ڈھاکہ، بنگلہ دیش نیشنلسٹ پارٹی (بی این پی) کے چیئرمین اور ملک کے مستقبل کے وزیر اعظم طارق رحمان نے ہفتہ کو کہا کہ ان کی پارٹی ایک ایسی خارجہ پالیسی پر عمل کرے گی جو چین، ہندوستان اور پاکستان کے ساتھ معاملات میں بنگلہ دیش کے قومی مفادات کا تحفظ کرے گی۔

ڈھاکہ ٹریبیون کے مطابق، یہاں ایک پریس کانفرنس سے خطاب کرتے ہوئے انہوں نے واضح کیا کہ بنگلہ دیش کی خارجہ پالیسی مکمل طور پر “ملک اور اس کے عوام کے وسیع تر مفادات” پر مبنی ہوگی۔

حکومت کو درپیش بڑے چیلنجوں کے بارے میں پوچھے جانے پر، مسٹر رحمان نے معیشت اور امن و امان کو ترجیحات کے طور پر بتایا۔ انہوں نے کہا کہ “ہمیں بہت سے چیلنجز درپیش ہیں۔ ہماری معیشت بحران کا شکار ہے اور امن و امان کی صورتحال تشویشناک ہے۔ ہمیں لوگوں کے تحفظ کو یقینی بنانا ہوگا۔”

عوامی لیگ کی سابقہ حکومت پر طنز کرتے ہوئے انہوں نے کہا کہ تقریباً تمام اداروں کو سیاست زدہ کر دیا گیا ہے اس لیے گڈ گورننس کو یقینی بنانا ان کی اولین ترجیح ہوگی۔

چین کے ساتھ مستقبل کے تعلقات اور بیلٹ اینڈ روڈ انیشیٹو پر بات کرتے ہوئے، بی این پی کے چیئرمین نے کہا کہ وہ صرف ان منصوبوں پر عمل کریں گے جو بنگلہ دیش کے مفاد میں ہوں۔ انہوں نے کہا کہ باہمی مفاد ہماری اولین ترجیح ہو گی۔ “اگر کوئی چیز بنگلہ دیش کے مفاد میں نہیں ہے، تو قدرتی طور پر ہم اس کا پیچھا نہیں کرسکتے۔ اگر بئ آر آئی بنگلہ دیش کو فائدہ پہنچاتا ہے اور ہماری معیشت کو سہارا دیتا ہے، تب ہی ہم فیصلہ کریں گے۔”

ساؤتھ ایشین ایسوسی ایشن فار ریجنل کوآپریشن (سارک) کو بحال کرنے کے معاملے پر، مسٹر رحمان نے کہا کہ سارک کی بنیاد بنگلہ دیش کی پہل پر رکھی گئی تھی اور وہ اسے دوبارہ فعال دیکھنا چاہتے ہیں۔ انہوں نے کہا کہ وہ دوست ممالک سے اس پر بات کریں گے۔

سابق وزیراعظم اور عوامی لیگ پارٹی کی سربراہ شیخ حسینہ کی ہندوستان سے حوالگی کے بارے میں پوچھا گیا تو انہوں نے مختصر جواب دیتے ہوئے کہا کہ یہ مکمل طور پر قانونی عمل پر منحصر ہے۔ غور طلب ہے کہ عوامی لیگ نے ان انتخابات میں حصہ نہیں لیا۔

نوجوانوں کی شرکت اور معاشی اصلاحات پر بات کرتے ہوئے، انہوں نے کہا کہ ان کی حکومت نوجوانوں سمیت معاشرے کے ہر طبقے کی آواز سنے گی۔ انہوں نے وعدہ کیا کہ ملک کی کمزور معیشت، کم سرمایہ کاری اور بڑھتی ہوئی مہنگائی سے نمٹنے کے لیے نئی حکومت نئی سرمایہ کاری لائے گی اور بڑے پیمانے پر روزگار کے مواقع پیدا کرے گی۔

مسٹر رحمان نے چین کو بنگلہ دیش کا طویل مدتی ترقیاتی شراکت دار قرار دیا اور مستقبل میں مل کر کام کرنے کے نئے شعبوں کی تلاش کی امید ظاہر کی۔

یو این آئی۔ ع ا۔