تہران، ایرانی وزارتِ خارجہ کے ترجمان اسماعیل بقائی کا کہنا ہے کہ پاکستان وفد بھیجنے کا فی الحال کوئی پلان نہیں۔

ایک بیان میں اسماعیل بقائی نے کہا ہے کہ حالیہ دنوں میں سفارتی پیش رفت پاکستان کی ثالثی میں کئی ہفتوں سے جاری مذاکرات اور رابطوں کا نتیجہ ہے۔ انہوں نے کہا کہ ایران اس وقت جوہری معاملے پر بات چیت نہیں کر رہا، جنگ کے خاتمے کے لیے مذاکرات کر رہا ہے۔ ان کا کہنا ہے کہ ایک فریم ورک پر پہنچ گئے ہیں، لیکن کوئی یہ نہیں کہہ سکتا کہ امریکہ اور ایران کے درمیان معاہدہ بالکل قریب ہے، ممکنہ ایم او یو میں آبنائے ہرمز کے انتظام کے بارے میں کوئی خاص تفصیلات نہیں، آبنائے ہرمز کا انتظام ساحلی ممالک کا حق ہے۔

اسماعیل بقائی کا کہنا ہے کہ اسرائیلی اور امریکی جارحیت سے پہلے آبنائے ہرمز کھلی تھی۔ انہوں نے کہا کہ لبنان سمیت تمام محاذوں پر جنگ کا خاتمہ ممکنہ معاہدے کا حصہ ہو گا۔ ترجمان ایرانی وزارتِ خارجہ کا کہنا ہے کہ ایران آبنائے ہرمز پر ٹول نہیں لے گا، لیکن سروس چارجز لینا عام بات ہے، خدمات کی فراہمی کی فیس لینے کو ٹول نہیں کہا جانا چاہیے۔ انہوں نے کہا کہ 14 نکاتی ایم او یو جنگ کے خاتمے اور امریکی بحری ناکہ بندی ختم کرنے پر مرکوز ہے، بدلے میں ایران ہرمز میں محفوظ آمد و رفت کو یقینی بنانے کے لیے اقدامات کرے گا۔

ترجمان نے بتایا کہ اگر مفاہمتی یادداشت کو حتمی شکل دے دی گئی تو اس کی بعض تفصیلات اور دیگر موضوعات بشمول جوہری معاملے پر آئندہ 60 روز کے دوران مذاکرات کیے جائیں گے۔ ان کا کہنا ہے کہ اسرائیل ایران اور امریکہ کے درمیان جاری مذاکرات کو سبوتاژ کرنے کی کوشش کر رہا ہے۔ انہوں نے بتایا کہ ایرانی وزیرِ خارجہ امریکی ویزا مسائل کے باعث نیویارک میں اقوام متحدہ کی سلامتی کونسل کے اجلاس میں شرکت نہیں کریں گے۔

یو این آئی۔ ع ا۔

تہران، ایران کے سپریم لیڈر مجتبیٰ خامنہ ای کے مشیر محسن رضائی نے کہا ہے کہ چوتھی جنگ کے لیے ہماری انگلی ٹریگر پر ہے۔

ایک تقریب سے خطاب میں انہوں نے کہا کہ ایرانی حکام مذاکرات کے ذریعے ایرانی قوم کے حقوق کے حصول کے لیے بھی کوششیں جاری رکھے ہوئے ہیں۔

محسن رضائی کا کہنا ہے کہ موجودہ مذاکرات حتمی مرحلے میں داخل ہو چکے ہیں۔ ان کا یہ بھی کہنا ہے کہ مجھے امید ہے کہ گزشتہ 47 برس کی جدوجہد ایک ایسے نتیجے پر پہنچے گی جو ایران کے لیے آئندہ 50 سال تک سلامتی اور استحکام کی ضمانت بنے گا۔

یو این آئی۔ ع ا۔

تل ابیب، اسرائیلی وزیرِ اعظم نیتن یاہو نے کہا ہے کہ امریکی صدر ڈونلڈ ٹرمپ سے اہم گفتگو ہوئی ہے جس میں دونوں رہنماؤں نے اس بات پر اتفاق کیا ہے کہ ایران کے ساتھ کوئی بھی معاہدہ جوہری خطرے کے مکمل خاتمے کو یقینی بنائے گا۔

نیتن یاہو نے سوشل میڈیا پلیٹ فارم ایکس پر اپنے بیان میں کہا کہ اس کا مطلب یہ ہے کہ ایران کی یورینیئم کی افزودگی کی تنصیبات ختم کی جائیں اور جوہری مواد کو ایرانی سر زمین سے ہٹایا جائے۔ انہوں نے مزید کہا کہ میری پالیسی اور صدر ٹرمپ کی پالیسی میں کوئی تبدیلی نہیں آئی، ایران کو ایٹمی ہتھیار حاصل نہیں کرنے دیے جائیں گے۔

اسرائیلی وزیرِ اعظم کے مطابق ٹرمپ نے اسرائیل کے حقِ دفاع کی بھی دوبارہ حمایت کی ہے، خاص طور پر لبنان سمیت دیگر محاذوں پر درپیش خطرات کے تناظر میں۔ دوسری جانب امریکہ اور ایران کے درمیان جاری کشیدگی اور جنگ کے خاتمے کے لیے سفارتی کوششیں تیز ہو گئی ہیں، جبکہ مذاکرات میں پاکستان ثالثی کا کردار ادا کر رہا ہے۔

ٹرمپ نے سوشل میڈیا پر جاری اپنے بیان میں کہا ہے کہ مذاکرات منظم اور مثبت انداز میں آگے بڑھ رہے ہیں اور میں نے اپنے نمائندوں کو ہدایت کی ہے کہ کسی جلد بازی سے کام نہ لیا جائے کیونکہ وقت ہمارے حق میں ہے۔ امریکی صدر نے کہا ہے کہ ایران کے ساتھ امریکہ کے تعلقات زیادہ پیشہ ورانہ اور تعمیری سمت میں جا رہے ہیں۔ ماہرین کا کہنا ہے کہ اگر موجودہ مذاکرات کامیاب ہوتے ہیں تو یہ مشرقِ وسطیٰ میں جاری کشیدگی کے خاتمے کی جانب ایک بڑی پیش رفت ثابت ہو سکتی ہے۔

یو این آئی۔ ع ا۔