کشمیر میں غیر یقینی سیاسی صورتحال
خبراردو:-
سرینگر:کشمیر میں جاری غیر یقینی سیاسی صورتحال کے بیچ 5اگست2019سے جو مین اسٹریم سیاسی رہنما ابھی بھی جیلوں یا گھروں میں نظر بندہیں ،اُنکی عید قربان سے قبل رہائی متوقع ہے جبکہ اُن کی سیاسی ودیگر سرگرمیوں پر عائد غیر اعلانیہ پابندیوں کو بھی ہٹائے جانے کا قوی امکان ہے ۔

کشمیر نیوز سروس کو ذرایع سے معلوم ہوا ہے کہ مرکزی وزارت داخلہ نے اصولی طور پر اُن مین اسٹریم لیڈران کی نظر بندی ختم کرنے کا فیصلہ لیا ہے ،جو5اگست2019سے جیلوں یا رہائی کے بعد گھروں میں نظر بند ہیں ۔ ذرایع کا کہنا ہے کہ ُان سبھی مین اسٹریم لیڈران کی نظر بندی ختم کرنے کے حوالے سے نئی دہلی میں اعلیٰ سطح پر غور وخوض کیا گیا اور مرکزی وزارت داخلہ نے اصولی طور پر یہ فیصلہ لیا ہے کہ اُن لیڈران کی رہائی عمل میں لائی جائے گی ،جو ابھی بھی جیلوں یا گھروں میں نظر بندہیں ۔

ذرایع نے بتایا کہ متوقع طور پر عید الاضحی سے قبل ان سبھی مین اسٹریم سیاسی رہنماءوں کی رہائی متوقع ہے ۔ ذرایع کا کہناہے کہ جن مین اسٹریم لیڈران کی نظر بندی ختم کی گئی ہے اور ابھی گھروں میں نظر بند ہیں ،اُنہیں آزاد نقل وحرکت کرنے کی بھی اجازت دی جاسکتی ہے ۔

ذرایع نے بتایا کہ مرکزی حکومت نے وادی کشمیر میں سیاسی سرگرمیاں دوبارہ بحال کرنے اور تعمیر وترقی کے ایجنڈے کو آگے بڑھا نے کیساتھ ساتھ یہاں قیام امن کو یقینی بنانے کےلئے مین اسٹریم لیڈران پر عائد اعلانیہ یا غیر اعلانیہ پابندیاں وبندشیں ختم کرنے کا فیصلہ لیا ہے ۔

ذرایع کا کہنا ہے کہ عید کے بعد متوقع طور پر جموں وکشمیر خاص طور پر وادی کشمیر میں مین اسٹریم لیڈران کو اپنی آزادانہ سیاسی سرگرمیاں بحال کرنے کی اجازت دی جاسکتی ہے ،تاہم کووڈ ۔ 19(عالمی وبا) کے پیش نظر حکومتی گائیڈ لائنز کی رو سے سیاسی جماعتیں کوئی بڑا سیاسی اجتماع فی الوقت منعقد نہیں کرسکتی ہیں ،البتہ اُنکی سیاسی یا ذاتی سرگرمیوں پر کوئی قدغن نہیں رہے گی ۔

ذرایع نے بتایا کہ مرکزی حکومت جموں وکشمیر میں پائی جانے والی غیر یقینی سیاسی صورتحال کے حوالے سے متفکر ہے اور اب مرکزی حکومت یہاں ہر طرح کی سیاسی سر گرمیوں کو منعقد کرنے اجازت دی جاسکتی ہے ۔ یاد رہے کہ سابق خاتون وزیر اعلیٰ محبوبہ مفتی ،سابق کابینہ وزیر سجاد غنی لون ،پیپلز مءومنٹ کے سربراہ ڈاکٹر شاہ فیصل سمیت درجنوں مین اسٹریم لیڈران سب جیلوں سے رہا کئے گئے ،تاہم انکی آزاد نقل وحرکت پرپابندی برقرار ہے اور یہ سبھی مین اسٹریم لیڈران ہنوز گھروں میں نظر بند ہیں ۔

ذرایع نے سابق خاتون وزیر اعلیٰ محبوبہ مفتی کی خانہ بندی ختم کرنے کے بارے میں بتایا کہ عید سے قبل تو نہیں شاید عید کے بعد محبوبہ مفتی کو بھی اپنی سیاسی سرگرمیاں بحال کرنے اجازت دی جاسکتی ہے ،لیکن حتمی طور پر اس وقت کچھ کہا نہیں جاسکتا ہے کہ آیا محبوبہ مفتی کو فوری طور پر اپنی سیاسی سرگرمیاں بحال کرنے کی اجازت دی جائیگی یا نہیں ،لیکن مرکزی حکومت جموں وکشمیر خاص طور پر وادی کشمیر میں غیر یقینی سیاسی صورتحال کو ختم کرنے کے حوالے کافی سنجیدہ ہے ۔

یاد رہے کہ سابق وزیر اعلیٰ اور موجودہ ممبر پار لیمنٹ ڈاکٹر فاروق عبداللہ اور اُنکے فر زند وجموں وکشمیر کے سابق وزیر اعلیٰ عمر عبداللہ نے کہا تھا کہ جب تک سبھی مین اسٹریم لیڈران کو رہا نہیں کیا جاتا ،تب تک جموں وکشمیر میں سیاسی سرگرمیاں بحال کرنے کا کوئی سوال ہی پیدا نہیں ہوتا ۔

نیشنل کانفرنس نے یہ موقف بھی اختیار کیا ہوا ہے کہ دفعہ 370اور آرٹیکل35اے کی تنسیخ کے بعد جموں وکشمیر میں پیدا ہوئے سیاسی خلا کو اُسی وقت پُر کیا جاسکتا ہے جب سبھی جماعتوں کے سیاسی رہنماءوں کو آزاد کیا جائیگا،تاکہ جموں وکشمیر کے سیاسی مستقبل کے حوالے سے پر مشترکہ کوئی لاءحہ عمل ترتیب دیا جاسکے ۔

غور طلب بات یہ ہے کہ مزکری حکومت نے 5اگست2019کو پارلیمانی فیصلہ جات کے تحت جموں وکشمیر کی خصوصی پوزیشن فراہم کرنے والی آئینی دفعات دفعہ370اور اسکی ذیلی شق35اے کی تنسیخ کر نے کے علاوہ جموں وکشمیر کو 2مرکزی زیر انتظام خطوں میں تقسیم کیا ۔ اس کے بعد مسلسل یہ مطالبہ سامنے آرہا ہے کہ جموں وکشمیر میں ریاستی درجہ بحال کیا جائے جبکہ ڈومیسائل حقوق کو بھی یقینی بنایا جائے ۔ 5اگست 2020کو مرکزی حکومت کے فیصلہ جات کو ایک سال مکمل ہوجائیگا اور حکمران جماعت بھارتیہ جنتاپارٹی (بی جے پی ) اپنے اِن فیصلہ جات پر جشن بھی منائی گی ۔