سری نگر، محرم الحرام کا آغاز بدھ سے ہونے جا رہا ہے۔ اس موقع پر جموں و کشمیر کی سابق وزیر اعلیٰ اور پی ڈی پی صدر محبوبہ مفتی نے منگل کو انتظامیہ سے مطالبہ کیا کہ عوامی تحفظ قانون (پی ایس اے) کے تحت مبینہ طور پر حراست میں لیے گئے نوجوانوں کو رہا کیا جائے اور مقدس ماہِ محرم کے پُرامن انعقاد کے لیے تمام ضروری انتظامات یقینی بنائے جائیں۔

ایک بیان میں محبوبہ مفتی نے کہا کہ محرم صرف ایک مذہبی تقریب نہیں بلکہ جموں و کشمیر کی روحانی، ثقافتی اور تاریخی وراثت کا لازمی حصہ ہے۔ انہوں نے کہا کہ انتظامیہ کو عزاداروں اور عقیدت مندوں کے لیے ٹریفک انتظامات، صحت کی سہولیات، صفائی، پینے کے پانی، بجلی اور دیگر بنیادی خدمات کی مناسب فراہمی کو یقینی بنانا چاہیے۔

انہوں نے ان اطلاعات پر تشویش ظاہر کی کہ ایران سے متعلق حالیہ پیش رفت کے خلاف مظاہروں میں شریک کئی نوجوانوں کے خلاف مبینہ طور پر پی ایس اے کے تحت مقدمات درج کیے گئے ہیں اور انہیں جموں و کشمیر سے باہر کی جیلوں میں منتقل کیا گیا ہے۔ انہوں نے اس اقدام کو ’’انتہائی تشویشناک‘‘ قرار دیتے ہوئے کہا کہ اس سے نوجوان مزید بیگانگی محسوس کر سکتے ہیں۔

محبوبہ مفتی نے کہا کہ نوجوانوں کے خلاف سخت قوانین کا استعمال، خصوصاً محرم جیسے مقدس مہینے میں، نہ صرف غیر حساس رویہ ہے بلکہ اس کے منفی نتائج بھی برآمد ہو سکتے ہیں۔

انہوں نے کہاکہ ’’محرم وہ وقت ہے جب لوگ کربلا میں دی گئی قربانیوں کو یاد کرتے ہیں۔ یہ غور و فکر، ہمدردی اور مظلوموں کے ساتھ یکجہتی کا مہینہ ہے۔ ایسے حساس وقت میں حکومت کو عوام کے ساتھ رابطہ قائم کرنا چاہیے، ان کے مسائل سننے چاہئیں اور زخموں پر مرہم رکھنا چاہیے، نہ کہ سخت اقدامات کے ذریعے ان کے دکھ میں اضافہ کرنا چاہیے۔‘‘

محبوبہ مفتی نے انتظامیہ سے مطالبہ کیا کہ ایسے تمام معاملات کا فوری جائزہ لیا جائے، زیرِ حراست افراد کو رہا کیا جائے اور مزید جبر آمیز اقدامات سے گریز کیا جائے۔ انہوں نے زور دیا کہ عوامی جذبات اور شکایات کے حل کے لیے بات چیت اور عوامی رابطہ ہی سب سے مؤثر راستہ ہے۔

انہوں نے یہ بھی مطالبہ کیا کہ یومِ عاشورہ کے جلوسوں اور روایتی محرم تقریبات کو باوقار اور پُرامن انداز میں منعقد کرنے کی اجازت دی جائے۔

اتحاد اور صبر کی اپیل کرتے ہوئے محبوبہ مفتی نے کہا کہ امام حسین علیہ السلام کی تعلیمات، جن میں انصاف، قربانی اور انسانی وقار کے اصول شامل ہیں، آج بھی نسل در نسل لوگوں کے لیے مشعلِ راہ ہیں۔

یواین آئی۔ ظ ا

سری نگر، جموں و کشمیر کے وزیر اعلیٰ عمر عبداللہ نے پیر کے روز امید ظاہر کی کہ ایران، اسرائیل اور امریکہ کے درمیان جنگ کے خاتمے کے لیے طے پانے والے عبوری امن معاہدے کو ناکام بنانے کے لیے کوئی بھی فریق ایسا قدم نہیں اٹھائے گا جس سے امن عمل متاثر ہو۔

سری نگر میں صحافیوں سے گفتگو کرتے ہوئے عمر عبداللہ نے کہا کہ معاہدے کی تفصیلات ابھی واضح نہیں ہیں اور حتمی رائے قائم کرنے سے پہلے دنیا کو مزید پیش رفت کا انتظار کرنا ہوگا۔

انہوں نے کہاکہ ’’نہ آپ جانتے ہیں اور نہ میں کہ اس امن معاہدے میں کیا شامل ہے۔ فی الحال امریکہ، ایران اور پاکستان کو کسی حد تک اس کی معلومات ہوں گی۔ ہمیں جمعہ تک انتظار کرنا ہوگا۔‘‘

