تہران، ایران کے صدر مسعود پزشکیان نے خطے میں امن کے فروغ کے لیے پاکستانی کوششوں کو سراہا ہے۔

انہوں نے سماجی رابطے کی ویب سائٹ ایکس پر پیغام جاری کرتے ہوئے کہا ہے کہ ایران اور پاکستان اپنے قومی عزائم، امیدوں اور مستقبل کے وژن میں گہری مشترکات رکھتے ہیں۔

ایرانی صدر کا کہنا ہے کہ خطے میں امن کے فروغ کے لیے پاکستان کی انتھک کوششیں اس ملک کی بھرپور تہذیبی اور ثقافتی روایات کی عکاس ہیں۔

انہوں نے اپنے پیغام میں کہا کہ پاکستان کے مصالحتی اور سفارتی کردار کو سراہنے کے لیے اپنے حالیہ دورۂ پاکستان کے دوران میری اپنے برادران صدرِ مملکت آصف علی زرداری، وزیرِاعظم شہباز شریف اور فیلڈ مارشل عاصم منیر سے تفصیلی ملاقاتیں ہوئیں، جن میں دو طرفہ تعلقات اور باہمی روابط کو مزید وسعت دینے کے امکانات پر تبادلۂ خیال کیا گیا۔

واضح رہے کہ ایرانی صدر مسعود پزشکیان اپنے ایک روزہ دورے پر وزیرِ خارجہ عباس عراقچی کے ہمراہ 23 جون کو پاکستان پہنچے تھے۔

یو این آئی۔ ع ا۔

تہران، ایرانی اسلامی انقلابی گارڈ کور (آئی آر جی سی) کی بحریہ نے گزشتہ روز اعلان کیا ہے کہ آبنائے ہرمز سے جہازوں کی آمد و رفت کے لیے صرف وہی بحری راستے قابلِ قبول ہیں جو ایران کی جانب سے مقرر کیے گئے ہیں۔

ایرانی میڈیا کے مطابق آئی آر جی سی نے دیگر حکام کی جانب سے متعارف کرائے گئے متبادل راستوں کے استعمال کے خلاف بھی خبردار کیا ہے۔ آئی آر جی سی نے سرکاری میڈیا پر جاری کیے گئے بیان میں کہا ہے کہ چند گھنٹے قبل بعض حکام نے اسلامی جمہوریہ ایران کو پیشگی اطلاع یا مشاورت کے بغیر آبنائے ہرمز سے جہازوں کی گزرگاہ کے لیے ایک نیا راستہ متعارف کرایا، جو ناقابلِ قبول اور انتہائی خطرناک ہے۔

بیان میں کہا گیا ہے کہ تمام متعلقہ فریقوں کو مطلع کیا جاتا ہے کہ آبنائے ہرمز سے گزرنے کے لیے صرف وہی راستے مجاز ہیں جو اسلامی جمہوریہ ایران نے مقرر کیے ہیں، ان راستوں سے ہٹ کر جہاز رانی ناصرف انتہائی خطرناک ہے بلکہ ممنوع بھی ہے۔ آئی آر جی سی کا کہنا ہے کہ ہم تمام بحری جہازوں کو متنبہ کرتے ہیں کہ مقررہ بحری راہداریوں سے باہر کسی بھی قسم کی نقل و حرکت سے سختی سے گریز کریں۔

یو این آئی۔ ع ا۔

واشنگٹن، امریکی صدر ڈونلڈ ٹرمپ کی جانب سے دعویٰ کیا گیا ہے کہ ایران مذاکرات میں غیر معمولی رعایتیں دینے پر مجبور ہوگیا ہے سینیٹ کے دورے سے قبل صحافیوں سے مختصر گفتگو کرتے ہوئے ڈونلڈ ٹرمپ نے کہا کہ ہم واضح برتری کے ساتھ جیت رہے ہیں، مذاکرات میں ایران کے ساتھ معاملات بہت بہتر انداز میں آگے بڑھ رہے ہیں۔ امریکہ میں اپوزیشن پر تنقید کرتے ہوئے امریکی صدر نے کہا کہ وہ بڑی تعداد میں کمیونسٹوں کو لانا چاہتے ہیں، جن کو آگے بڑھایا جا رہا ہے وہ کمیونسٹ ہیں، امریکہ میں کمیونزم کو جگہ نہیں دی جائے گی۔

بعدازاں، ڈونلڈ ٹرمپ نے اپنے ایک اور بیان میں دعویٰ کیا کہ ایران بہت بہترین جا رہا ہے، وہ ہر اس چیز پر راضی ہے جو میں چاہتا ہوں، جو ہمیں چاہیے وہ ایران کو کرنا ہوگا ورنہ ہم واپس جائیں گے اور جو چاہیں گے کریں گے۔ انہوں نے کہا کہ امریکہ میں تاریخ کی سب سے زیادہ فیکٹریاں بن رہی ہے، ملک میں جتنی فیکٹریاں ہوں گی اتنی زیادہ نوکریاں پیدا ہوں گی۔ ان کا کہنا تھا کہ خام تیل کی قیمتیں بھی نیچے جا رہی ہیں۔

یو این آئی۔ ع ا۔