خبراردو:

گورنر ستیہ پال ملک نے چوتھے مشیر کی تقرری کے بعد ریاستی محکمہ جات کے قلم دانوں کی تقسیم میں بڑے پیمانے پر ردوبدل کئے گئے ہیں ۔معلوم ہو اہے کہ گورنر ستیہ پال ملک نے نئے مشیر کے کے شرما کو اہم قلم دان تفویض کئے ہیں جن میں فائنانس، پبلک ورکس، پی ایچ ای، اریگیشن اینڈ فلڈ کنٹرول، مکانات و شہری ترقی اور بجلی محکمہ شامل ہیں۔ ذرائع نے بتایا کہ نئی تقسیم کے مطابق جن کو آٹے میں نمک کے برابر حصہ ملا اُن میں ریاست کے 2ریٹائرڈ آئی اے ایس آفیسر جن میں خورشید احمد گنائی اور بی بی ویاس شامل ہیں جو فی الوقت گورنر ستیہ پال ملک کے خصوصی مشیر کی حیثیت سے اپنی خدمات انجام دے رہے ہیں۔معلوم ہوا ہے کہ قلم دانوں کی نئی تقسیم کے بعد گورنر کے مشیر خورشید احمد گنائی کو محکمہ پبلک ورکس، پی ایچ ای، اریگیشن اینڈ فلڈ کنٹرول، اگریکلچر، باغبانی اور صنعت و حرفت جیسے محکموں کی ذمہ داریوں سے فارغ کردیا گیا ہے۔

اسی طرح ریاست کے دوسرے آئی اے ایس آفیسر بی بی ویاس سے بھی فائنانس، بجلی، مکانات و شہری ترقی جیسے اہم قلم دان چھین لیے گئے ہیں اور اس طرح قلم دانوں کی فراہمی میں سب سے زیادہ نقصان خورشید احمد گنائی کو سہنا پڑرہا ہے۔محکمہ جنرل ایڈمنسٹریشن کی جانب سے ایک حکم نامہ کے مطابق بی بی ویاس اب محکمہ پلاننگ اور مانیٹرنگ، اگریکلچر، باغبانی، دیہی ترقی اور پنچایت راج، ریونیو، ریلیف ، بازآبادکاری اور ڈیزاسٹر منیجمنٹ، لداخ اُمور، انتخابات، محکمہ اُمور صارفین، ٹرائیبل افیرز وغیرہ کا چارج سنبھالیں گے۔اسی طرح نئے مشیر کے کے شرماجن محکمہ جات کا چارج سنبھالیں گے اُن میں فائنانس، پبلک ورکس، بجلی، پی ایچ ای، آئی اینڈ ایف سی، انڈسٹریز، کامرس ، انفارمیشن ٹیکنالوجی اور سائنس و ٹیکنالوجی شامل ہیں۔

ذرائع نے بتایا کہ گورنر کے دوسرے مشیر کے وجے کمار نئی تقسیم کے بعد جن محکمہ جات کے لیے ذمہ دار ٹھہرائے گئے ہیں اُن میں محکمہ داخلہ، جنگلات، ماحولیات، صحت عامہ، طبی تعلیم، اسٹیٹس،اطلاعات، قانون و پارلیمانی اُمور، یوتھ سروسز و سپورٹس، تواضع وغیرہ شامل ہیں۔اسی طرح خورشید احمد گنائی نئے تقسیم کے مطابق محکمہ اسکول ایجوکیشن، اعلیٰ تعلیم، ٹورزم، سوشل ویلفئر، ٹرانسپورٹ، حج و اوقاف، تکنیکی تعلیم، فلوری کلچر، محکمہ پشوپالن وغیرہ شامل ہیں۔یہ بات قابل ذکر ہے کہ 2روز قبل ہی نے گورنر انتظامیہ میں چوتھے مشیر کے کے شرما کی تقرری کے بعد محکمہ جات کی تقسیم میں بڑے پیمانے پر رد وبدل کی خبر آئی تھی ۔