خبراردو:
وادی کے سبھی اضلاع میں جمعہ کی دوپہر سے جاری بھاری برف باری کے نتیجے میں کشمیر کا بیرون دنیا سے زمینی و فضائی رابطہ منقطع ہوچکا ہے۔ ادھر سرینگر جموں شاہراہ کے متعدد مقامات بشمول جواہر ٹنل، بانہال، شیطانی نالہ سمیت قاضی گنڈ پر بھی برف کی موٹی موٹی چادریں جمع ہونے کے نتیجے میں شاہراہ ٹریفک کی نقل و حمل کے لیے مکمل طور پر بند ہوگئی ہے جبکہ شاہراہ پر کئی مقامات پر مسافر گاڑیاں درماندہ ہوکر رہ گئی ہے۔ ادھر بھاری برف باری اور دھند کی وجہ سے سرینگر ائرپورٹ پر بھی صبح کے اوقات میں کئی پروازوں کو منسوخ کرنا پڑا جس کے نتیجے میں بیرون ریاست جانے والے مسافروں کو سخت کوفت کا سامنا کرنا پڑا۔ محکمہ موسمیات کے مطابق وادی کشمیر میں اگلے 24گھنٹوں کے دوران مزید بارشوں کا امکان ہے جبکہ بالائی علاقوں میں مزید برف باری کی پیش گوئی کی گئی ہے۔ ادھر شمالی کشمیر کے بانڈی پورہ ضلع میں ایک شخص اُس وقت جاں بحق گیا جب وہ اپنے مکان کی چھت سے برف ہٹانے میں مصروف تھا۔

وادی کشمیر کے سبھی اضلاع میں جمعہ کی دوپہرسے شروع ہوئی برف باری کے باعث کشمیر کا بیرونی دنیا سے زمینی و فضائی رابطہ مکمل طور پر منقطع ہوچکا ہے۔ تفصیلات کے مطابق سنیچر وار کو بھاری برف باری کے نتیجے میں وادی کا بیرون دنیا سے زمینی و فضائی رابطہ پوری طرح منقطع ہوگیا جس کے نتیجے میں وادی کے سبھی اضلاع میں زندگی کی رفتار مکمل طور پر تھم گئی۔محکمہ موسمیات کے مطابق وادی کے بالائی اور میدانی علاقوں جمعہ کی سہ پہر سے بھاری برف باری شروع ہوئی جو کہ سنیچر صبح تک مسلسل جاری رہی۔ محکمہ کے اعلیٰ افسران نے بتایا کہ گزشتہ کئی برسوں کے مقابلے میں امسال وادی کے میدانی علاقوں میں یہ ریکارڈ توڑ برف باری ہوئی کیوں کہ گزشتہ چند برسوں کے دوران میدانی علاقوں میں برف باری کا اثر بہت کم دیکھنے کو ملا۔

محکمہ کے مطابق سرینگر میں ہفتہ کی صبح 8بجے تک مجموعی طور پر 10انچ برف ریکارڈ کی گئی جبکہ شہرہ آفاق گلمرگ میں 2فٹ تازہ برف باری ریکارڈ کی گئی۔ انہوں نے کہا کہ اسی طرح قاضی گنڈ میں 11انچ، کوکرناگ میں 3انچ، پہلگام میں 16انچ جبکہ سرحدی ضلع کپوارہ میں 17انچ برف باری ریکارڈ کی گئی۔ادھر محکمہ ٹریفک کے مطابق وادی کے بالائی علاقوں میں بھاری برف باری ریکارڈ کی گئی جس کے نتیجے میں سرینگر جموں شاہراہ ٹریفک کی نقل و حرکت کے لیے مسدود ہوگئی۔انہوں نے بتایا کہ جمعہ سے شروع ہوئی برف باری کے نتیجے میں مغل روڑ، سرینگر لیہہ شاہراہ اور بانڈی پورہ گریز روڑ بھی گاڑیوں کی آواجاہی کے لیے بند کردی گئی جبکہ سرینگربین الاقوامی ائرپورٹ پر بھی متعدد پروازوں کو منسوخ کرنا پڑا۔ائرپورٹ انتظامیہ کے مطابق رن وے پر بھاری برف باری کی تہہ جم جانے اور یہاں دھند کی وجہ سے ہفتہ کی صبح کو کئی پروازوں کو منسوخ کرنا پڑا۔ انہوں نے کہا کہ جونہی رن وے پر برف کو ہٹایا جاتا ہے اور موسم میں نمایاں تبدیلی واقع ہوتی ہے تب ہی پروازوں کو اُڑان بھرنے کی اجازت دی جائے گی۔

