جموں و کشمیر

مہلوک جیش کمانڈر سیف اللہ کون تھا چار اضلاع میں سرگرم انتہائی مطلوب دہشت گرد ہلاک

Published

4 months ago

February 23, 2026

جموں، جموں و کشمیر میں جاری انسدادِ دہشت گردی کارروائیوں کو اُس وقت بڑی کامیابی ملی جب سیکورٹی فورسز نے جیشِ محمد کے انتہائی خطرناک، تربیت یافتہ اور متعدد اضلاع میں سرگرم سینئر کمانڈر سیف اللہ کو ایک مربوط آپریشن کے دوران ہلاک کر دیا۔ سیف اللہ اُن تین ہلاک شدہ دہشت گردوں میں شامل تھا جنہیں گزشتہ روز کشتواڑ کے گھنے جنگلاتی علاقے میں سیکورٹی فورسز نے مار گرایا۔

ذرائع نے بتایا کہ سیف اللہ گزشتہ پانچ برس سے ڈوڈہ، کشتواڑ، ادھمپور اور کٹھوعہ کے پہاڑی اور جنگلاتی علاقوں میں فعال تھا، جہاں اس نے نہ صرف جیشِ محمد کا مضبوط لوکل نیٹ ورک قائم کیا بلکہ کارروائیوں کو منظم کرنے کے لیے محفوظ ٹھکانے بھی بنائے۔

ذرائع کے مطابق وہ ایک ’ہائی ویلیو ٹارگٹ‘ تھا اور فورسز پر ہونے والے کئی حملوں میں اس کا براہ راست کردار ثابت ہوا ہے۔

ذرائع کے مطابق سیف اللہ تقریباً پانچ سال قبل پاکستانی زیرِ انتظام کشمیر کے راستے دراندازی کرکے جموں و کشمیر میں داخل ہوا تھا۔ دراندازی کے فوراً بعد اس نے کشتواڑ اور ڈوڈہ کے دور دراز جنگلات میں پناہ لی اور مقامی سطح پر رابطوں کا جال بچھانا شروع کیا۔

تفتیش میں اس بات کا بھی انکشاف ہوا ہے کہ وہ جولائی 2024 کے اُس مہلک گھات لگا کر کیے گئے حملے کا ماسٹر مائنڈ تھا جس میں چار فوجی اہلکار شہید ہوگئے تھے۔

حکام نے بتایا کہ سیف اللہ متعدد تصادم آرائیوں کے دوران سیکورٹی فورسز کے محاصرے توڑ کر فرار ہونے میں کامیاب رہا، جس کی وجہ سے اسے سیکیورٹی ایجنسیوں میں ’شیڈو کمانڈر‘ کا نام دیا گیا تھا۔

اس کے بارے میں کہا جاتا تھا کہ وہ علاقے کے جغرافیے، پہاڑی راستوں اور جنگلاتی ڈھانچے پر غیر معمولی عبور رکھتا تھا، اسی لیے وہ ہر بار فورسز کو چکمہ دے کر روپوش ہونے میں کامیاب رہتا تھا۔

ذرائع کا کہنا ہے کہ سیف اللہ نہ صرف تربیت یافتہ اسنائپر تھا بلکہ جدید ہتھیاروں اور بارودی مواد کے استعمال میں بھی ماہر سمجھا جاتا تھا۔ اس کا گروپ کئی بار ہتھیاروں اور اسلحے کی اسمگلنگ میں بھی ملوث رہا ہے، جن میں دراندازوں تک اسلحہ پہنچانے کے علاوہ ایسے مقامی سیل بھی شامل تھے جو نیٹ ورک کو پناہ اور سہولت فراہم کرتے تھے۔

فوج اور پولیس نے تصدیق کی کہ سیف اللہ کی ہلاکت جیشِ محمد کے نیٹ ورک کے لیے ایک بڑا جھٹکا ہے۔ وہ نہ صرف کمانڈر تھا بلکہ بھرتی، ریکی، ہتھیاروں کی رسد اور کارروائیوں کی منصوبہ بندی میں مرکزی کردار رکھتا تھا۔

افسران کا کہنا ہے کہ اس کے مارے جانے کے بعد تنظیم کی سرگرم سیل کافی حد تک کمزور پڑ چکی ہے اور آنے والے دنوں میں اس نیٹ ورک سے جڑے مزید افراد کی گرفتاری یا ہلاکت متوقع ہے۔

یو این آئی، ارشید بٹ،

جموں و کشمیر

محبوبہ کا اقلیتوں کے خلاف نفرت انگیز تقاریر کو معمول بنائے جانے پر تنقید

Published

7 hours ago

June 20, 2026

Online Desk

سرینگر، محبوبہ مفتی، صدر پیپلز ڈیموکریٹک پارٹی (پی ڈی پی)، نے ہفتہ کے روز الزام عائد کیا کہ ملک میں اقلیتوں کے خلاف نفرت انگیز تقاریر اور امتیازی سلوک کو بتدریج معمول بنایا جا رہا ہے۔

