نئی دہلی، لوک سبھا میں اپوزیشن لیڈر راہل گاندھی نے کہا ہے کہ وہ 17 جولائی کو دہرادون میں ہوں گے کیونکہ اتراکھنڈ کو پیپر لیک کا ‘مرکز’ بنا دیا گیا ہے مسٹر گاندھی نے الزام لگایا کہ ریاست میں بھرتی امتحانات میں ایسا نظام تیار ہو گیا ہے جہاں پٹواری، لیکھ پال اور دیگر عہدے قابلیت کی بنیاد پر نہیں بلکہ مجرموں کے طے کردہ داموں پر ملتے ہیں کانگریس رہنما نے جمعرات کو سوشل میڈیا پلیٹ فارم ‘ایکس’ پر ایک پیغام میں کہا کہ حکومت نے سخت انسدادِ نقل قانون بنایا، اس کے باوجود پیپر لیک ہوتے رہے۔ یہ قانون صرف کاغذات تک محدود رہا اور سوالنامے بازار میں بکتے رہے۔

انہوں نے کہا کہ برسوں محنت کرنے والے نوجوانوں کا حق چھین لیا گیا ہے اور کسی دوسرے نے پیسے دے کر ان کی نوکری خرید لی۔ یہ صرف پیپر لیک نہیں، بلکہ نوجوانوں کے روزگار اور مستقبل کی چوری ہے۔ مسٹر گاندھی نے اتراکھنڈ کے طلبہ اور مسابقتی امتحانی امیدواروں سے اس لڑائی میں شامل ہونے کی اپیل کرتے ہوئے کہا کہ وہ ان کے ساتھ کھڑے ہیں۔ انہوں نے 17 جولائی کو دہرادون میں منعقد ہونے والے ‘چھاتروں کی گونج’ پروگرام میں بڑی تعداد میں شرکت کی اپیل کرتے ہوئے کہا کہ ‘مستقبل نیلام نہیں ہونے دیں گے، خوابوں کو لیک نہیں ہونے دیں گے۔’

یواین آئی۔الف الف

نئی دہلی، وزیرِ دفاع راج ناتھ سنگھ نے کہا ہے کہ جدید ترین ہتھیاروں اور جدید فوجی ٹیکنالوجیز کے باوجود سڑکیں، سرنگیں، ہوائی اڈے اور بندرگاہیں جیسے اسٹریٹجک انفراسٹرکچر فوجی مہمات کے لیے مستقبل میں بھی انتہائی اہم رہیں گے مسٹر سنگھ نے جمعرات کو یہاں بارڈر روڈز آرگنائزیشن کے اسٹریٹجک انفراسٹرکچر کانفرنس سے خطاب کرتے ہوئے کہا کہ فوجیوں کو محاذ تک پہنچانے والی سڑک بھی اتنی ہی اہم ہے جتنا کہ سرحد پر تعینات فوجی، اس لیے انفراسٹرکچر کی تعمیر کرنے والے بھی قومی سلامتی کے مساوی طور پر اہم محافظ ہیں۔ وزیرِ دفاع نے بارڈر روڈز آرگنائزیشن کی ستائش کرتے ہوئے کہا کہ اس نے ایک عام سڑک تعمیر کرنے والی ایجنسی سے دنیا کی معززاسٹریٹجک انفراسٹرکچر تنظیموں میں مقام بنایا ہے۔ انہوں نے اٹل سرنگ، سیلا سرنگ اور املنگ لا درہ جیسے پروجیکٹوں کو تنظیم کی انجینئرنگ کی صلاحیت اور بہترین کام کا نمونہ قرار دیا۔ انہوں نے کہا کہ سرکار جدید انفراسٹرکچر اور وائبڑینٹ ولیج پروگرام کے ذریعے سرحدی علاقوں میں رابطے کے نظام کو مضبوط بنا کر قومی سلامتی کو مستحکم کرنے اور سال 2047 تک ترقی یافتہ ملک کے ہدف کو حاصل کرنے کی سمت میں کام کر رہی ہے۔

