سرینگر، پولیس نے منگل کے روز جاری نشہ مکت جموں و کشمیر ابھیان کے تحت اونتی پورہ اور سرینگر میں علیحدہ کارروائیوں کے دوران تین مبینہ منشیات فروشوں کی تقریباً 4 کروڑ روپے مالیت کی جائیدادیں ضبط کر لیں۔

جنوبی کشمیر کے ذیلی ضلع اونتی پورہ میں پولیس نے چرسو، اونتی پورہ کے رہائشی نثار احمد خانڈے کے دو منزلہ رہائشی مکان اور 7 کنال 18 مرلہ اراضی کو، جس کی مالیت تقریباً 2.50 کروڑ روپے بتائی گئی ہے، ضبط کر لیا۔

یہ کارروائی انسدادِ منشیات و نفسیاتی اثرات رکھنے والے مادوں کے قانون (این ڈی پی ایس ایکٹ) کی دفعہ 68-ایف کے تحت عمل میں لائی گئی۔

پولیس کے مطابق ٹول پلازہ پولیس پوسٹ کے انچارج کی جانب سے سینئر افسران کی نگرانی میں کی گئی تحقیقات سے ثابت ہوا کہ مذکورہ جائیداد منشیات اور نفسیاتی اثرات رکھنے والے ممنوعہ مادوں کی غیر قانونی اسمگلنگ سے حاصل ہونے والی آمدنی سے خریدی گئی تھی۔ خانڈے متعدد منشیات سے متعلق مقدمات میں ملوث بتایا جاتا ہے۔

دریں اثنا، سرینگر پولیس نے این ڈی پی ایس ایکٹ 1985 کی دفعات کے تحت دو مبینہ منشیات فروشوں کی 1.5 کروڑ روپے مالیت کی غیر منقولہ جائیدادیں بھی ضبط کر لیں۔

بٹمالو پولیس اسٹیشن نے سکندر فردوس کے نام پر مسلم آباد، نندریش کالونی، سرینگر میں واقع تقریباً 80 لاکھ روپے مالیت کے تین منزلہ رہائشی مکان کو این ڈی پی ایس ایکٹ کی دفعہ 68F(1) مع دفعہ 68E کے تحت ضبط کیا۔ ملزم ایف آئی آر نمبر 18/2022 میں این ڈی پی ایس ایکٹ اور تعزیراتِ ہند (آئی پی سی) کی مختلف دفعات کے تحت نامزد ہے۔

ایک اور کارروائی میں کرال کھڈ پولیس اسٹیشن نے غلام حسن بھٹ ساکن میرگنڈ کنالوان، بجبہاڑہ، اننت ناگ کے تقریباً 70 لاکھ روپے مالیت کے ایک منزلہ رہائشی مکان کو ضبط کیا۔ بھٹ این ڈی پی ایس ایکٹ کے تحت درج ایف آئی آر نمبر 20/2022 میں ملزم ہے اور اس وقت ضمانت پر ہے۔

پولیس کا کہنا ہے کہ تحقیقات سے معلوم ہوا کہ ضبط شدہ جائیدادیں منشیات کی اسمگلنگ سے حاصل شدہ آمدنی سے خریدی گئی تھیں۔

جاری۔یواین آئی۔ ظ ا

جموں، ناردرن ریلوے کے جموں ڈویژن نے پٹھانکوٹ، پنجاب سے لیچی پارسل لوڈنگ سروس میں ایک اور کامیابی حاصل کرتے ہوئے پٹھانکوٹ کینٹ ریلوے اسٹیشن سے 8.3 ٹن لیچی لوڈ کر کے ایس ایل آر کے ذریعے ملک کے مختلف اہم ریلوے اسٹیشنوں، جن میں باندرہ ٹرمینس، سورت، سہارنپور اور احمد آباد شامل ہیں، روانہ کی ہے۔

جاری کردہ بیان کے مطابق لیچی کے سیزن کے دوران مختلف مقامات کے لیے پارسل لوڈنگ سروس مسلسل جاری ہے اور یہ مقامی کسانوں اور تاجروں کے لیے ایک قابلِ اعتماد ذریعۂ نقل و حمل بن چکی ہے۔ تازہ پھل پارسل وینوں کے ذریعے کم وقت میں اور محفوظ طریقے سے ملک کے مختلف حصوں تک پہنچائے جا رہے ہیں۔

اس کامیاب ترسیل پر سینئر ڈویژنل کمرشل منیجر اوچت سنگھل نے کہا کہ جموں ڈویژن زرعی مصنوعات کی نقل و حمل کو ترجیح دے رہا ہے۔ ان کے مطابق پارسل لوڈنگ سروس نہ صرف کسانوں کی آمدنی میں اضافہ کر رہی ہے بلکہ ’’کسان ریل‘‘ کے تصور کو بھی عملی شکل دے رہی ہے۔انہوں نے زیادہ سے زیادہ کسانوں سے اس سہولت سے فائدہ اٹھانے کی اپیل کی۔

