خبراردو:

نیشنل کانفرنس صدرڈاکٹر فاروق عبداللہ نے ایک انٹرویومیں کہاہے کہ بی جے پی الیکشن جیتنے کیلئے کشمیر کا استعمال کر رہی ہے۔اس سوال کہ’’پلوامہ حملے کے بعد جموں شہر میں مسلمانوں کیخلاف حملے اور تشدد کے واقعات لگاتار منظر عام پر آئے ہیں، کیا آپ کو لگتا ہے کہ حالات فرقہ وارانہ کشیدگی کی طرف گامزن ہیں؟،کاجواب دیتے ہوئے سابق وزیراعلیٰ کاکہناتھاکہ جموں میں فی الحال حالات قابو میں ہیں، لیکن اس کی وجہ کرفیو ہے، یہ دیکھنا ہوگا کہ کرفیو ہٹائے جانے اور اسکول،کالج اور دوسرے ادارے کھلنے کے بعد حالات کیسے رہتے ہیں۔ انہوں نے کہاکہ مسلمانوں میں خوف ہے، جسے ختم کرنے میں وقت لگے گا۔ڈاکٹرفاروق کاکہناتھاکہ میں امید کرتا ہوں کہ حالات اور نہ بگڑیں۔ ساتھ ہی حکومت سے امید ہے کہ وہ امن و امان کی فضا کو یقینی بنائے گی۔ایک سوال کے جواب میں نیشنل کانفرنس کے صدرنے کہاکہ بی جے پی کسی بھی قیمت پر لوک سبھا انتخابات جیتنا چاہتی ہے،اوراس کیلئے وہ فرقہ وارانہ ہم آہنگی کو بگاڑنے کیلئے تمام حربے استعمال کر رہی ہے۔ انہوں نے کہاکہ یہ لوگ کئی معاملات پرہندوؤں اور مسلمانوں کے درمیان دراڑ پیدا کرنے کی کوشش میں ہیں جس سے صاف ظاہر ہوتاہے کہ یہ لوگ فرقہ وارانہ ہم آہنگی نہیں چاہتے۔ایک اورسوال کے جواب میں ڈاکٹرفاروق نے کہاکہ مجھے امید ہے کہ ان حالات سے ہندوستان کے دانشمند شہری اور قیادت نمٹ لے گی، ورنہ ملک کو زبردست خطرہ لاحق ہو جائے گا۔انہوں نے کہاکہ مجھے لگتا ہے کہ ملک کو باہر سے نہیں بلکہ اندر سے زیادہ خطرہ ہے۔

اس سوال کہ پاکستان نے پلوامہ حملہ میں اپنا ہاتھ ہونے سے انکار کیا ہے۔ ان کا کہنا ہے کہ ہندوستان بغیر کسی ثبوت کے الزام لگا رہا ہے، اس پر آپ کی کیا رائے ہے؟،کے جواب میں سابق وزیراعلیٰ نے کہاکہ جہاں تک پاکستانی حکومت کا سوال ہے میں کچھ نہیں کہہ سکتا کہ وہ کیا چاہتی ہے! لیکن اس میں کوئی شک نہیں ہے کہ جیش محمد کے ملی ٹینٹ یہاں فعال ہیں اور پلوامہ جیسے حملے کر رہے ہیں۔ انہوں نے کہاکہ دراصل یہ لوگ (جیش محمد) آنے والے وقت میں بی جے پی کو مضبوط کرنے کا کام کر رہے ہیں۔’مسئلہ کشمیر کا سیاسی حل کیا ہو سکتا ہے‘؟ سوال کاجوا ب دیتے ہوئے ڈاکٹرفاروق کاکہناتھا’’دیکھئے، کسی بھی مسئلہ کا سیاسی حل اس وقت تک نہیں ہو سکتا جب تک ہم بات نہیں کریں گے۔ ہم تمام معاملات پر آپس میں بات کریں، تبھی حل نکل سکتا ہے‘‘۔انہوں نے واضح کیاکہ ہم یہ نہیں کہہ سکتے کہ یہ مناسب حل ہے باقی غلط۔ مسئلہ کا حل تبھی نکلے گا جب دل سے بات ہوگی۔ لیکن اگر مرکز بات ہی نہیں کرنا چاہیے اور صرف چناو جیتنا ہی اس کا مقصد ہو تو کچھ بھی تبدیل نہیں ہوگا۔