مسٹر سنگھ نے اس موقع پر بارڈر روڈز آرگنائزیشن کے نئے ڈیجیٹل پروجیکٹ مینجمنٹ اور بھرتی کے نظام کا آغاز کیا، تنظیم کی تین اہم مطبوعات کا اجرا کیا، بی آر او ترانے کی نقاب کشائی کی اور انفراسٹرکچر کی ترقی میں بہترین کارکردگی کا مظاہرہ کرنے والے پروجیکٹوں کو نوازا۔ دو روزہ کانفرنس میں سرحدی علاقوں میں اسٹریٹجک انفراسٹرکچر کی ترقی کو تیز کرنے کے لیے ٹیکنالوجی، مصنوعی ذہانت، اختراع اور پائیدار تعمیراتی طریقوں پر تبادلہ خیال کیا گیا۔

یو این آئی۔ ایف اے

نئی دہلی، کانگریس کے لوک سبھا ایم پی ششی تھرور نے قومی راجدھانی کے جنتر منتر پر امتحان کے نظام میں شفافیت اور پیپر لیک کے خلاف مظاہرہ کر رہے طلبہ کے نام بدھ کو ایک کھلا خط جاری کرتے ہوئے ان کے خدشات کی حمایت کی اور مرکز حکومت سے نوجوانوں کے ساتھ بامعنی بات چیت کرنے کی اپیل کی ہے مسٹر تھرور نے خط کے ذریعے کہا کہ منصفانہ اور میرٹ پر مبنی امتحان کے نظام ہی متوسط اور کم آمدنی والے طبقے کے نوجوانوں کے لیے آگے بڑھنے کا سب سے بڑا ذریعہ ہے۔ انہوں نے خط میں اپنی زندگی کا ذکر کرتے ہوئے کہا کہ وہ ایک متوسط طبقے کے خاندان سے تعلق رکھتے ہیں، جہاں ان کے والد ایک تنخواہ دار ملازم تھے اور ایک ہی آمدنی سے تین بچوں کی تعلیم کے اخراجات پورے ہوتے تھے۔ انہوں نے کہا کہ اسکالرشپ، منصفانہ امتحانات اور ایماندارانہ نتائج ہی ان جیسے خاندانوں کے بچوں کے خوابوں کو پورا کرنے کی بنیاد بنے۔

کانگریس ایم پی نے کہا کہ جب پیپر لیک ہوتے ہیں اور امتحانات منسوخ ہوتے ہیں تو نظام پر سے بھروسہ اٹھ جاتا ہے، تب سب سے زیادہ نقصان محنت کرنے والے نوجوانوں اور ان کے خاندانوں کو ہوتا ہے، جبکہ خوشحال طبقے کے پاس آگے بڑھنے کے دیگر متبادل موجود ہوتے ہیں۔ جنتر منتر پر مظاہرہ کر رہے طلبہ کو مخاطب کرتے ہوئے مسٹر تھرور نے کہا کہ ان کا غصہ کوئی بے راہ روی نہیں بلکہ اس نسل کا درد ہے جس نے پوری ایمانداری سے محنت کی، پھر بھی نظام نے اسے مایوس کیا۔ انہوں نے نوجوانوں سے امید نہ ہارنے کی اپیل کرتے ہوئے کہا کہ ملک کا مستقبل ان ہی کے ہاتھوں میں ہے۔

ساتھ ہی انہوں نے سماجی کارکن سونم وانگ چُک سے اپنی بھوک ہڑتال ختم کرنے کی گزارش کی۔ مسٹر تھرور نے کہا کہ پارلیمنٹ کا سیشن شروع ہونے پر طلبہ کے مسائل کو جمہوریت کے سب سے اعلیٰ فورم پر اٹھایا جائے گا۔ انہوں نے مرکزی حکومت سے بھی طلبہ کے ساتھ بات چیت کا آغاز کر کے ان کے مسائل کا حل نکالنے کی اپیل کرتے ہوئے کہا کہ یہی جمہوری قیادت کی پہچان ہے۔

یو این آئی۔ ایف اے