سرینگر،جموں و کشمیر پولیس کے ونگ ‘اکنامک آفنسز یونٹ’ (ای او ڈبلیو) نے شوپیاں میں ایچ ڈی ایف سی بینک کی شاخ میں ہونے والے ایک بڑے مالیاتی غبن اور دھوکہ دہی کے کیس میں کورٹ میں چارج شیٹ داخل کر دی ہے۔

حکام کے مطابق یہ چارج شیٹ شوپیاں کے جوڈیشل مجسٹریٹ فرسٹ کلاس کی عدالت میں جمع کرائی گئی ہے۔ اس ہائی پروفائل کیس میں مجموعی طور پر 11 ملزمان کو نامزد کیا گیا ہے، جنہوں نے بینک میں بڑے پیمانے پر مالی بے ضابطگیاں کیں۔

یہ مقدمہ ای او ڈبلیو تھانے میں بھارتیہ نیائے سنہیتا (بی این ایس) اور انفارمیشن ٹیکنالوجی ایکٹ کی متعلقہ دفعات کے تحت درج کیا گیا تھا۔مالیاتی گڑبڑ کی شکایات موصول ہونے پر پولیس ہیڈ کوارٹر نے کیس کی حساسیت کو دیکھتے ہوئے اسے کرائم برانچ کے سپرد کیا تھا تاکہ گہرائی سے چھان بین کی جا سکے۔

تفتیش کے دوران ملوث پائے جانے والے افراد کو رواں برس 18 فروری کو گرفتار کیا گیا تھا، جو تب سے اب تک عدالتی تحویل (جوڈیشل ریمانڈ) میں ہیں۔کرائم برانچ کے ایک افسر نے تصدیق کی ہے کہ تمام ضروری شواہد اور بیانات قلمبند کرنے کے بعد تفتیش مکمل ہو چکی ہے، جس کے بعد اب 11 ملزمان کے خلاف چارج شیٹ عدالتی فیصلے کے لیے پیش کر دی گئی ہے۔

یواین آئی ۔م اع

جموں، جموں و کشمیر پولیس کے اسپیشل آپریشن گروپ ( ایس او جی ) نے جمعرات کے روز ضلع سانبہ کے رام گڑھ سیکٹر میں بین الاقوامی سرحد کے قریب ایک فعال (زندہ) مارٹر شیل برآمد کر کے بڑی تباہی کا خطرہ ٹال دیا۔

پولیس ذرائع کے مطابق، ایس او جی کی ٹیم نے رام گڑھ کے علاقے کوالپور دیوک میں تلاشی مہم (سرچ آپریشن) شروع کر رکھا تھا۔ اس دوران ایک زندہ مارٹر شیل پایا گیا جو کسی بھی وقت پھٹ سکتا تھا۔

شیل کی موجودگی کی اطلاع ملتے ہی بم ڈسپوزل اسکواڈ (بی ڈی ایس) کو فوری طور پر موقع پر طلب کیا گیا۔ ماہرین کی ٹیم نے جائے وقوعہ پر پہنچ کر تمام حفاظتی تدابیر اختیار کیں اور مارٹر شیل کو کامیابی کے ساتھ بحفاظت ناکارہ (ڈی فیوز) بنا دیا۔اس کارروائی کے بعد علاقے میں سیکیورٹی فورسز کی جانب سے مزید تلاشی لی گئی تاکہ عوامی تحفظ کو یقینی بنایا جا سکے۔

یواین آئی ۔م اع

بیروت، اسرائیل کی جانب سے جنگ بندی کے باوجود لبنان پر حملے جاری ہیں جس میں مزید 13 افراد شہید ہوگئے ۔

اسرائیل نے جنگ بندی کے معاہدے کے بعد بدھ کو پہلی بار لبنان کے دارالحکومت بیروت پر حملہ کیا۔ رپورٹس کے مطابق یہ فضائی حملہ بیروت کے جنوبی مضافاتی علاقے داحیہ پر کیا گیا، جہاں حزب اللہ کا مرکز واقع ہے۔ سوشل میڈیا پر شیئر کی گئیں تصاویر میں بڑے پیمانے پر آگ اور کم از کم ایک عمارت کو شدید نقصان دکھایا گیا ہے۔

اسرائیلی وزیراعظم بن یامین نیتن یاہو نے ایک بیان میں کہا کہ انہوں نے خود اس حملے کی منظوری دی تھی، جس کا ہدف حزب اللہ کی ایلیٹ رضوان فورس کا ایک کمانڈر تھا۔ اس کے علاوہ اسرائیلی جنگی طیاروں نے جنوبی لبنان کے شہر سکسکیہ پر بمباری کی جس میں 5 افراد شہید اور 15 زخمی ہوئے۔ رپورٹ کے مطابق بدھ کے روز اسرائیل نے 17 اپریل کو نافذ ہونے والی جنگ بندی کے بعد پہلی بار بیروت کے جنوبی مضافات پر بمباری کی، جس میں لبنان بھر میں کم از کم 13 افراد شہید ہوئے۔

ادھر اقوام متحدہ کے ادارے برائے انسانی امور کے رابطہ دفتر کے مطابق لبنان میں انسانی صورتحال “جنگ بندی کے باوجود انتہائی غیر مستحکم” ہے اور شہری مسلسل جنگ سے متاثر ہو رہے ہیں۔ رپورٹ میں بتایا گیا ہے کہ 2 مارچ سے اب تک لبنان میں 2,700 سے زائد افراد ہلاک ہو چکے ہیں، جبکہ فضائی حملوں کے باعث ہلاکتوں کی تعداد روزانہ بڑھ رہی ہے۔

دوسری جانب حزب اللہ کا کہنا ہے کہ اس کے جنگجوؤں نے بدھ کے روز لبنان کے اندر داخل ہونے والی اسرائیلی افواج پر 17 حملے کیے۔ حزب اللہ کے بیان کے مطابق اسرائیلی فوجیوں اور فوجی گاڑیوں کو قنطرہ، البیاضہ، طیّبہ، نقرہ، رشاف اور عیتا الشعب میں ڈرون اور راکٹ حملوں کے ذریعے نشانہ بنایا گیا۔

یو این آئی۔ ع ا۔