ادھر سرینگر میں بھی بھاری برف باری کی وجہ سے اندرون و بیرون سڑکیں عبور و مرور کے لیے بند رہی جس دوران لوگوں کو ایک جگہ سے دوسری جگہ جانے میں سخت مشکلات کا سامنا کرنا پڑا۔معلوم ہوا ہے کہ شہر سرینگر سمیت دیگر ضلع و تحصیل صدر مقامات پر بھی سڑکوں پر برف کی موٹی موٹی چاردیں جم جانے کے نتیجے میں لوگوں کو کافی دشواریوں کا سامنا کرنا پڑا جبکہ اس دوران سڑپوں پر سے گاڑیوں کی نقل و حمل بھی دوپہر تک غائب رہی۔ ادھر وادی کے سبھی ضلع صدر مقامات پر ضلعی انتظامیہ نے اپنے ماتحت عملے کو متحرک کردیا جس دوران سنیچر کی صبح سے ہی کئی مقامات پر برف کو ہٹائے جانے والی مشینوں کو سڑکیں صاف کرتے ہوئے دیکھا گیا۔ عینی شاہدین نے بتایا کہ شہر سرینگر کے بیشتر علاقوں میں صبح 11بجے تک اندرون سڑکوں برف سے ڈھکی ہوئی تھی تاہم بعد میں انتظامیہ کے اہلکاروں نے یہاں آکر مشینوں کو کام پرلگادیا جس کے بعد ہی لوگ اپنے گھروں سے باہر آگئے۔ ادھر جمعہ کی دوپہر سے شروع ہوئی برف باری کے نتیجے میں وادی کے بیشتر علاقوں میں بجلی مکمل طور پر غائب ہے۔ معلوم ہوا ہے کہ شہر کے متعدد علاقوں اور دیگر قصبہ جات میں برف باری کے بعد بجلی مکمل طور پر منقطع کردی گئی ہے جس کے نتیجے میں عام لوگوں کوسخت مشکلات درپیش ہے۔

ادھر سرینگر جموں قومی شاہراہ پر بھاری برف باری ہونے کے بعد شاہراہ کو ٹریفک کی نقل و حمل کے لیے مکمل طور پر بند کیا گیا ہے۔ محکمہ ٹریفک کے ایک اعلیٰ اہلکار نے کشمیرنیوز سروس کو بتایا کہ جواہر ٹنل، بانہال، شیطانی نالہ سمیت قاضی گنڈ پر بھی برف کی موٹی موٹی چادریں جمع ہونے کے نتیجے شاہراہ پر گاڑیوں کی آواجاہی ناممکن ہے جبکہ برف باری کے نتیجے میں کئی مقامات پر پھسلن بھی پید اہوئی ہے۔ انہوں نے بتایا کہ شاہراہ گذشتہ روز کے دوپہر سے ہی پھسلن پیدا ہونے کی وجہ سے شاہراہ ٹریفک کی نقل وحمل کیلئے بند ہے۔ انہوں نے کہا کہ برف باری جاری رہنے کی وجہ سے محکمہ بیکن کے اہلکاروں کو بھی برف ہٹانے میں سخت مشکلات اُٹھانی پڑ رہی ہے۔ انہوں نے مزید کہا کہ اگر چہ محکمہ موسمیات نے وادی میں مزید برف باری کی پیش گوئی کی ہے لہٰذا شاہراہ کو محکمہ ٹریفک اور بیکن کی طرف سے ہری جھنڈی ملنے کے بعد ہی ٹریفک کے لیے دوبارہ کھولا جاسکتا ہے۔ادھر ذرائع سے معلوم ہوا ہے کہ برف باری کے نتیجے میں جموں کی طرف جانے والے سینکڑوں ٹرکیں اننت ناگ اور قاضی گنڈ کے مقام پر درماندہ ہوکر رہ گئی ہیں۔ معلوم ہو اکہ وادی سے جموں کی طرف کم از کم گیارہ سو مال بردار ٹرکیں اور تیل ٹینکروں نے جواہر ٹنل کو پار کرنے میں کامیابی حاصل کی۔ انہوں نے بتایا کہ وادی سے جو مسافر بردار گاڑیاں جموں اور دیگر مقامات کی جانب رواں دواں تھیں وہ اننت ناگ اور قاضی گنڈ کے مقام پر درماندہ ہوئی ہیں۔

ادھر بھاری برف باری کے نتیجے میں وادی کشمیر کے دور افتادہ علاقوں کا ضلع صدر مقامات سے مکمل طورپر رابطہ منقطع ہوچکا ہے جس کے نتیجے میں یہاں لوگوں کو عبور و مرور میں سخت مشکلات کا سامنا کرنا پڑرہا ہے۔ادھر شمالی کشمیر کے بانڈی پورہ ضلع میں ایک شخص اُس وقت جاں بحق گیا جب وہ اپنے مکان کی چھت سے برف ہٹانے میں مصروف تھا۔معلوم ہوا ہے کہ شمالی کشمیر کے بانڈی پورہ ضلع کے وارڈ نمر 4سے تعلق رکھنے والے ممتاز احمد ساکن پلان بانڈی پورہ اُس وقت جاں بحق ہوگئے جب وہ اپنے مکان پر چھت پر برف کو صاف کرنے میں مصروف تھا۔ معلوم ہوا کہ ممتاز احمد جونہی چھت پر براجمان تھا تو اسی دوران اُس کا پیر پھسل گیا جس کے نتیجے میں وہ نیچے گر پڑا۔ اس دوران یہاں موجود لوگوں نے اگر چہ ممتاز کو ضلع ہسپتال بانڈی پورہ منتقل کرنے کی کوشش کی جہاں سے ڈاکٹروں نے اُس کی نازک حالت کو مدنظر رکھتے ہوئے انہیں صورہ ہسپتال منتقل کیا تاہم اس دوران وہ راستے میں ہی دم توڑ بیٹھا۔صورہ میں موجود ڈاکٹروں کے مطابق ممتاز کو جونہی یہاں لایا گیا تو وہ دم توڑ چکا تھا۔ ادھر واقعے کے فوراً بعد ضلعی انتظامیہ نے لواحقین کے حق میں 4لاکھ روپے کا ایکس گریشیا ریلیف واگذار کیا ہے۔