پیرس، امریکی صدر ڈونلڈ ٹرمپ نے کہا ہےکہ ایران معاہدہ دوسرے مرحلے میں داخل ہوگیا ہے اور ہم افزودہ یورینیم حاصل کرنا چاہتے ہیں۔

فرانس میں جی سیون اجلاس کے موقع پر امریکی صدر ٹرمپ کی امیر قطر سے ملاقات ہوئی جہاں میڈیا سے گفتگو کرتے ہوئے ٹرمپ نے کہا کہ قطر نے جس طرح معاملات کو سنبھالا میں اس سے خوش ہوں، میرے خیال میں ایران سے منصفانہ ڈیل ہوئی ہے تاہم ہم وہاں کوئی سرماریہ کاری کرنے نہیں جارہے۔

امریکی صدر نے کہا کہ ایران معاہدہ دوسرے مرحلے میں داخل ہوگیا ہے، ہم ایران کا افزودہ یورینیم حاصل کرنا چاہتے ہیں، میرے لیے سب سے اہم یہ ہےکہ ایران کے پاس کبھی ایٹمی ہتھیار نہ ہوں اور معاہدے کے تحت ایران کے پاس کبھی جوہری ہتھیار نہیں ہوں گے، اگر ایران جوہری ہتھیار حاصل کرنے کی کوشش کرے گا توایران کو تباہ کردیں گے۔

امریکی صدر کا کہنا تھا کہ لبنان کی جنگ کو نسبتاً معمولی تنازع سمجھتا ہوں، اسرائیل کو تجویز دی ہے کہ حزب اللہ سے نمٹنے کی ذمہ داری شام کو سونپی جائے، اسرائیل کو بتایا تھا کہ مجھے بیروت پر اسرائیلی حملہ پسند نہیں آیا، اگر اسرائیل یہ کام دوسرے لوگوں کو مارے بغیر نہیں کر سکتا تو پھر شام کو یہ کام کرنا چاہیے۔

صدر ٹرمپ نے کہا کہ روس کوبھی یوکرین سے معاہدہ کرنا چاہیے، آج یوکرینی صدر زیلنسکی سے ملاقات ہو ئی۔

یو این آئی۔ ع ا۔

تل ابیب، اسرائیلی وزیراعظم نیتن یاہو نے کہا ہے کہ ایران معاہدے کے ساتھ یا بغیر کبھی جوہری ہتھیار حاصل نہیں کرسکتا۔

نیتن یاہو نے ایران امریکا ڈیل پر رد عمل ظاہر کرتے ہوئے کہا کہ امریکی صدر ڈونلڈ ٹرمپ اور وہ ساتھی ہیں، کبھی متفق ہوتے ہیں کبھی اختلاف ہوتا ہے۔ ان کا کہنا تھا کہ معاہدے کے ساتھ یا بغیر ایران کبھی جوہری ہتھیار حاصل نہیں کرسکتا، ایران کو جوہری ہتھیار حاصل کرنے سے روکنے کے لیے جو ہوسکا کریں گے۔

دوسری جانب لبنان کے حوالے سے بات کرتے ہوئے اسرائیلی وزیراعظم نے کہا کہ لبنان میں بنائے گئے سکیورٹی زون میں اسرائیل کی موجودگی برقرار رہے گی، ہم نے اسرائیل کو تباہی سے بچالیا لیکن ہماری جدوجہد ابھی ختم نہیں ہوئی۔ نیتن یاہو نے اسرائیل میں رواں برس ہونے والے انتخابات میں حصہ لینے کا اعلان کرتے ہوئے جیتنے کا دعویٰ بھی کیا ہے۔

یو این آئی۔ ع ا۔

واشنگٹن، امریکہ نے اعلان کیا ہے کہ ایران کے ساتھ امن معاہدے کے تحت بحری جہاز آبنائے ہرمز سے بغیر کسی ٹیکس یا فیس کے گزریں گے۔

امریکہ نے اس بات پر بھی زور دیا ہے کہ تہران کو کوئی بھی معاشی فائدہ حاصل کرنے سے پہلے اپنے وعدوں کو پورا کرنا ہوگا۔ ایک اعلیٰ امریکی اہلکار نے صحافیوں کو بتایا کہ ان فوائد میں جنگ سے متاثرہ ملک ایران کے لیے 300 ارب ڈالر کا ایک امدادی فنڈ بھی شامل ہو سکتا ہے تاہم، اس فنڈ کا جاری ہونا مکمل طور پر ایران کی “کارکردگی” سے مشروط ہوگا۔

اہلکاروں کے مطابق، امریکی صدر ڈونلڈ ٹرمپ، نائب صدر جے ڈی وینس اور ایرانی پارلیمان کے اسپیکر محمد باقر قالیباف نے اتوار کے روز اس ابتدائی معاہدے پر ڈیجیٹل طور پر دستخط کیے۔ ایک امریکی اہلکار نے نام نہ بتانے کی شرط پر کہا کہ صدر ٹرمپ اس پر خود دستخط کرنا چاہتے تھے تاکہ وہ اس امن عمل کے لیے اپنی سنجیدگی دکھا سکیں۔ نائب صدر جے ڈی وینس نے سی این این کو بتایا کہ یہ معاہدہ تقریباً ڈیڑھ صفحے کا ہے، اس لیے یہ ایک بہت ہی عمومی اور بنیادی دستاویز ہے۔”

وینس اس ہفتے مذاکرات کی قیادت کریں گے اور سوئٹزرلینڈ کے شہر جنیوا میں ہونے والی دستخطوں کی تقریب میں شرکت کریں گے۔ اس دستخط کے ساتھ ہی 60 دنوں کا وقت شروع ہو جائے گا، جس کے دوران ایران اور امریکہ ایک مکمل امن معاہدے تک پہنچنے کی کوشش کریں گے۔

ایک امریکی اہلکار نے بتایا کہ ہم جوہری پروگرام کے مذاکرات کو سب سے اوپر رکھنا چاہتے ہیں لیکن تیل کی قیمتوں میں اضافے اور عالمی معیشت پر اثرات کی وجہ سے آبنائے ہرمز کا راستہ کھولنا سب سے پہلی ترجیح ہے۔ وینس نے سی این بی سی کو بتایا کہ ایران کے ساتھ یہ طے پایا ہے کہ یہ بحری راستہ طویل مدت کے لیے بالکل مفت کھولا جائے گا، اور تکنیکی مذاکرات میں اسی بات کو حتمی شکل دی جائے گی۔ ڈونلڈ ٹرمپ نے خود کہا کہ یہ اہم راستہ جمعہ سے مکمل طور پر کھل جائے گا، لیکن انہوں نے یہ بھی کہا کہ ابھی سمندری بارودی سرنگوں کو صاف کرنے کا کام جاری ہے۔

ایک امریکی اہلکار نے کہا کہ بحری جہازوں کی آمد و رفت اگلے چند ہفتوں میں جنگ سے پہلے کے معمول پر واپس آ جانی چاہیےلیکن ابھی سے ٹریفک میں بڑا اضافہ دیکھا گیا ہے۔ دوسری طرف، ایران کی وزارت خارجہ نے پیر کے روز کہا کہ اس معاہدے کے تحت وہ آبنائے ہرمز سے گزرنے والے جہازوں پر کوئی ٹیکس یا “ٹول” نہیں لگائے گا بلکہ صرف “بحری خدمات کی فیس” وصول کرے گا۔

یو این آئی۔ ع ا۔