تہران، امریکی فورسز نے آبنائے ہرمز میں ایک ایرانی تجارتی بحری جہاز پر چڑھ کر قبضہ کر لیا ہے، ایرانی فوج نے اسے ’’بحری قزاقی‘‘ قرار دیتے ہوئے جواب دینے کا اعلان کیا ہے۔

یہ حملہ امریکی صدر ڈونلڈ ٹرمپ کے اعلان کے چند گھنٹے بعد ہوا ہے جب انھوں نے کہا کہ وہ ایران کے ساتھ ممکنہ بات چیت کے لیے اپنی ٹیم پاکستان کے دارالحکومت اسلام آباد بھیج رہے ہیں۔ امریکی بحریہ نے آبنائے ہرمز میں کارروائی کرتے ہوئے ایرانی پرچم والے مال بردار بحری جہاز ’’توسکا‘‘ کو قبضے میں لیا،

امریکی سینٹرل کمانڈ (سینٹکام) نے ایک بیان میں کہا یہ کارروائی یو ایس ایس سپروئنس نے بحیرہ عرب میں کی، ایک بحری جہاز ’ایم وی توسکا‘ بندر عباس کی جانب جا رہا تھا، متعدد وارننگز کے باوجود جہاز نے حکم نہ مانا، 6 گھنٹے بعد جہاز کے انجن روم خالی کرانے کا حکم دیا گیا۔ سینٹکام کے مطابق فائرنگ کے بعد جہاز کا انجن ناکارہ بنا دیا گیا، فائرنگ سے جہاز کی حرکت مکمل طور پر روک دی گئی، اور 31 ویں میرین یونٹ نے جہاز پر قبضہ کر لیا، تعاون نہ کرنے پر بحری جہاز کو امریکہ نے تحویل میں لیا۔

سینٹرل کمانڈ کا کہنا تھا کہ یہ کارروائی پیشہ ورانہ اور متناسب انداز میں کی گئی۔ امریکی فوج نے ایرانی بحری جہازوں پر چڑھ کر انھیں ضبط کرنے کی تیاری کر لی، وال اسٹریٹ جرنل ایرانی فوجی ہیڈکوارٹرز نے رد عمل میں کہا کہ ایرانی تجارتی جہاز پر حملہ کر کے امریکہ نے جنگ بندی کی خلاف ورزی کی ہے، امریکہ نے نیوی گیشن سسٹم کو غیر فعال کر کے اہلکاروں کو جہاز میں اتارا، خلیج عمان میں اس بحری قزاقی کا جلد جواب دیں گے۔

اس سے قبل ابتدائی بیان میں ایرانی فورسز نے دعویٰ کیا تھا کہ بحری جہاز کو قبضے میں لینے کی امریکی کوشش ناکام بنا دی گئی ہے، امریکی افواج نے بحیرہ عمان میں ایرانی تجارتی بحری جہاز پر فائرنگ کی، تاہم ایرانی بحریہ کی بروقت کارروائی سے امریکی فوج کو پسپائی ہوئی، امریکی فوج موقع سے واپس چلی گئی۔ تاہم ایرانی فورسزکے بیان میں کسی بحری جہاز کا نام نہیں لیا گیا تھا۔ دوسری طرف ایک ایرانی ذریعے نے الجزیرہ کو بتایا کہ ایران اس مذاکرات میں حصہ نہیں لے گا کیوں کہ اس کا خیال ہے کہ اسے امریکا نے دھوکا دیا ہے، اور یہ کہ دونوں ممالک درحقیقت ایک اور کشیدگی کے دہانے پر ہیں۔

یو این آئی۔ ع ا۔

تہران، ایران میں امریکی حملے میں شہید ہونے میناب اسکول کے بچوں کے والدین نے پوپ لیو کو خط لکھا ہے۔

ایرانی میڈیا رپورٹ کے مطابق ایران کے جنوبی شہر میناب کے ایک پرائمری اسکول پر امریکی بمباری میں شہید ہونے والے بچوں کے سوگوار خاندانوں نے رومن کیتھولک چرچ کے سربراہ کے امن پسندانہ موقف کو سراہتے ہوئے پوپ لیو چہاردم سے اپیل کی ہے کہ وہ ان کے بے زبان بچوں کی آواز بنیں۔

پوپ کے نام لکھے گئے خط میں غمزدہ ایرانی خاندانوں نے پوپ سے درخواست کی ہے کہ وہ اپنی بصیرت اور اثر و رسوخ کو استعمال کریں تاکہ زمین پر کسی بھی والدین کو اپنے بچے کی سرد قبر پر لوری سنانے کی نوبت نہ آئے۔ خط میں لکھا گیا ہے کہ ہم یہ خط لرزتے ہاتھوں اور دکھ سے بھرے دلوں کے ساتھ، جنوبی ایران کے شہر میناب میں اسکول کے کھنڈرات اور راکھ کے ڈھیر سے لکھ رہے ہیں۔ ہم ان 168 بچوں کے والدین ہیں جو ان دنوں اپنے بچوں کے گرم جسموں کو گلے لگانے کے بجائے ان کے جلے ہوئے بستوں اور خون آلود کاپیوں کو سینے سے لگائے ہوئے ہیں، وہ معصوم بچے جن کا واحد جرم کلاس روم میں مسکرانا تھا۔

