شلنگ کے نتیجے میں دونوں اطراف جانی نقصان کی اطلاعات ہیں جبکہ دونوں ممالک کی افواج ایکدوسرے پر جنگ بندی معاہدے کی خلاف ورزی کا الزام عائد کررہی ہیں۔طرفین کے مابین تازہ گولہ باری کا تبادلہ ضلع پونچھ کے بالا کوٹ اور مینڈھر پونچھ سیکٹروں میں ہوا ہے۔ جموں میں مقیم دفاعی ترجمان لیفٹیننٹ کرنل دویندر آنند نے بتایا کہ پونچھ سیکٹر میں سنیچر کی شام پاکستانی فوج نے سیز فائر سمجھوتے کی خلاف ورزی کرتے ہوئے بھارتی فوج کی اگلی چوکیوں کو نشانہ بنانے کی غرض سے فائر نگ کی اور ماٹر گولے داغے۔

ان کا کہناتھا کہ سیز فائر سمجھوتے کی خلاف ورزی کے نتیجے میں فوج کا ایک اہلکار نایک راجیو سنگھ شکھا وت ازاجان ہوا۔ان کا کہناتھا’36سالہ مہلوک فوجی لکھانا خرد جئے پور راجستھان سے تعلق رکھتا تھا۔دفاعی ترجمان نے قوم اپنے بہادر سپوتوں کی قربانیوں کو ہمیشہ یاد رکھے گا۔ ادھر معلوم ہوا ہے کہ فائر اور ماٹر شلنگ میں متعدد فوجی اہلکار زخمی ہوئے،جنہیں اسپتال منتقل کیا گیا۔اس دوران ملنے والی اطلاعات کے مطابق اتوار کو بھی پونچھ میں لائن آف کنٹرول پر شدید اور خوفناک مارٹر شلنگ کا سلسلہ جاری رہا۔

دفاعی ترجمان نے بتایا کہ 12بجکر50منٹ دوپہر پاکستانی فوج نے ایک مرتبہ پھر بالاکوٹ کے بعد مینڈھر سیکٹر میں شدید گولہ باری کی۔ان کا کہناتھا کہ پاکستانی فوج کی جانب سے کی گئی جنگ بندی معاہدے کی خلاف ورزی کا بھرپور جواب دیا گیا،جسکے نتیجے میں پاکستانی فوج کو جانی ومالی نقصان کا سامنا کرنا پڑا۔ادھر آتشی گولہ باری کے نتیجے میں سرحدی دیہات میں رہائش پذیر لوگوں میں خوف وہراس کی لہر دوڑ گئی۔کئی کنبوں کو محفوظ مقامات پر منتقل بھی کیا گیا۔اطلاعات کے مطابق سرحدی آبادی کا کہنا ہے کہ پونچھ میں اس وقت جنگ جیسی صورتحال پائی جارہی ہے،کیونکہ دونوں اطراف سے گولہ باری کا سلسلہ وقفے وقفے سے جاری رہے۔

معلوم ہوا ہے کہ مینڈ ھر سیکٹر میں فوج نے کئی دیہات میں تلاشی آپریشن بھی شروع کیا ہے۔ذرائع کا کہنا ہے کہ فوج کو خدشہ ہے کہ گولہ باری کی آر میں عسکریت پسند داخل ہوئے ہیں جنکی تلاش میں یہ آپریشن شروع کیا گیا۔ذرائع نے بتایا کہ فوج نے مینڈ سیکٹر میں وسیع علاقے کو محاصرے میں لیکر تلاشی کارروائی شروع کی ہے،جو آخری اطلاعات ملنے تک جاری تھی۔ادھر پاکستانی میڈیا رپورٹس کے مطابق بھارتی فوج نے لائن آف کنٹرول (ایل او سی) پر فائرنگ کی جسکے نتیجے میں پاکستانی زیر انتظام کشمیر کے چری کوٹ سیکٹر میں ایک شہری ہلاک اور ایک خاتون زخمی ہوگئیں۔

میڈیا رپورٹس میں بتایا گیا ہے کہ بھارتی فوج نے آرٹلری اور مارٹر فائر کئے جس کے نتیجے میں کاکوٹا گاؤں کے رہائشی میر محمد ہلاک اور ایک خاتون زخمی ہوئیں،جسے فوری طور پر قریبی طبی مرکز منتقل کیا گیا۔میڈیا رپورٹس کے مطابق مقامی انتظامیہ کا کہنا تھا ہلاک ہونے والا شہری پاکستانی فوج سے ریٹائرڈ تھے جبکہ زخمیوں کی تعداد 4 ہے، جن میں سے ایک جاں بحق شہری کی بیٹی ہیں۔ان کا کہنا تھا کہ بھارتی فوج نے ضلع پونچھ کی تحصیل عباس پور پر سہ پہر 3 بجے فائرنگ شروع کی تھی اور یہ سلسلہ شام گئے تک جاری رہا۔

ادھر پاکستانی ترجمان دفتر خارجہ عائشہ فاروقی کے مطابق ایل او سی پر بھارتی فوج کی فائرنگ پر پاکستان میں بھارتی ہائی کمیشن کے ناظم الامور گورو اہلووالیا کو دفتر خارجہ میں طلب کیا گیا اور احتجاج ریکارڈ کروا دیا گیا۔خیال رہے کہ ایل او سی پر جنگ بندی کیلئے2003 میں دونوں ممالک کی افواج کی جانب سے ایک معاہدے پر دستخط کیے گئے تھے۔تاہم اس کے باوجود طرفین کے مابین گولہ باری کا تبادلہ وقفے وقفے سے جاری ہے۔(کے این ایس)