برصغیر کی دو ایٹمی طاقتیں ہند وستان اور پاکستان کی افواج کے درمیان گزشتہ ایک ہفتے سے حدمتارکہ (لائن آف کنٹرول )پر جھڑپوں کا سلسلہ جاری ہے جسکے نتیجے میں کپوارہ میں 3 عام شہری ہلاک اورمتعدد عام شہری زخمی ہوئے، جبکہ دونوں فریق لڑائی شروع کرنے کا الزام ایک دوسرے پر عائد کر رہے ہیں ۔

کے این ایس کے مطابق طرفین کے مابین کا تازہ گولہ باری کا تبادلہ ضلع پونچھ کے قصبہ اور کیرنی سیکٹروں میں ہوا ،جس دوران دونوں ممالک کی افواج نے ایک دوسرے پر جنگی ہتھیاروں کا استعمال کیا ۔ جموں میں مقیم دفاعی ترجمان نے بتایا کہ اتوار 1بجکر 40منٹ پر پاکستانی رینجروں نے پونچھ کے قصبہ اور کیرنی سیکٹروں میں سیز فائر سمجھوتے کی خلاف ورزی کرتے ہوئے فائرنگ کی مارٹر گولے داغے ۔

انہوں نے کہا کہ پاکستانی فوج نے فوج کے اگلی مو رچوں اور آبادی والے علاقوں کو نشانہ بنایا ۔ ان کا کہناتھا کہ پاکستان کی کارروائی میں بھارتی فوج یا آبادی کو کوئی نقصان نہیں ہوا ۔ دفاعی ترجمان نے بتایا کہ پاکستانی فوج کی جانب سے مسلسل کی جارہی سیز فائر سمجھوتے کی خلاف ورزیوں کا بھر پور جواب دیا جارہا ہے،تاہم قصبہ میں ایک عام شہری شوکت احمد ولد جلال الدین ساکنہ قصبہ زخمی ہوا ۔

ان کا کہناتھا کہ گزشتہ کئی د نوں سے پاکستانی فوج لائن آف کنٹرول پر شدید گولہ باری کی جس دوران پاکستانی فوج نے ہیرا نگر کٹھوعہ ،بالاکوٹ پونچھ اور دیگر کئی سیکٹروں میں گولہ باری کی ،جس کا بھر پور جواب دیا جارہا ہے ۔ بالا کوٹ میں ایک خاتون کے زخمی ہونے کی اطلاع ہے جبکہ کئی رہائشی ڈھانچوں کو نقصان بھی پہنچا اور مویشی بھی ہلاک ہوئے ۔ اس کے علاوہ کھیتوں کو باری گولہ باری کے نتیجے میں نقصان پہنچا ۔

اس دوران نامہ نگار نے پونچھ سے اطلاع دی ہے کہ مینڈھر تحصیلدار کی قیادت میں تحصیل انتظامیہ کی ایک ٹیم نے اتوار کو بالا کوٹ میں ایل او سی شیلنگ کے نتیجے میں رہائشی مکانات کو پہنچے نقصانات کا جائزہ لیا ۔ انہوں نے متاثرین کی یقین دہانی کرائی کہ انتظامیہ اُنہیں ہر طرح کی سہولیت فراہم کرے گی ۔ ادھر پاکستانی میڈیا رپورٹسکے مطابق پاکستان فوج کے ترجمان میجر جنرل بابر افتخار نے بتایا ہے کہ بھارتی فورسز کی جانب سے گزشتہ 24 گھنٹوں کے دوران لائن آف کنٹرول کے ساتھ چری کوٹ، شکر گڑھ اور ورکنگ باوَنڈری پرگولہ باری کی گئی ۔ انہوں نے کہا کہ بھارتی افواج جان بوجھ کر سویلین آبادی کو نشانہ بنا رہی ہے، بھارتی اشتعال انگیزی سے چری کوٹ سیکٹر میں 35 سال کا شہری اور شکر گڑھ کے گاؤں ننگل کا 57 سالہ بزرگ شدید زخمی ہوا ۔

واضح رہے کہ بھارتی فوج کی جانب سے سیز فائر معاہدے کی خلاف ورزیاں جاری ہیں ۔ بھارتی فوج نے گزشتہ روز بھی شاردہ، شاہ کوٹ، ڈھڈیال سیکٹر پر بلا اشتعال گولہ باری کی جب کہ چند روز قبل بھی پاک فوج نے لائن آف کنٹرول کی خلاف ورزی پر بھارتی کواڈ کاپٹر کو مار گرا یا تھا ۔ ادھر سرینگر میں مقیم دفاعی ترجماننے پاکستانی فوج پر ’جنگ بندی لائن کی قریب اگلے مورچوں اور دیہات پر حملے کرکے لڑائی کے آغاز‘ کا الزام لگایا ہے ۔ انہوں نے کہ’پاکستانی افواج نے ہفتے کی صبح پھر سے جارحیت شروع کی اور چھوٹے ہتھیاروں سے شدید نوعیت کی شیلینگ کی، جسکا بھارتی فوج نے مناسب جواب دیا‘ ۔ لائن آف کنٹرول (ایل او سی) پر حالیہ برسوں میں دونوں ملکوں کے درمیان جھڑپیں ایک معمول بن گئی ہیں ،دونوں ملکوں کے درمیان کشیدگی خاص طور پر اگست 2019 کے بعد سے بہت بڑھی ہے، جب مرکزی حکومت نے جموں وکشمیر کی نیم خود مختار حیثیت ختم کر دی، جو آئین ہندکے تحت ملی ہوئی تھی ۔ پاکستان نے اس اقدام کو اقوام متحدہ کی کشمیر پر قراردادوں اور دو طرفہ معاہدوں کی خلاف ورزی قرار دیتے ہوئے مسترد کیا ہے ۔

پاکستان نے اپنے قریبی اتحادی چین کی مدد سے یہ معاملہ اقوام متحدہ کی سلامتی کونسل میں اٹھایا ۔ لیکن، نئی دہلی نے اسے غیر ملکی مداخلت قرار دیا اور کہا ہے کہ کشمیر کو دی گئی حیثیت کو ختم کرنا اس کا اندرونی معاملہ ہے ۔ ادھر شام دیر گئے ملی تفصیلات کے مطابو چوکی بل سیکٹر میں آر پار گولہ باری کے نتیجے میں ایک خاتون ہلاک ہوگئیں ،جسکی شناخت شمیمہ بانو کے بطور ہوئی ۔ تاہم بعض اطلاعات کے مطابق کپوارہ کے مذکورہ سیکٹر میں 3عام شہری ہلاک اور متعدد زخمی ہوئے ۔ بتایا جاتا ہے کہ مہلوکین میں 2بچے بھی شامل ہیں ۔ یہاں صورتحال انتہائی کشیدہ بتائی جارہی ہے ۔