انہوں نے سوشل میڈیا پلیٹ فارم ایکس پر ایک پوسٹ میں کہاکہ ’’بی جے پی کے نام نہاد وکست بھارت کی حقیقت یہی ہے کہ نفرت انگیز تقاریر اس حد تک معمول بن چکی ہیں کہ پیدا نہ ہونے والے مسلم بچوں کو بھی دھمکیاں دی جا رہی ہیں۔ مسلمانوں، عیسائیوں، دلتوں اور آدیواسیوں کو مسلسل حاشیے پر دھکیلا جا رہا ہے، جبکہ گھروں اور مساجد کو بلاخوف و خطر مسمار کیا جا رہا ہے۔‘‘

جموں و کشمیر کی سابق وزیر اعلیٰ نے تقسیم پیدا کرنے والی زبان اور بیانات کی بڑھتی ہوئی قبولیت پر تشویش کا اظہار کرتے ہوئے خبردار کیا کہ ایسے بیانات کے خلاف خاموشی معاشرتی تقسیم کو مزید گہرا کر سکتی ہے۔

انہوں نے کہاکہ ’’اس قسم کی نفرت انگیز بیان بازی پر جاری خاموشی اُن عناصر کی حوصلہ افزائی کرتی ہے جو ہمارے معاشرے کو تقسیم کرنا چاہتے ہیں۔‘‘

محبوبہ مفتی کا یہ ردِعمل للت شرما کی جانب سے دہرادون کے بیراگی والا علاقے میں مبینہ نفرت انگیز تقریر کے بعد سامنے آیا۔

یواین آئی۔ ظ ا

جموں و کشمیر

ای او ڈبلیو کشمیر نے دھوکہ دہی کے مقدمے میں اترپردیش کے ایک باشندے کے خلاف چارج شیٹ دائر کر دی

Published

7 hours ago

June 20, 2026

Online Desk

سرینگر، جموں و کشمیر کرائم برانچ کے اکنامک آفنسز ونگ (ای او ڈبلیو) کشمیر نے ہفتہ کے روز سوپور کی ایک عدالت میں اتر پردیش کے ایک ملزم کے خلاف چارج شیٹ دائر کی، جس پر غیر ملکی ٹیلی کام منصوبہ فراہم کرنے کا جھانسہ دے کر شکایت کنندہ سے دھوکہ دہی کے ذریعے رقم حاصل کرنے کا الزام ہے۔

ای او ڈبلیو کے مطابق یہ چارج شیٹ سال 2023 میں تعزیراتِ ہند کی دفعہ 420 کے تحت درج ایف آئی آر کے سلسلے میں پیش کی گئی۔ ملزم کی شناخت ہرکیت سنگھ، ساکن کالی ماتا مندر، لال بنگلہ، کانپور، اتر پردیش کے طور پر ہوئی ہے۔

مقدمے کی بنیاد ایک تحریری شکایت پر رکھی گئی تھی، جس میں الزام لگایا گیا تھا کہ ملزم نے امریکہ کی ایک ٹیلی کام کمپنی سے منسلک مبینہ اے ٹی اینڈ ٹی اِن باؤنڈ سیلز کال پروجیکٹ فراہم کرنے کا وعدہ کرکے شکایت کنندہ کو رقم دینے پر آمادہ کیا۔

تحقیقات کے دوران اکنامک آفنسز ونگ نے الزامات کا جائزہ لیا اور مقدمے سے متعلق شواہد جمع کیے۔ تفتیش کاروں نے پایا کہ ملزم نے مبینہ طور پر منصوبے کے بارے میں جھوٹی یقین دہانیاں کرا کے شکایت کنندہ کو دھوکہ دیا اور فراڈ کے ذریعے رقم حاصل کی۔

کرائم برانچ حکام کے مطابق، تحقیقات کے دوران جمع کیے گئے شواہد نے شکایت میں لگائے گئے الزامات کی تائید کی۔

بعد ازاں، عدالتی کارروائی کے لیے چارج شیٹ چیف جوڈیشل مجسٹریٹ، سوپور کی عدالت میں پیش کر دی گئی۔

یواین آئی۔ ظ ا

جموں و کشمیر

بارہمولہ میں ٹیکسی سڑک سے پھسل کر حادثے کا شکار، آٹھ افراد زخمی

Published

8 hours ago

June 20, 2026

Online Desk

سرینگر، جموں و کشمیر کے ضلع بارہمولہ میں ہفتہ کے روز ایک ٹویرا کیب سڑک سے پھسل کر حادثے کا شکار ہو گئی، جس کے نتیجے میں آٹھ افراد زخمی ہو گئے۔

حکام کے مطابق ٹنگمرگ کے بابا ریشی علاقے کے قریب ٹویرا کیب ڈرائیور کے قابو سے باہر ہو کر سڑک سے پھسل گئی، جس کے باعث گاڑی میں سوار آٹھ مسافر زخمی ہو گئے۔

زخمیوں کو فوری طور پر قریبی طبی مراکز منتقل کیا گیا، جہاں ابتدائی علاج کے بعد انہیں مزید خصوصی علاج کے لیے سرینگر کے جے وی سی اسپتال ریفر کر دیا گیا۔

ادھر، اس واقعے کے سلسلے میں پولیس اسٹیشن ٹنگمرگ میں مقدمہ درج کر لیا گیا ہے۔

یواین آئی۔ ظ ا