نیویارک، ایران اور امریکہ کے درمیان ممکنہ معاہدے کی خبروں کے بعد خام تیل کی قیمتیں7 مئی کے بعد کم ترین سطح پر پہنچ گئیں۔

تفصیلات کے مطابق امریکہ اور ایران کے درمیان ممکنہ امن معاہدے اور جنگ بندی کی خبریں سامنے آتے ہی عالمی مارکیٹ میں خام تیل کی قیمتوں میں زبردست بریک لگ گیا۔ بین الاقوامی منڈی میں خام تیل کی قیمتیں 5 فیصد سے زائد یکدم گر گئی ہیں، جس سے عالمی معیشت بالخصوص پٹرولیم مصنوعات درآمد کرنے والے ممالک کو بڑی راحت ملنے کی امید پیدا ہو گئی ہے۔

برطانوی برینٹ کروڈ کی قیمت میں 5.49 فیصد کی نمایاں کمی ریکارڈ کی گئی، جس کے بعد قیمت کم ہو کر 97.85 ڈالر فی بیرل پرآگئی۔ اسی طرح امریکی خام تیل ‘ویسٹ ٹیکساس انٹرمیڈیٹ’ کی قیمت میں بھی 5.64 فیصد کی بڑی گراوٹ دیکھی گئی، جس کے بعد امریکی مارکیٹ میں تیل کی قیمت 91.14 ڈالر فی بیرل کی سطح پر آگئی۔

معاشی ماہرین کا کہنا ہے کہ تہران اور واشنگٹن کے درمیان کشیدگی کم ہونے اور سپلائی لائنز محفوظ ہونے کی توقعات کے باعث مارکیٹ سے غیر یقینی صورتحال کا دباؤ کم ہوا ہے۔ تیل کی عالمی منڈی میں دیگر پٹرولیم مصنوعات اور گیس کے نرخ بھی اتار چڑھاؤ کا شکار رہے، متحدہ عرب امارات کا ماربن ابوظہبی کروڈ 102.31 ڈالر فی بیرل پر ٹریڈ کرتا ہوا دیکھا گیا، جبکہ توانائی کے شعبے میں نیچرل گیس (قدرتی گیس) کی قیمت 2.8 ڈالر فی ایم ایم بی ٹی یو پر برقرار رہی۔ مارکیٹ تجزیہ کاروں کے مطابق اگر اگلے 24 گھنٹوں میں امریکہ اور ایران کی جانب سے باقاعدہ امن ڈیل کا اعلان کر دیا جاتا ہے، تو آنے والے دنوں میں خام تیل کی قیمتیں 90 ڈالر سے بھی نیچے آ سکتی ہیں، جو مہنگائی سے متاثرہ عالمی مارکیٹ کے لیے ایک مثبت اشارہ ثابت ہوگا۔

یو این آئی۔ ع ا۔

تہران، ترجمان ایرانی وزارت خارجہ اسماعیل بقائی کا کہنا ہے کہ امریکہ کے ساتھ ایک فریم ورک پر پہنچ گئے ہیں تاہم کوئی یہ نہیں کہہ سکتا کہ امریکہ اور ایران کے درمیان معاہدہ بالکل قریب ہے۔

ایرانی وزارت خارجہ کے ترجمان اسماعیل بقائی نے پریس کانفرنس کرتے ہوئے کہا کہ جنگ کے خاتمے کے لیے ایران مذاکرات کر رہا ہے تاہم ایران اس وقت جوہری معاملے پر بات چیت نہیں کر رہا۔ انہوں نے کہا کہ ہم ایک فریم ورک پر پہنچ گئے ہیں لیکن ابھی کوئی یہ نہیں کہہ سکتا کہ امریکہ اور ایران کے درمیان معاہدہ بالکل قریب ہے جبکہ پاکستان وفد بھیجنے کا فی الحال کوئی منصوبہ نہیں ہے۔ اسماعیل بقائی نے کہا کہ ایم اویوکوحتمی شکل دی گئی توجوہری معاملے سمیت مفاہمتی یادداشت کی کچھ تفصیلات اوردیگر موضوعات پر بھی60 دن میں مذاکرات ہوں گے۔

ترجمان نے کہا کہ 14 نکاتی ایم او یوجنگ کے خاتمے اور امریکی بحری ناکا بندی ختم کرنے پر مرکوز ہے، بدلے میں ایران ہرمز میں محفوظ آمد و رفت کو یقینی بنانے کے لیے اقدامات کرے گا۔ انہوں نےکہاکہ ایران آبنائے ہرمز پر ٹول نہیں لے گالیکن خدمات کی فراہمی کی فیس (سروس چارجز ) لینا عام بات ہے، اسےٹول نہیں کہاجاناچاہیے۔ ترجمان ایرانی وزارت خارجہ نے کہا کہ لبنان سمیت تمام محاذوں پر جنگ کا خاتمہ ممکنہ معاہدے کا حصہ ہوگا۔ ان کا مزید کہنا تھا کہ حالیہ سفارتی پیشرفت پاکستان کی ثالثی میں ہفتوں سے جاری مذاکرات اوررابطوں کانتیجہ ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ ایران کے ساتھ مذاکرات بہت اچھے جارہے ہیں ایران کے ساتھ ہونے والا معاہدہ سب کیلئے عظیم ہوگا۔

ٹروتھ سوشل پر بیان میں صدر ٹرمپ نے کہا کہ ایران سے معاہدہ نہ ہوا تو دوبارہ جنگ شروع ہو گی اگر دوبارہ جنگ ہوئی تو پہلے سے کہیں زیادہ بڑی ہوگی جو کوئی بھی نہیں چاہتا۔

ٹرمپ نے کہا کہ ہفتے کو سعودی عرب کے محمد بن سلمان سے گفتگو ہوئی، یو اے ای کے صدر، قطری امیر اور قطری وزیراعظم سے بھی بات چیت ہوئی۔ پاکستان کے فیلڈ مارشل سید عاصم منیر سے تفصیلی گفتگو ہوئی جب کہ ترکیہ کے صدر اور مصر کے صدر سے بھی مشاورت ہوئی، اردن کے شاہ عبداللہ دوم اور بحرین کے شاہ حمد بن عیسیٰ سےبات ہوئی۔ صدر ٹرمپ نے کہا کہ امریکہ نے انتہائی پیچیدہ مسئلے کو حل کرنے کے لیے پورا کام کیا۔

یو این آئی۔ ع ا۔