بیروت، اسرائیل جنوبی لبنان پر حملے جاری رکھے ہوئے ہے جبکہ وزیرِ اعظم نیتن یاہو نے کہا ہے کہ اسرائیلی فوج مقبوضہ علاقوں سے واپس نہیں جائے گی۔

الجزیرہ کے مطابق لبنانی مزاحمتی تنظیم حزب اللّٰہ نے اپنے ایک بیان میں دعویٰ کیا ہے کہ اسرائیلی تازہ حملوں میں اپنے گھروں کو واپس جانے والے شہریوں کو نشانہ بنایا گیا ہے جس کے نتیجے میں 2 افراد شہید اور 1 زخمی ہوا ہے۔

دوسری جانب بحرین میں ہونے والے اجلاس کے بعد امریکی وزیرِ خارجہ مارکو روبیو نے کہا کہ امریکہ اور خلیجی اتحادیوں نے آبنائے ہرمز سے آمدورفت پر ایران کی کسی بھی قسم کی فیس یا پابندی کو مسترد کر دیا ہے۔

ادھر ایران کی پاسدارانِ انقلاب نے خبردار کیا ہے کہ اجازت کے بغیر آبنائے ہرمز سے گزرنے کی اجازت نہیں دی جائے گی جس سے خطے میں کشیدگی برقرار ہے۔

یو این آئی۔ ع ا۔

واشنگٹن، امریکی وزیرخارجہ مارکو روبیو نے ایران کو آبنائے ہرمز سے فیس وصولی پر وارننگ دے دی۔

خلیج تعاون کونسل وزرائےخارجہ اجلاس کے بعد میڈیا سے گفتگو میں انہوں نے کہا کہ آبنائے ہرمز سے گزرنے پر ٹول یا فیس قبول نہیں، ایران کو رقم منتقل کی ہے اور نہ تعمیرنو کا منصوبہ ہے۔

وزیر خارجہ نے کہا کہ خلیجی ممالک کے ساتھ اچھی ملاقاتیں ہوئیں جن میں خدشات پربات ہوئی، خلیجی ملک چاہتے ہیں ایران سے مذاکرات میں انہیں اعتماد میں لیا جائے۔

ان کا کہنا تھا کہ سفارتی عمل میں انہیں شامل کریں گے عمان سے تعلقات ٹھیک ہیں، عمان بھی ٹول کے حق میں نہیں۔ اجلاس میں مارکوروبیو نے کہا کہ امریکہ خلیجی اتحادیوں کی سلامتی پر سمجھوتہ نہیں کرے گا، بین الاقوامی آبی گزرگاہیں کسی ایک ریاست کی ملکیت نہیں ہوتیں۔

یو این آئی۔ ع ا۔

واشنگٹن، امریکی نائب صدر جے ڈی وینس کا کہنا ہے کہ امریکہ اور ایران تنازعات کو کم کرنے کے لیے دوحہ میں براہ راست آئی آر جی سی چینل استعمال کریں گے۔

نائب صدر نے بتایا کہ واشنگٹن اور تہران نے مزید تنازع کے خطرے کو کم کرنے کے لیے ایران کی پاسداران انقلاب کے ساتھ براہ راست چینل قائم کرنے پر اتفاق کیا ہے۔ برطانوی دائیں بازو کی نیوز سائٹ UnHerd کے ساتھ ایک انٹرویو میں، جے دی وینس نے کہا کہ اس انتظام میں دوحہ میں ایرانی اور امریکی فوجی حکام کی ملاقاتیں شامل ہوں گی تاکہ تنازعات کو حل کیا جا سکے۔ انہوں نے ایرانی حکام سے بات چیت کو ٹھیک قرار دیتے ہوئے کہا کہ ہم آئی آر جی سی سے کسی کو دوحہ میں امریکی سینٹرل کمانڈ] کے کسی کے ملنے کے لیے بھیجیں گے’ اور اس طرح ہم ان تنازعات کو حل کرنے جا رہے ہیں۔

وینس نے یہ بھی کہا کہ متحدہ عرب امارات نے ایران کے ساتھ ایسے چینل کھولے ہیں جو پہلے موجود نہیں تھے، بشمول آئی آر جی سی کے ساتھ۔۔

یو این آئی۔ ع ا۔