انہوں نے مزید کہاکہ ’’جمعہ تک ہم امید کرتے ہیں کہ کوئی بھی اس امن معاہدے کو توڑنے کی کوشش نہیں کرے گا، لیکن ہماری خواہش ہے کہ یہ جنگ ہمیشہ کے لیے ختم ہو جائے۔‘‘

وزیر اعلیٰ نے یہ امید بھی ظاہر کی کہ خطے میں معمولاتِ زندگی بحال ہوں گے، جن میں آبنائے ہرمز (Strait of Hormuz) کا دوبارہ کھلنا بھی شامل ہے، جو خلیجی کشیدگی کے باعث متاثر ہونے والا دنیا کا ایک اہم تیل بردار بحری راستہ ہے۔

عمر عبداللہ نے مزید کہا کہ ایران کو اس جنگ کے دوران شدید نقصان اٹھانا پڑا ہے اور بمباری سے ہونے والے نقصانات کا معاوضہ ملنا چاہیے۔

انہوں نے کہاکہ ’’ایران کے ساتھ ناانصافی ہوئی ہے۔ بمباری میں اس کے اثاثے تباہ ہوئے۔ ان کی کوئی غلطی نہیں تھی۔ انہوں نے جنگ شروع نہیں کی تھی بلکہ جنگ ان پر مسلط کی گئی تھی۔ ہمیں امید ہے کہ انہیں جو معاوضہ ملنا چاہیے، اس کا ذکر بھی کہیں نہ کہیں اس معاہدے میں ہوگا۔‘‘

دریں اثنا، رکن پارلیمنٹ اور نیشنل کانفرنس کے ناراض رہنما روح اللہ مہدی نے کہا کہ ایران کے عوام نے ہمیشہ مزاحمتی تحریکوں کی حمایت کی ہے اور جسے انہوں نے خطے میں ’’امریکہ-اسرائیل بالادستی‘‘ قرار دیا، اس کے سامنے جھکنے سے انکار کیا ہے۔

انہوں نے کہا کہ ایران طویل عرصے سے دباؤ اور تنازعات کا سامنا کرنے کے باوجود اپنے مؤقف پر ثابت قدم رہا ہے۔

یواین آئی۔ ظ ا

سری نگر، کشمیر کے کئی علاقوں میں ہفتہ کے روز تازہ بارش ہوئی جس کے باعث پورے خطے میں درجۂ حرارت میں کمی آئی اور جون کے مہینے میں بھی موسم بہار جیسا خوشگوار محسوس ہونے لگا۔

محکمۂ موسمیات، سری نگر کے مطابق کشمیر ڈویژن کے بیشتر مراکز پر زیادہ سے زیادہ درجۂ حرارت معمول سے کم ریکارڈ کیا گیا۔ سری نگر میں زیادہ سے زیادہ درجۂ حرارت 23.8 ڈگری سیلسیس ریکارڈ کیا گیا، جو معمول سے 4.2 ڈگری سیلسیس کم ہے۔

جنوبی کشمیر کے سیاحتی مقام پہلگام میں درجۂ حرارت 17 ڈگری سیلسیس رہا، جو معمول سے 6.7 ڈگری سیلسیس کم ہے، جبکہ معروف سیاحتی مقام گلمرگ میں درجۂ حرارت 16.6 ڈگری سیلسیس ریکارڈ کیا گیا، جو اوسط سے 2.2 ڈگری سیلسیس کم ہے۔

بارش کے باوجود کشمیر کے کئی علاقوں میں رات کا درجۂ حرارت معمول سے 1 سے 2 ڈگری سیلسیس زیادہ رہا۔ وادی میں سب سے کم درجۂ حرارت گلمرگ میں 9 ڈگری سیلسیس ریکارڈ کیا گیا۔

گزشتہ 24 گھنٹوں کے دوران مختلف مقامات پر بارش ہوئی، جن میں پہلگام میں 13 ملی میٹر، قاضی گنڈ میں 1.3 ملی میٹر اور گلمرگ میں 1.6 ملی میٹر بارش درج کی گئی۔

محکمۂ موسمیات نے آئندہ 24 گھنٹوں کے دوران جموں و کشمیر کے بعض علاقوں میں ہلکی سے درمیانی بارش اور گرج چمک کے ساتھ آندھی کی پیش گوئی کی ہے۔ اگلے دو روز تک بھی موسم کی یہی صورتحال برقرار رہنے کا امکان ہے، جس کے دوران وقفے وقفے سے بارش اور گرج چمک کے ساتھ آندھی چل سکتی ہے۔

دریں اثنا، جموں و کشمیر کے وزیر اعلیٰ عمر عبداللہ نے کہا کہ سری نگر کا موسم جون کے وسط جیسا نہیں بلکہ اپریل کے آغاز جیسا محسوس ہو رہا ہے۔

انہوں نے سوشل میڈیا پلیٹ فارم ایکس پر لکھا، ’’آج سری نگر کا موسم جون کے وسط کے بجائے اپریل کے ابتدائی دنوں جیسا لگ رہا ہے۔ اگر یہاں یہ حال ہے تو گلمرگ اور پہلگام جیسے مقامات پر یقیناً کافی سردی ہوگی۔‘‘

یو این آئی۔ اے ایم۔