انسدادملی ٹنسی آپریشن کے حوالے سے پوچھے گئے ایک سوال کے جواب میں نیشنل کانفرنس کے صدرکاکہناتھاکہ جو لوگ یہ سمجھتے ہیں کہ اس سے ملی ٹنسی ختم ہو سکتی ہے وہ مغالطہ میں ہیں۔اُن کے بقول میں نے وزیر داخلہ راج ناتھ سنگھ کی طرف سے بلائی گئی پارلیمانی کمیٹی کی میٹنگ میں بھی یہ بات کہی تھی۔،اوریہ کہ میں نے کہا تھا کہ ایسا سوچنا بے وقوفی ہے کہ ملی ٹنسی ختم ہو گئی اور اب کبھی سر نہیں اٹھائے گی۔ کشمیر میں ملی ٹنسی تبھی ختم ہو سکتی ہے جب مسئلہ کا سیاسی حل نکالا جائے۔

اس سوال کے جواب میں کہ’وزیر اعظم نریندر مودی نے کہا کہ سیکورٹی فورسز کو کھلی چھوٹ دے دی گئی ہے۔ آپ کو کیا لگتا ہے کہ اس کا اثر کیا ہوگا؟‘کاجواب دیتے ہوئے سابق مرکزی وزیرڈاکٹرفاروق کاکہناتھاکہ وہ (مودی) ایسی باتیں اسلئے کرتے ہیں کیونکہ اُنہیں معلوم ہے کہ وہ خود کچھ نہیں کر سکتے۔ اس لئے وہ سیکورٹی فورسز کو کھلی چھوٹ دینے کی باتیں کر رہے ہیں۔اسے جڑے سوال کہ ’کیا اس سے وادی الگ تھلگ ہوگی؟‘کے جواب میں ڈاکٹرفاروق نے سوالیہ اندازمیں کہا’’آپ کیا سمجھتے ہیں کہ مرکز کو اس کی فکر ہے، اُنہیں اس کی ذرا بھی پروا نہیں ہے۔ وہ صرف لوگوں کو بے وقوف بنانا جانتے ہیں تاکہ اقتدار میں بنے رہیں‘‘۔ایک اورسوال کاجواب دیتے ہوئے سابق وزیراعلیٰ کاکہناتھا’’میں نے کبھی نہیں کہا کہ صرف حریت کے رہنماؤں سے بات کی جائے۔ سبھی سے بات ہونا ضروری ہے‘‘۔کشمیرنیوز سروس کے مطابق انہوں نے کہاکہ میرا سیدھا سوال ہے کہ جموں و کشمیر کے تمام حلقوں کو کیوں نظر انداز کیا جا رہا ہے، ان کے مشوروں کو کیوں نہیں دیکھتے؟ وہ کشمیر کو خود مختاری کیوں نہیں دیتے؟ ہماری خود مختاری آئین سے باہر نہیں ہے۔

اس سوال کہ ’دفعہ 35 اے کو سپریم کورٹ میں چیلنج دیا گیا ہے،اور اگر سپریم کورٹ جموں و کشمیر کے لوگوں کوملے خصوصی حقوق ختم کر دیتا ہے تو اس کے کیا اثرات مرتب ہوں گے؟‘کے جواب میں ڈاکٹرفاروق نے کہاکہ میرا خیال ہے کہ کشمیر کے لوگ کن سانحوں سے دو چار ہیں اس کی سمجھ سپریم کورٹ کو ہے۔ مجھے امید ہے کہ سمجھداری بھرا فیصلہ ہوگا، میں صرف اتنا ہی کہہ سکتا ہوں۔ سپریم کورٹ کی اپنی حدود ہیں۔ انہوں نے کہاکہ میں امید کرتا ہوں کہ عزت مآب عدالت عظمیٰ اس بات کو سمجھتی ہے کہ دفعہ 35 اے کو ہٹانے سے کیا اثر پڑے گا۔

کے این ایس