ناناکی موت، 3 سالہ معصوم نواسہ معجزیاتی طور محفوظ رہا
گاڑی سے اتا ر کر قتل کیا گیا:لواحقین، الزاما ت بے بنیاد فورسز نے بچے کو بچالیا:پولیس
خبراردو:-

سرینگر کے مضافاتی علاقہ مصطفےٰ کالونی ایچ ایم ٹی کی فضا ؤں میں رقت آمیز چیخ وپکار گونج رہی ہے۔’سوپور کراس فائرنگ‘ واقعہ کی دردناک تصاویر جب سوشل میڈیا پر وائرل ہوئیں،جس میں خون میں لت پت65سالہ شہری کی نعش سر راہ پڑی ہے اور اس کا3سالہ نواسہ قریب ہی خون کے آنسو بہارہا ہے،توقسمت اور بد قسمتی کا پہلو بھی سامنے آیا۔

کشمیر نیوز سروس کے مطابق سرینگر کے مضافاتی علاقہ مصطفےٰ کالونی ایچ ایم ٹی میں رہائش پذیر خان خاندان کے سر پر غموں کا پہاڑ ٹوٹ پڑا جب اُنہیں یہ خبر ملی بشیر احمد خان ماڈل ٹاؤن سوپور فائرنگ واقعہ میں جاں بحق ہوا۔بدھ کی صبح سات اور ساڑھے سات بجے کے درمیان ماڈل ٹاؤن سوپور میں سی آر پی ایف پارٹی پر جنگجوؤں نے فائرنگ کی،جوابی کارروائی میں فورسز نے بھی فائرنگ کی۔

طرفین کے مابین گولیوں کے تبادلے کے دوران پیشہ سے ٹھیکیدار 65سالہ بشیر احمد خان ساکنہ مصطفےٰ کالونی ایچ ایم ٹی اپنے 3سالہ نواسہ عیاد کیساتھ ذاتی گاڑی JK01AF/903کسی کام کے سلسلے میں سوپور جارہے تھے۔پولیس کا کہنا ہے کہ جنگجوؤں کی فائرنگ کے نتیجے میں سی آر پی ایف اہلکار اور مذکورہ عام شہری جاں بحق ہوئے جبکہ متعدد اہلکار زخمی ہوئے اور فائرنگ کے اس واقعہ میں مہلوک شہری کا نواسہ معجزیاتی طور پر محفوظ رہا،جسے سیکیورٹی فورسز نے بچالیا۔فائرنگ واقعہ کے بعد سوشل میڈیا پر کئی تصاویر وائرل ہوئیں،جس نے پورے کشمیر کو جھنجھوڑ کر رکھ دیا اور ہر ایک آنسو بہا نے لگا۔

چند کے ایک تصاویر میں عام شہری کی نعش سر راہ پڑی ہے اور اس کے آس پاس کوئی نہیں ہے۔یہ تصویر میں عام شہری کی نعش کے ارد گرد سیکیورٹی فورسز اہلکار ہیں۔اس کے ساتھ سوشل میڈیا پر ایک تصویر وائرل ہوئی،جس میں تین سالہ معصوم نواسہ اپنے جاں بحق نانا کے پیٹ پر بیٹھا ہوا ہے اور وہ خون کے آنسو بہا رہا ہے۔ایک تصویر میں دیکھا جاسکتا ہے کہ سی آر پی ایف کا ایک اہلکاردیوار کیساتھ پوزیشن میں ہے اور وہ بچے کو اشارہ کرکے اپنی طرف بلا رہا ہے۔ایک ویڈ یو کلپ میں معصوم عناد پولیس جپسی میں روتے ہوئے کہتا ہے’مجھے گھر جانا ہے‘۔

پولیس اہلکاروں نے بچے کو صدمے سے باہر نکلانے کیلئے چاکلیٹ اور بسکٹس بھی دئے۔پولیس نے اپنے سوشل میڈیا اکاؤنٹ پرایک تصویر شیئر کی جس میں اہلکار نے روتے ہوئے بچے کو اپنی گودمیں لیاہے اور پولیس نے لکھا ”جموں وکشمیر پولیس نے تین سالہ معصوم کو بچالیا جب سوپور میں ملی ٹنٹوں نے فائرنگ کی‘۔اس دردناک واقعہ کی تصاویر کس نے لی اور کس نے سوشل میڈیا پر وائرل کی،یہ الگ بحث ہے۔تاہم اس درد ناک واقعہ کا ایک پہلو یہ ہے کہ نواسہ اپنے نانا سے ہمیشہ ہمیشہ کیلئے جدا ہوا۔واقعہ میں جاں بحق شہری بشیر احمد خان کے لواحقین کا الزام ہے کہ اُسے گاڑی سے اتار ا گیا اور گولی مار کر قتل کیا گیا۔

لواحقین کے مطابق بشیر احمد پیشہ سے ٹھیکیدار تھے،اور وہ سوپور ذاتی کام کے سلسلے میں جارہے تھے اور انکے ساتھ اُن کا تین سالہ نواسہ بھی تھا،ہمیں نہیں معلوم تھا کہ وہ زندہ لوٹ کر نہیں آئیں گے۔جاں بحق شہری کی رہائش گاہ ماتم کدے میں تبدیل ہوئی تھی اور یہاں ہر ایک زار زار آنسو بہا رہا۔علاقے کی خاموش فضاؤں میں رقت آمیز چیخ وپکار سنائی دے رہی تھی۔جاں بحق شہری کی بیٹی نے روتے روتے کہا’جنہوں نے میرے والد کو قتل کیا،اُنہیں بھی گولی ماری جائے،اُنہیں نظر نہیں آیا،میرا والد معصوم بچے کیساتھ ہے‘۔جاں بحق شہری کے بیٹے نے الزام رعائد کیا کہ اُسکے والد کو گاڑی سے اُتار کر گولی مار کر قتل کیا گیا۔

ایس ایس پی سوپور جاوید اقبال کا کہنا ہے کہ شہری نے پہلے اپنے نواسہ کو بچایا اور اس بیچ اُسے گولی لگی اور جاں بحق ہوا۔فائرنگ کی وجہ سے کئی گاڑیاں یہاں رُک گئیں،اُنہوں نے اپنی گاڑیاں چھوڑیں اور محفوظ مقامات کی طرف بھاگ گئے،بدقسمتی سے ایک شہری کو گولی لگی اور جاں بحق ہوا۔سی آر پی ایف ترجمان نے ایک بیان جاری کیا،جس میں بتایا گیا کہ ماڈل ٹاؤن سوپور میں فورسز اہلکاروں کی تعیناتی عمل میں لائی جارہی تھی،تو یہاں گھات میں بیٹھے ملی ٹنٹوں نے فورسز پر اندھا دھند فائرنگ کی جسکے نتیجے میں 4سی آر پی ایف اہلکار زخمی ہوئے جن میں ہیڈ کانسٹیبل دیپ چند ورما ازجان ہوا جبکہ بھویا راجیش،دیپک پٹیل اور نیلیش چاؤدے زخمی ہوئے۔

ملی ٹنٹ حملے میں ایک شہری بھی موقعے پر ہی جاں بحق ہوا۔دریں اثنای جوں ہی جاں بحق شہری کی میت آبائی علاقہ پہنچائی گئی تو کہرام اور صف ماتم بچھ گئی۔بعد ازاں اُسے آبائی قبر ستان میں پُر نم آنکھوں کیساتھ سپرد لحد کیا گیا۔