واشنگٹن، امریکی نائب صدر جے ڈی وینس کا کہنا ہے کہ ہم ایران امریکہ معاہدے کے ثالثوں پر زور دے رہے ہیں کہ متن آج ہی جاری کیا جائے۔

سی بی ایس نیوز کو دیے گئے انٹرویو میں جے ڈی وینس نے کہا کہ ایران امریکا معاہدے کا متن جمعہ تک جاری کر دیا جائے گا، وائٹ ہاؤس کی کوشش ہے کہ متن جمعہ سے پہلے جاری کیا جا سکے کیونکہ مفاہمتی یادداشت کے حوالے سے غلط معلومات پھیلائی جا رہی ہیں۔

امریکی نائب صدر نے بتایا کہ قطری اور پاکستانی حکام نے متن فوری جاری نہ کرنے کی درخواست کی، لیکن ہم ثالثوں پر زور دے رہے ہیں کہ متن آج ہی جاری کیا جائے کیونکہ ہم امریکی عوام کو بتانا چاہتے ہیں کہ تاریخی معاہدے میں کیا ہے۔

جے ڈی وینس نے مزید کہا کہ ایران نے جوہری پروگرام روکا تو اسے عالمی معیشت میں دوبارہ شامل کیا جائے گا، تہران کو ملنے والے فوائد سے مراد اس کی معیشت پر عائد پابندیوں میں ریلیف ہے، اس کے منجمد اثاثوں کی بحالی اور مراعات طرز عمل بدلنے سے مشروط ہے۔

ان کا کہنا تھا کہ ایران کے ساتھ یہ معاہدہ امریکی عوام کیلیے بہترین ڈیل ہے، تہران کے ساتھ معاہدہ ہے کہ آبنائے ہرمز کھول دی جائے گی، ہم دیکھ رہے ہیں کہ عالمی سطح پر تیل کی ترسیل بحال ہوتی جا رہی ہے۔

امریکی نائب صدر نے کہا کہ آئندہ چند ہفتوں میں پیٹرولیم مصنوعات کی قیمتوں میں بڑی کمی متوقع ہے، قیمتوں میں حالیہ اضافہ قلیل مدتی تھا امریکی خاندانوں کی مشکلات کا احساس ہے۔

انٹرویو میں جے ڈی وینس نے بتایا کہ مفاہمتی یادداشت کے تحت ایران کبھی جوہری ہتھیار حاصل نہیں کرے گا، معاہدہ آبنائے ہرمز کو فوری کھولنے اور دہشت گردی فنڈنگ روکنے کا فریم ورک طے کرے گا۔

امریکی نائب صدر نے دعویٰ کیا کہ ایران کا جوہری پروگرام تباہ کر دیا، صدر ڈونلڈ ٹرمپ چاہتے ہیں کہ تہران دوبارہ پروگرام شروع نہ کرے۔

یو این آئی۔ ع ا۔

تل ابیب، اسرائیلی وزیرِ اعظم نیتن یاہو کا کہنا ہے کہ ایران اور امریکہ کے درمیان ہونے والے جوہری معاہدے سے اسرائیل کے مؤقف میں کوئی تبدیلی نہیں آئے گی۔

نیتن یاہو نے پریس کانفرنس کرتے ہوئے کہا ہے کہ اسرائیل کو ایران اور امریکہ کے درمیان ہونے والے جوہری معاہدے کی مخصوص شرائط کا علم نہیں ہے لیکن اس سفارتی پیشرفت سے اسرائیل کے فوجی مؤقف میں کوئی تبدیلی نہیں آئے گی۔

اُنہوں نے کہا کہ معاہدے کے ساتھ یا معاہدے کے بغیر، نہ آج اور نہ کل، ایران کے پاس کبھی بھی جوہری ہتھیار نہیں ہوں گے۔