متاثرہ والدین نے اپنی تکلیف کا ذکر کرتے ہوئے کہا کہ جب دھماکوں کی ہولناک آواز نے ہماری چیخوں پر دنیا کے کان بند کر دیے تھے، تب آپ کے امن پسند الفاظ کی گونج ہمارے لامتناہی زخموں کے لیے مرہم بن گئی۔ پوپ لیو چہاردم کی جانب سے عالمی طاقتوں کو تشدد اور بمباری کم کرنے کی دلیرانہ کال کا حوالہ دیتے ہوئے خاندانوں نے کہا کہ پوپ کا ہر لفظ بچوں کو بچانے اور بڑھتی ہوئی نفرت، تشدد اور معصوم جانوں کے ضیاع پر دنیا کے ضمیر کو بیدار کرنے کی ایک کوشش تھا۔

خط میں مزید کہا گیا کہ ہم حق کی آواز بننے اور ہمیں یہ یاد دلانے کے لیے آپ کے شکر گزار ہیں کہ پائیدار امن اور سکون طاقت اور ہتھیاروں سے نہیں بلکہ مکالمے سے حاصل ہوتا ہے۔ میناب ایک تلخ حقیقت ہے جسے غیر منطقی جنگجوؤں کی رہنمائی میں امریکی بموں نے تخلیق کیا ہے۔

والدین نے خط میں لکھا کہ وہ جانتے ہیں کہ ان کے بچے اب کبھی گھر نہیں لوٹیں گے، لیکن پوپ جیسی شخصیت ان بے زبان بچوں کی آواز بن کر تمام راستے کھول سکتی ہے تاکہ دنیا میں کوئی دوسرا والدین اس المیے سے دوچار نہ ہو۔ یہ خط ‘اسلامک کلچر اینڈ کمیونیکیشن آرگنائزیشن’ کو بھیجا گیا ہے تاکہ اسے ‘ایرانی بین المذاہب مکالمہ پالیسی و کوآرڈینیشن کونسل’ کے ذریعے پوپ لیو چہاردم تک پہنچایا جا سکے۔

یو این آئی۔ ع ا۔

تہران، ایران کے نائب صدر محمد رضا عارف نے دنیا پر واضح کیا ہے کہ آبنائے ہرمز کی سیکیورٹی مفت نہیں ہے، ایران پر پابندیاں اور دوسروں کو سہولت ممکن نہیں۔

محمد رضا عارف نے ایکس پر اپنے پیغام میں لکھا آبنائے ہرمز کی سلامتی مفت نہیں ہے، ایران کی تیل برآمدات کو محدود کرتے ہوئے دوسروں کے لیے مفت سیکیورٹی کی توقع نہیں کی جا سکتی۔ انھوں نے لکھا ’’انتخاب واضح ہے: یا تو سب کے لیے تیل کی آزاد منڈی ہو، یا پھر سب کو بھاری قیمت کے خطرے کا سامنا کرنا پڑے۔ عالمی ایندھن کی قیمتوں میں استحکام اس بات پر منحصر ہے کہ ایران اور اس کے اتحادیوں کے خلاف اقتصادی اور فوجی دباؤ کا مستقل اور یقینی خاتمہ ہو۔‘‘

ان کا کہنا تھا کہ عالمی ایندھن قیمتوں کا استحکام دباؤ کے خاتمے سے جڑا ہے، ایران اور اس کے اتحادیوں پر معاشی و عسکری دباؤ ختم کیے بغیر خطے میں استحکام ممکن نہیں ہے۔

دریں اثنا، ایران نے امریکی بحری ناکہ بندی جنگ بندی معاہدے کی خلاف ورزی قرار دی ہے اور کہا ہے کہ یہ امریکہ کا غیر قانونی اور مجرمانہ فعل ہے۔

ترجمان ایرانی وزارت خارجہ اسماعیل بقائی نے کہا ایرانی بندرگاہوں کی ناکہ بندی یو این چارٹر کی سنگین خلاف ورزی ہے، اقوام متحدہ جنرل اسمبلی کی قرارداد کے تحت یہ اقدام براہ راست جارحیت اور ایرانی عوام کو دانستہ اجتماعی سزا دینے کے مترادف ہے۔ انھوں نے کہا کہ کسی بھی ملک کی بندرگاہوں کو بند کرنا کھلی دشمنی ہے، جسے عالمی برادری کسی صورت نظر انداز نہیں کر سکتی۔

یو این آئی۔ ع ا۔