تل ابیب،اسرائیلی وزیراعظم بنیامین نیتن یاہو نے امریکا اور ایران کے درمیان مفاہمتی یادداشت طے ہوجانے کے باوجود لبنان سے اپنی فوجیں واپس بلانے سے صاف انکار کردیا۔عالمی خبر رساں ادارے کے مطابق اس فیصلے کا اعلان اسرائیلی

وزیراعظم بنیامین نیتن یاہو نے ایک سرکاری تقریب سے خطاب کرتے ہوئے کیا۔انھوں نے دوٹوک انداز میں کہا کہ معاہدے اور بین الاقوامی دباؤ کے باوجود اسرائیلی فوج جنوبی لبنان سے واپس نہیں ہٹے گی۔اسرائیلی وزیراعظم نیتن یاہو کا مزید کہنا تھا کہ جب تک اسرائیل کی سلامتی کا تقاضا ہوگا جنوبی لبنان میں قائم سکیورٹی زون برقرار رکھا جائے گا۔

انھوں نے کہا کہ شمالی اسرائیل کے شہروں میں امن اور خوشحالی کی بحالی حکومت کی اولین ترجیح ہے اور اس مقصد کے لیے جنوبی لبنان میں اسرائیلی فوج کی موجودگی ناگزیر ہے۔

انہوں نے زور دیکر کہا کہ ہم شمالی شہروں میں سیکیورٹی اور خوشحالی بحال کریں گے اس کے لیے جنوبی لبنان میں سیکیورٹی زون برقرار رکھنا ضروری ہے اور جب تک اسرائیل کی سلامتی کا تقاضا ہوگا ہم وہاں سے نہیں جائیں گے۔یاد رہے کہ امریکی صدر ڈونلڈ ٹرمپ نے حال ہی میں حزب اللہ کے خلاف اسرائیلی کارروائیوں کو ضرورت سے زیادہ جارحانہ قرار دیا تھا اور یہ محاذ شامی صدر احمد الشرح کے حوالے کرنے کی تجویز دی تھی۔

دریں اثنا ایران نے بھی امریکا کے ساتھ ہونے والے مفاہمتی معاہدے میں جنوبی لبنان سے مکمل اسرائیلی انخلا کو ایک بنیادی شرط قرار دیا ہے۔امریکا اور ایران کے درمیان گزشتہ روز دستخط ہونے والی مفاہمتی یادداشت میں بھی لبنان سمیت تمام جنگی محاذ بند کرنے کی شق شامل ہے تاہم اسرائیل اس معاہدے کا فریق نہیں ہے اور اس نے واضح کیا ہے کہ وہ خود کو اس کی شرائط کا پابند نہیں سمجھتا۔

یواین آئی ۔م ا ع

سرینگر، جموں و کشمیر قانون ساز اسمبلی کی ماحولیاتی کمیٹی نے جموں و کشمیر میں بڑھتی ہوئی پلاسٹک آلودگی پر شدید تشویش ظاہر کرتے ہوئے حکومت سے سنگل یوز پلاسٹک سمیت تمام پلاسٹک مصنوعات کے استعمال پر سخت پابندی عائد کرنے کا مطالبہ کیا ہے۔

کمیٹی کے چیئرمین ایم وائی تاریگامی نے کہا کہ پلاسٹک کا بے دریغ استعمال ماحولیات، آبی ذخائر، عوامی صحت اور ماحولیاتی توازن کے لیے سنگین خطرہ بن چکا ہے۔

انہوں نے عمر عبداللہ سے اپیل کی کہ ماحولیاتی تحفظ، عوامی صحت اور پائیدار ترقی کے مفاد میں پورے جموں و کشمیر میں پلاسٹک کے استعمال پر مکمل پابندی کے لیے ایگزیکٹو آرڈر جاری کیا جائے۔

کمیٹی نے جے کے کے پی سی سی کو ہدایت دی کہ سیاحتی مقامات، مذہبی زیارت گاہوں اور حساس ماحولیاتی علاقوں میں سنگل یوز پلاسٹک کے خلاف قوانین پر سختی سے عمل درآمد کرایا جائے۔

اجلاس میں اراکین نے متفقہ طور پر زور دیا کہ (ایس ایم سی ) اور (ج ایم سی) سمیت تمام متعلقہ ادارے مل کر جموں و کشمیر کو پلاسٹک سے پاک بنانے کے لیے مشترکہ اقدامات کریں۔

کمیٹی نے سرکاری دفاتر، اجلاسوں اور عوامی تقریبات میں بھی پلاسٹک کے استعمال کی حوصلہ شکنی کرنے کی سفارش کی۔

اس دوران مختلف شہری بلدیاتی اداروں کے صفائی کارکنوں کی غیر معینہ مدت کی ہڑتال کا بھی جائزہ لیا گیا۔ کمیٹی نے انہیں شہری خدمات کا اہم حصہ قرار دیتے ہوئے متعلقہ حکام کو ہدایت دی کہ احتجاجی ملازمین سے فوری مذاکرات کر کے ان کے مطالبات ہمدردی کے ساتھ حل کرنے کی کوشش کی جائے۔

یواین آئی۔م ا ع

جموں، جموں و کشمیر میں گرمیوں کی تعطیلات اور مقدس امرناتھ یاترا کے پیشِ نظر مسافروں کی حفاظت اور سلامتی کو ترجیح دیتے ہوئے جموں توی ریلوے اسٹیشن پر خصوصی سکیورٹی اور سخت تلاشی مہم چلائی گئی۔

اس مہم میں گورنمنٹ ریلوے پولیس (جی آر پی)، ریلوے پروٹیکشن فورس (آر پی ایف) اور کمرشیل محکمہ کے ٹکٹ چیکنگ عملے نے مشترکہ طور پر حصہ لیا۔

جموں ریلوے ڈویژن کے سینئر ڈویژنل کمرشیل منیجر (ایس ڈی سی ایم) اُچت سنگھل نے جمعرات کو کہا کہ جموں توی ریلوے اسٹیشن پر مسافروں کی بڑھتی ہوئی تعداد کے ساتھ ان کی حفاظت اور سلامتی سب سے بڑی ترجیح ہے۔

جموں کے ایس ڈی سی ایم مسٹر سنگھل نے کہا، “موسم گرما کی تعطیلات اور یاترا کے موسم کے دوران، جموں اسٹیشن پر مسافروں کی تعداد میں کئی گنا اضافہ ہو جاتا ہے۔ ایسے حالات میں مسافروں کی سہولت کے ساتھ ساتھ ان کی حفاظت ہماری اولین ترجیح ہے۔ جی آرپی، آرپی ایف اور ٹکٹ چیک کرنے والے اہلکاروں کی یہ مشترکہ مہم اس سمت میں ایک قدم ہے۔ ہمارا مقصد یہ یقینی بنانا ہے کہ ہر سیاح اور تیرتھ یاتری محفوظ طریقے سے اور بغیر کسی پریشانی کے سفر کرسکے۔ ہم مسافروں سے اپیل کرتے ہیں کہ وہ صرف درست ٹکٹ کے ساتھ سفر کریں اور اسٹیشن پر دستیاب سہولیات کا صحیح استعمال کریں۔” انہوں نے کہا کہ جموں ڈویژن اس سفری مدت کے دوران مسافروں کو ہر ممکن مدد فراہم کرنے کے لیے پرعزم ہے۔

یواین آئی۔الف الف