واشنگٹن، امریکی صدر ڈونلڈ ٹرمپ کا کہنا ہے کہ ایران کے ساتھ مفاہمتی یادداشت (ایم او یو) پر الیکٹرانک طور پر دستخط کیے جا چکے ہیں اور آبنائے ہرمز جمعہ تک مکمل طور پر کھول دی جائے گی۔

امریکی صدر ڈونلڈ ٹرمپ کا کہنا ہے کہ ایران کے ساتھ جنگ کے خاتمے کے لیے ایک ابتدائی معاہدے پر پہلے ہی دستخط ہو چکے ہیں، اور اس معاہدے کی تفصیلات ’’بہت جلد‘‘ جاری کیے جانے کا امکان ہے۔ انھوں نے پیر کے روز جی-7 سربراہی اجلاس میں فرانسیسی صدر ایمانوئل میکرون کے ساتھ ملاقات کے دوران کہا ’’مجھے یہ بتاتے ہوئے بہت خوشی ہو رہی ہے کہ معاہدے پر دستخط ہو چکے ہیں، معاہدہ مکمل طور پر طے پا چکا ہے۔‘‘ امریکی اعلیٰ حکام نے بھی معاہدے کے بعض نکات سے آگاہ کرنا شروع کر دیا ہے۔ ان کے مطابق آبنائے ہرمز جمعہ کے روز دوبارہ مکمل طور پر کھول دی جائے گی اور اسی دن جنیوا میں اس معاہدے پر باضابطہ دستخط کیے جائیں گے۔

امریکی صدر ٹرمپ نے فرانسیسی صدر ایمانوئل میکرون کے ساتھ پریس کانفرنس میں کہا ایران سے معاہدے پر دستخط ہو گئے ہیں، آبنائے ہرمز کھل گئی ہے، یہ امن معاہدہ انتہائی شان دار ہے۔ انھوں نے کہا ایران کے ساتھ ہمارے تعلقات اچھے ہونے کی امید ہے۔ اہم بات یہ ہے کہ تیل کی قیمت گر رہی ہے اور اسٹاک مارکیٹ اوپر جا رہی ہے۔ ٹرمپ نے کہا نائب صدر جے ڈی وینس دستخط کی باقاعدہ تقریب میں شرکت کریں گے، میں بھی شریک ہو سکتا ہوں۔ حکام کے مطابق، ایران کے جوہری پروگرام سے متعلق تکنیکی مذاکرات اسی ہفتے شروع ہونے کی توقع ہے، جبکہ پابندیوں میں نرمی یا منجمد اثاثوں کی رہائی کا انحصار اس بات پر ہوگا کہ ایران معاہدے کے تحت اپنی ذمہ داریاں پوری کرتا ہے یا نہیں۔

یو این آئی۔ ع ا۔

واشنگٹن، امریکہ اور ایران کے درمیان ہونے والی حالیہ مفاہمتی یادداشت پر ردعمل کا اظہار کرتے ہوئے سابق امریکی صدر باراک اوباما نے کہا ہے کہ امریکہ دھونس جما کر یا بمباری کے ذریعے مسائل حل نہیں کر سکتا امریکی میڈیا کو دیے گئے ایک انٹرویو میں باراک اوباما کا کہنا تھا کہ اس بات کا کوئی امکان نہیں ہے کہ ایران کے ساتھ کیا جانے والا کوئی بھی نیا معاہدہ، اصل جوہری معاہدے (جے سی پی او اے) سے نمایاں طور پر بہتر ہو۔

سابق صدر نے فوجی طاقت کے استعمال کے بجائے سفارت کاری پر زور دیتے ہوئے کہا کہ ہمیں ایسے سفارتی معاہدوں کو ترجیح دینی چاہیے جو جنگ سے بچاتے ہوئے زیادہ تر مسائل کو حل کرنے کی صلاحیت رکھتے ہوں۔ انہوں نے مزید کہا کہ ہم چاہتے ہیں کہ بمباری کا سلسلہ بند ہو تاکہ جنگ کے نتیجے میں عام لوگ مزید مشکلات اور مصائب کا شکار نہ ہوں۔

یو این آئی۔ ع ا۔

تہران، ایرانی پاسدارانِ انقلاب کی قدس فورس کے کمانڈر بریگیڈیئر جنرل اسماعیل قآنی نے کہا ہے کہ جاری جنگ نے امریکہ کی ساکھ کو مکمل طور پر ختم کر دیا ہے، جبکہ اسرائیل کے زوال کے عمل کو مزید تیز کر دیا ہے۔

جنرل اسماعیل قآنی کا کہنا تھا کہ شدید دباؤ، وسیع تباہی اور سنگین ترین حملوں کے باوجود مزاحمتی محور کا کوئی بھی گروپ میدانِ جنگ سے پیچھے نہیں ہٹا۔ دشمنوں کی تمام تر کوششوں کے باوجود مزاحمتی قوتوں کی ثابت قدمی برقرار رہی، جس نے مخالفین کو شدید خوفزدہ کر دیا ہے۔

حزب اللہ کے حوالے سے بات کرتے ہوئے انہوں نے واضح کیا کہ حزب اللہ کو کبھی ختم نہیں کیا جا سکتا۔ اب تک دنیا نے حزب اللہ کی عسکری طاقت کا صرف ایک محدود حصہ دیکھا ہے جبکہ اس کی حقیقی صلاحیت اور طاقت اس سے کہیں زیادہ ہے۔

کمانڈر قدس فورس نے ایرانی مذاکرات کاروں کی تعریف کرتے ہوئے کہا کہ حالیہ سفارتی عمل میں ایرانی مذاکرات کاروں نے ثالثوں کے ساتھ مکمل اختیار اور طاقت کے ساتھ بات چیت کی ہے۔

یو این آئی۔ ع ا۔