انہوں نے بتایا کہ لیچی کے سیزن کے دوران پارسل وینوں اور لوڈنگ و اَن لوڈنگ کے لیے خصوصی انتظامات کیے گئے ہیں تاکہ کسانوں کو کسی قسم کی دشواری کا سامنا نہ کرنا پڑے۔

سنگھل نے پارسل لوڈنگ سروس کے فوائد بیان کرتے ہوئے کہا کہ اس کے ذریعے تیز رفتار ترسیل، کم لاگت، وسیع منڈیوں تک رسائی اور سامان کی حفاظت و بھروسے مندی یقینی بنتی ہے۔

یواین آئی۔ ظ ا

سری نگر، جموں و کشمیر کے ضلع گاندربل میں رواں سال ایک مبینہ انکاؤنٹر میں مارے گئے 30 سالہ راشد احمد مغل کی لاش تقریباً ڈھائی ماہ بعد قبر سے نکال کر ان کے اہلِ خانہ کے حوالے کر دی گئی۔خاندان کے مطابق راشد کی باقیات 13 جون کو قبر سے نکالی گئیں اور اہلِ خانہ کے سپرد کی گئیں، جس کے بعد اسی رات گاندربل کے لَر علاقے کے گاؤں چُنٹ ولی وار میں واقع آبائی قبرستان میں دوبارہ تدفین کی گئی۔ تدفین میں صرف چند قریبی رشتہ دار شریک ہوئے۔

سینئر حکام نے تصدیق کی کہ لاش قبر سے نکالنے کے بعد خاندان کے حوالے کی گئی اور پھر ان کے آبائی گاؤں میں دوبارہ دفن کیا گیا۔ ضلع گاندربل کے ڈپٹی کمشنر نے لاش کو قبر سے نکالنے کا حکم جاری کیا تھا۔

راشد 31 مارچ کو گاندربل کے ایک جنگلاتی علاقے میں مارے گئے تھے۔ فوج کے سری نگر میں قائم چنار کور نے سوشل میڈیا پلیٹ فارم ایکس پر بتایا تھا کہ فوج اور جموں و کشمیر پولیس نے علاقے میں مشترکہ تلاشی آپریشن شروع کیا تھا، جس دوران اہلکاروں نے مشتبہ سرگرمی دیکھی۔

فوج کے مطابق، “چیلنج کیے جانے پر دہشت گردوں نے فائرنگ کی، جس کا ہماری فورسز نے جواب دیا۔”

فوج نے آپریشن میں ایک “دہشت گرد” کے مارے جانے کی اطلاع دی تھی۔ بیان میں کہا گیا تھا کہ 31 مارچ 2026 کی رات وقفے وقفے سے فائرنگ کے دوران محاصرہ دوبارہ منظم کیا گیا اور فورسز کی مؤثر جوابی کارروائی کے نتیجے میں ایک دہشت گرد ہلاک ہوگیا۔

تاہم اس واقعے کے بعد نہ فوج اور نہ ہی پولیس نے مبینہ انکاؤنٹر کے بارے میں مزید کوئی تفصیلات جاری کیں۔

دوسری جانب راشد کے اہلِ خانہ نے فوج کے دعوے کو سختی سے مسترد کرتے ہوئے کہا کہ وہ ایک بے گناہ شہری تھے اور انہیں ایک فرضی انکاؤنٹر میں قتل کیا گیا۔ ان کے بھائی اعجاز مغل نے لاش کی شناخت کرتے ہوئے دعویٰ کیا کہ راشد کو ایسے کپڑے اور جوتے پہنائے گئے تھے جو ان کے نہیں تھے۔

واقعے کے ایک روز بعد جموں و کشمیر کے لیفٹیننٹ گورنر منوج سنہا نے اس معاملے کی مجسٹریل تحقیقات کا حکم دیا تھا۔ اگرچہ تحقیقات مکمل ہو جانی چاہئیں تھیں، لیکن اب تک اس کی کوئی رپورٹ یا نتائج عوام کے سامنے نہیں لائے گئے ہیں۔

راشد کی موت کے بعد انہیں ضلع کپواڑہ کے اس قبرستان میں دفن کیا گیا تھا جو انکاؤنٹرز میں مارے جانے والے عسکریت پسندوں کے لیے مخصوص ہے۔ کووڈ-19 وبا کے بعد سے جموں و کشمیر پولیس ایک پالیسی کے تحت ہلاک شدہ انتہا پسندوں کو ان کے آبائی علاقوں سے دور مخصوص قبرستانوں میں دفن کرتی رہی ہے اور بڑے جنازوں سے بچنے کے لیے عموماً صرف قریبی رشتہ داروں کو شرکت کی اجازت دی جاتی ہے۔

یواین آئی۔ ظ ا