تہران/دوحہ، ایرانی صدر مسعود پیزشکیان نے منگل کے روز فوجی کمانڈروں کو بتایا کہ خلیجی ممالک اس نتیجے پر پہنچے ہیں کہ خلیج میں امریکی فوجی موجودگی “دیرپا سلامتی کو یقینی بنانے میں ناکام رہی ہے۔”

انہوں نے ایران کے دفاعی ڈھانچے کی جامع تبدیلی کی ضرورت پر بھی زور دیا۔ یہ بیان ایسے وقت میں سامنے آیا ہے جب ایرانی مذاکرات کار جنگ کے خاتمے کے مقصد سے قطر میں واشنگٹن کے ساتھ مذاکرات کر رہے ہیں۔ ایرانی صدارتی دفتر کی طرف سے جاری کردہ ایک بیان کے مطابق، مسٹر پیزشکیان نے کہا، “سیکیورٹی کے لیے امریکہ پر انحصار کرنا ایک غیر حقیقت پسندانہ اور غیر موثر طریقہ ثابت ہوا ہے۔”

انہوں نے کہا کہ “دشمن نے نئی ٹیکنالوجیز اور ذرائع حاصل کیے ہیں” اور مسلح افواج کو یونیورسٹیوں، سائنسی اداروں اور علم پر مبنی کمپنیوں کے ساتھ گہرے تعاون کے ذریعے “ٹیکنالوجیکل ایج اور دفاعی صلاحیتوں کو مضبوط بنانے” کی ہدایت کی۔ یہ بیانات اعلیٰ فوجی حکام سے خطاب کرتے ہوئے سامنے آئے جب ایرانی مذاکرات کار دوحہ میں قطری ثالثوں کے ساتھ بات چیت میں مصروف تھے۔

ایران کی تسنیم خبر رساں ایجنسی نے ایک ذریعے کے حوالے سے کہا ہے کہ مذاکرات “مجموعی طور پر مثبت” تھے اور “مجموعی طور پر مذاکرات میں پیش رفت” کا باعث بنے تھے۔ اسی ذریعہ نے بھی احتیاط کی تاکید کی۔ “یہ نہیں بھولنا چاہئے کہ امریکہ ایک ناقابل اعتماد فریق کے طور پر جانا جاتا ہے، اور اسی وجہ سے ایران انتہائی احتیاط کے ساتھ آگے بڑھ رہا ہے”۔

یو این آئی۔ ع ا۔

بیروت، اسرائیل کے غزہ اور لبنان پر وحشیانہ حملوں میں کم از کم 18 افراد شہید ہو گئے۔

لبنان کی وزارت صحت نے کہا کہ اسرائیل کے فضائی حملوں میں مشرقی لبنان میں کم از کم 11 افراد جاں بحق اور 15 دیگر زخمی ہو گئے ہیں لبنان کی سرکاری خبر رساں ایجنسی نے منگل کو اطلاع دی کہ یہ فضائی حملے پیر کو دیر گئے وادی بیکا کے گاؤں مشغرا پر ہوئے۔

اسرائیلی فوج نے ایک بیان میں کہا کہ اس نے حملوں کی لہر میں وادی بیکا اور جنوبی لبنان میں حزب اللہ کے 100 سے زیادہ انفراسٹرکچر سائٹس اور “دہشت گردوں” کو نشانہ بنایا۔ یہ حملے اسرائیلی وزیر اعظم بنجمن نیتن یاہو کے کہنے کے بعد ہوئے ہیں کہ انہوں نے لبنان بھر میں حزب اللہ کے خلاف مزید سخت حملوں کی اجازت دے دی ہے جس سے امریکی ثالثی میں ہونے والی جنگ بندی خطرے میں پڑ گئی ہے جو گزشتہ ماہ نافذ العمل ہوئی تھی۔

دوسری جانب فلسطینی محکمہ صحت کے حکام نے بتایا کہ غزہ میں اسرائیلی فضائی حملوں میں کم از کم سات افراد شہید ہو گئے ہیں، جب کہ اسرائیل عید الاضحی کی مسلمانوں کی چھٹیوں کے دوران “جنگ بندی” کی خلاف ورزیاں جاری رکھے ہوئے ہے۔ سول ڈیفنس اور اسپتال کے حکام نے بتایا کہ منگل کے روز وسطی غزہ میں مغازی مہاجر کیمپ پر اسرائیلی ڈرون حملے میں کم از کم پانچ فلسطینی شہید ہو گئے۔

سول ڈیفنس ایجنسی نے کہا کہ “اسرائیلی فضائی حملے کے بعد مشرقی مغازی میں شہریوں کے ایک گروپ کو نشانہ بنانے کے بعد پانچ شہید اور متعدد زخمیوں کو (اسپتال) منتقل کیا گیا”۔ الاقصیٰ شہداء اسپتال نے اموات کی تصدیق کی ہے۔ اسرائیل کی طرف سے فوری طور پر کوئی تبصرہ نہیں کیا گیا، جس نے اکتوبر 2023 میں غزہ میں فلسطینیوں کے خلاف نسل کشی کی جنگ شروع کی تھی۔

یو این آئی۔ ع ا۔

تہران، ایرانی مسلح افواج کے سینئر ترجمان ابوالفضل شکارچی کا کہنا ہے کہ کوئی نئی جارحیت یا خلاف ورزی کاجواب خطے سے باہر تک پھیلے گا۔

ایک بیان میں ابوالفضل شکارچی نے کہا ہے کہ کسی نئی خلاف ورزی کی صورت میں ایران کا ردعمل پہلے سے کہیں زیادہ شدید اور طاقتور ہو گا۔ انہوں نے کہا کہ ممکنہ اہداف کی نشاندہی کر لی گئی ہے۔

ابوالفضل شکارچی کا کہنا ہے کہ کسی بھی نئی خلاف ورزی کی صورت میں ایران کا ردعمل مختلف نوعیت کا ہو گا۔ ترجمان ایرانی مسلح افواج نے کہا کہ ایران کی تیل برآمدات میں رکاوٹ ڈالی گئی تو ایران خطے سے تیل کی ترسیل کا راستہ بند کر دے گا۔

یو این آئی۔ ع ا۔