اسرائیلی وزیرِ اعظم نے ایران کے خلاف اسرائیلی فوج کی حالیہ کارروائیوں کا دفاع کرتے ہوئے کہا کہ ہم نے بڑی تباہی کے خطرے کو دور کیا ہے۔

اُنہوں نے مزید کہا کہ اپنے امریکی دوستوں کے ساتھ مل کر ہم نے اسرائیل کی تاریخ کے سب سے بڑے مشن کا آغاز کیا، ہم نے ایران کے ایٹمی سائنسدانوں کو ناکام بنا دیا، ان کے رہنماؤں کے سر قلم کیے، ایٹمی فیکٹریوں کو کچل دیا، ان کے میزائلوں اور میزائل بنانے والی فیکٹریوں کو تباہ کیا، ان گنت صنعتوں اور فوجی انفرااسٹرکچر کو نشانہ بنایا، ایران کی بحریہ اور فضائیہ کو تباہ کر دیا۔

نیتن یاہو نے یہ بھی کہا کہ ہم نے ایران کو بہت زیادہ نقصان پہنچایا جو کہ سیکڑوں بلین ڈالرز اور کچھ اندازوں کے مطابق 1 ٹریلین ڈالرز کے قریب ہے، ایران کی معیشت کو جتنا نقصان پہنچا ہے اس کی تعمیرِ نو میں انہیں کئی دہائیاں لگیں گی۔

یو این آئی۔ ع ا۔

واشنگٹن، امریکی صدر ڈونلڈ ٹرمپ کا کہنا ہے کہ ایران سے متعلق مفاہمتی یادداشت حتمی نہیں، اگر مجھے حتمی معاہدہ پسند نہ آیا تو ہم دوبارہ بمباری کی طرف واپس جا سکتے ہیں۔

فرانس میں جی سیون اجلاس کے موقع پر مصری صدر عبدالفتاح السیسی سے ملاقات کے دوران میڈیا سے گفتگو کرتے ہوئے ڈونلڈ ٹرمپ نے کہا ہے کہ واضح کردوں کوئی امریکی ایران میں سرمایہ کاری نہیں کرے گا۔

امریکی صدر کا کہنا ہے کہ ایران کے ساتھ معاہدے کے بعد آبنائے ہرمز مکمل کھل جائے گی، ایران جوہری ہتھیار حاصل نہیں کر سکتا، اس کے ساتھ اہم ڈیل کی ہے۔

انہوں نے کہا ہے کہ اسٹاک مارکیٹس بلندیوں پر ہیں، تیل کی قیمتیں نیچے آ گئی ہیں، اگر ڈیل نہ ہوتی تو پوری دنیا معاشی دباؤ کا شکار ہوتی۔

ڈونلڈ ٹرمپ کا کہنا ہے کہ مصری صدر کے ساتھ تجارت پر بات چیت کریں گے، متنازع ڈیم کے مسئلے پر بھی بات چیت کریں گے، مصر کے ڈیم پروجیکٹ میں امریکہ مدد کرے گا۔

امریکی صدر کا کہنا ہے کہ ایران معاہدے میں 300 ارب ڈالرز کے فنڈز کی رپورٹس غلط ہیں، امریکہ ایران میں سرمایہ کاری نہیں کر رہا، حزب اللّٰہ سے نمٹنے کے لیے شامی رہنما سے بات کی ہے۔

ڈونلڈ ٹرمپ نے کہا کہ ایران کے ساتھ مفاہمتی یادداشت میں فوری پابندیوں میں نرمی شامل نہیں، ایران پر پابندیوں میں نرمی سے متعلق بعد میں بات کریں گے۔

مصری صدر عبدالفتاح السیسی نے مشرقِ وسطیٰ میں قیامِ امن کے لیے بریک تھرو پر صدر ٹرمپ کو مبارک باد دیتے ہوئے کہا کہ حتمی معاہدے کے منتظر ہیں۔

یو این آئی۔ ع ا۔