تہران، ایران کے وزیرِ خارجہ عباس عراقچی نے کہا ہے کہ امریکہ اور ایران کے درمیان آئندہ مذاکرات دو مراحل میں انجام پائیں گے۔

تہران میں سفارت کاروں سے خطاب کرتے ہوئے انہوں نے بتایا کہ امریکہ کے ساتھ حتمی معاہدے کے لیے مذاکرات کا نیا دور ممکنہ طور پر جمعے کو سوئٹزر لینڈ میں شروع ہو گا، ابتدائی مرحلے میں جنگ بندی اور علاقائی معاملات جبکہ بعد ازاں جوہری پروگرام اور پابندیوں کے خاتمے پر بات چیت ہو گی۔

عباس عراقچی نے کہا کہ مذاکرات کے پہلے مرحلے میں آبنائے ہرمز کی صورتِ حال، امریکی بحری ناکہ بندی اور ایران کے بنیادی ڈھانچے کو پہنچنے والے نقصان کے بعد تعمیرِ نو جیسے معاملات زیرِ بحث آئیں گے۔

انہوں نے کہا کہ دوسرے مرحلے میں جوہری پروگرام، یورینیئم کی افزودگی اور ایران پر عائد پابندیوں کے خاتمے سے متعلق امور پر تفصیلی مذاکرات کیے جائیں گے، جن کا مقصد ایک حتمی معاہدے تک پہنچنا ہے، مفاہمتی یادداشت میں ایک طرف امریکہ اور اسرائیل ہیں، دوسری جانب ایران اورحزب اللّٰہ فریق ہیں۔

ایرانی وزیرِ خارجہ نے لبنان کی صورتِ حال پر بات کرتے ہوئے کہا کہ ایران اور لبنان میں جنگ کے خاتمے کے معاملات ایک دوسرے سے جڑے ہوئے ہیں۔

ان کا کہنا ہے کہ لبنان کے کسی بھی حصے پر اسرائیل کا مسلسل قبضہ یا آئندہ کسی قسم کی فوجی کارروائی امریکا کے ساتھ طے پانے والی مفاہمتی یادداشت (MoU) کی خلاف ورزی تصور کی جائے گی۔

عراقچی نے کہا کہ لبنانی سر زمین پر اسرائیلی قبضے کا جاری رہنا مفاہمتی یادداشت کی خلاف ورزی ہے، جبکہ لبنان پر کسی نئے حملے کو ہرگز قبول نہیں کیا جائے گا۔

عباس عراقچی کے مطابق ایران کے وقت کے مطابق پیر کے روز امریکا کے ساتھ معاہدہ حتمی شکل اختیار کرنے کے بعد جنگ کے خاتمے کا اعلان کر دیا گیا تھا۔

انہوں نے مزید بتایا کہ مفاہمتی یادداشت باضابطہ طور پر جمعے سے نافذ العمل ہو گی، جس کے بعد دونوں ممالک کے درمیان اگلے مرحلے کے مذاکرات شروع ہوں گے۔

ایرانی وزیرِ خارجہ کا یہ بھی کہنا ہے کہ موجودہ معاہدہ خطے میں کشیدگی کم کرنے اور ایک وسیع تر سیاسی و جوہری سمجھوتے کی جانب اہم پیش رفت ثابت ہو سکتا ہے۔

یو این آئی۔ ع ا۔

واشنگٹن، امریکہ اور ایران کے درمیان ہونے والی حالیہ مفاہمتی یادداشت پر ردعمل کا اظہار کرتے ہوئے سابق امریکی صدر باراک اوباما نے کہا ہے کہ امریکہ دھونس جما کر یا بمباری کے ذریعے مسائل حل نہیں کر سکتا امریکی میڈیا کو دیے گئے ایک انٹرویو میں باراک اوباما کا کہنا تھا کہ اس بات کا کوئی امکان نہیں ہے کہ ایران کے ساتھ کیا جانے والا کوئی بھی نیا معاہدہ، اصل جوہری معاہدے (جے سی پی او اے) سے نمایاں طور پر بہتر ہو۔

سابق صدر نے فوجی طاقت کے استعمال کے بجائے سفارت کاری پر زور دیتے ہوئے کہا کہ ہمیں ایسے سفارتی معاہدوں کو ترجیح دینی چاہیے جو جنگ سے بچاتے ہوئے زیادہ تر مسائل کو حل کرنے کی صلاحیت رکھتے ہوں۔ انہوں نے مزید کہا کہ ہم چاہتے ہیں کہ بمباری کا سلسلہ بند ہو تاکہ جنگ کے نتیجے میں عام لوگ مزید مشکلات اور مصائب کا شکار نہ ہوں۔

یو این آئی۔ ع ا۔

تہران، ایرانی میڈیا نے خبر دی ہے کہ امریکہ کے ساتھ مفاہمتی یادداشت کے بعد امریکہ نے ناکہ بندی ہٹا دی ہے اور آبنائے ہرمز کھل گئی، جس کے سبب 5 ایرانی تیل بردار جہاز وہاں سے گزر گئے امریکہ ایران معاہدے کے بعد آبنائے ہرمز پر جاری تناؤ میں کمی آ گئی ہے، ایرانی میڈیا کے مطابق امریکہ کی جانب سے بحری ناکہ بندی ختم کرنے کے بعد 3 ایرانی آئل ٹینکرز اور 2 مال بردار بحری جہاز آبنائے ہرمز سے گزرے ہیں۔ آبنائے ہرمز سے ایرانی بحری جہازوں کا گزرنا امریکہ کے ساتھ اس سیاسی مفاہمت کی یادداشت کا پہلا ٹھوس نتیجہ قرار دیا جا سکتا ہے۔

جاپان کی ایک شپنگ کمپنی مٹسوئی لائنز کے چیف ایگزیکٹو نے برطانوی اخبار فنانشل ٹائمز کو بتایا کہ جب تک انھیں اس بات کا یقین نہ ہو جائے کہ ایران اور امریکہ کے درمیان ہونے والا معاہدہ حقیقتاً مؤثر اور عملی ہے، تب تک جہاز مالکان آبنائے سے گزرنے کا عمل دوبارہ شروع نہیں کریں گے۔

جاپان کی تین بڑی شپنگ کمپنیوں میں شامل مِٹسوئی لائنز کے پاس 900 سے زائد جہازوں پر مشتمل بیڑا موجود ہے، جن میں مال بردار جہاز، تیل بردار ٹینکر اور فیریاں شامل ہیں۔ یہ دنیا کے سب سے بڑے ٹینکر بیڑوں میں سے ایک چلانے والی کمپنی ہے۔

ادھر ایرانی میڈیا نے خبر دی ہے کہ آبنائے ہرمزمیں قشم جزیرے کے جنوب میں 3 دھماکے بھی سنے گئے، تاہم یہ بتایا گیا ہے کہ یہ دھماکے ٹریفک مینجمنٹ نظام سے متعلق سرگرمیوں کے ہیں۔

یو این آئی۔ ع ا۔ْ