خبراردو:
اگلے برس منعقد ہونے والے پارلیمانی اور اسمبلی انتخابات کے پیش نظر بی جے پی ریاست جموں وکشمیر میں اپنی پوزیشن مضبوط بنانے کی خاطر آنے والے دنوں میں اعلیٰ سطحی میٹنگ کا انعقاد کررہی ہے جس میں وزیر اعظم نریندر مودی اور بی جے پی کے قومی صدر امت شاہ ریاستی یونٹ کے لیڈران سے مل بیٹھ کر آئندہ کا لائحہ عمل ترتیب دیں گے۔ معلوم ہوا ہے کہ اگلے برس اپریل یا مئی میں منعقد ہونے والے انتخابات میں کشمیر میں اپنا کھاتہ کھولنے کے لیے بی جے پی حکومت سازی میں اشتراک کے لیے سجاد غنی لون کی سربراہی والی پیپلز کانفرنس کے ساتھ بھی گٹھ جوڑ کرسکتی ہے۔

ذرائع سے معلوم ہو اہے کہ سال 2019میں منعقد ہونے والے پارلیمانی اور اسمبلی انتخابات کے پیش نظر ریاست جموں وکشمیر میں بھارتیہ جنتا پارٹی اپنی پوزیشن مضبوط بنانے کی خاطر بڑے پیمانے پر میٹنگوں کا انعقاد کرنے جارہی ہے جن میں وادی کشمیر میں پارٹی اپنا کھاتہ کھولنے کے لیے متوقع طور پر سجاد غنی لون کی سربراہی والی پیپلز کانفرنس کے ساتھ انتخابی گٹھ جوڑ کرسکتی ہے۔ ذرائع سے معلوم ہوا ہے کہ بی جے پی کی اعلیٰ قیادت آنے والے دنوں میں اگلے برس ریاستی اسمبلی کے لیے ہونے والے انتخابات سے متعلق حتمی لائحہ عمل ترتیب دینے کے لیے بڑے پیمانے پر پارٹی لیڈران سے صلاح و مشورہ کرنے جارہی ہے ۔

بی جے پی ریاست جموں وکشمیر میں منعقد ہونے والے اسمبلی انتخابات میں اپنی پوزیشن مضبوط بنانے کے لیے انتخابات سے قبل ریاستی یونٹ کے لیڈران سے بڑے پیمانے پر صلاح مشورہ کرنے جارہی ہے۔ انہوں نے بتایا کہ آنے والے دنوں میں وزیر اعظم نریندر مودی اورپارٹی صدر امت شاہ ریاستی یونٹ کے سربراہوں اور دیگر لیڈران کے ساتھ سنجیدہ غور و فکر عمل میں لارہی ہے جس میں آنے والے اسمبلی انتخابات کے دوران وادی کشمیر میں بھی بی جے پی اپنی پوزیشن کو مضبوط بنانے کے لیے ٹھوس لائحہ عمل ترتیب دے گی۔بی جے پی ذرائع نے بتایا کہ میٹنگ کے دوران وزیر اعظم نریندر مودی اور پارٹی صدر امت شاہ پارٹی کے ریاستی لیڈران سے مکمل تفصیلات حاصل کریں گے جس کے بعد ہی آگے کا لائحہ عمل ترتیب دیا جائے گا۔ انہوں نے بتایا کہ میٹنگ کے دوران پارٹی کی اعلیٰ قیادت ریاستی لیڈران کے ساتھ اسمبلی انتخابات سے متعلق پالیسی اور طریق کار پر غوروخوض کرے گی۔

انہوں نے بتایا کہ ریاست کی سرمائی راجدھانی جموں میں پارٹی ٹھیک ٹھاک سے اپنا کام چلارہی ہے اور وہاں پر پارٹی کی پوزیشن مضبوط ہے تاہم وادی کشمیر میں بی جے پی آج تک اپنا کھاتہ کھولنے میں کامیاب نہیں ہوئی ہے جس کے لئے منعقد ہو نے والی میٹنگ کے دوران تفصیلی تبادلہ خیال کیا جائے گا۔ انہوں نے بتایا کہ پارٹی کی اعلیٰ قیادت کی نظریں وادی کشمیر کی چند نشستوں پر ٹکی ہوئی اور ان نشستوں پر کامیابی حاصل کرنے کے لئے پارٹی انتہائی متفکر دکھائی دے رہی ہے۔ ذرائع نے بتایا کہ انتخابات سے قبل بی جے پی وادی میں اتحاد کے آپشن پر بھی غور کرے گی اور ممکنہ طور پر سجاد غنی لون کی پیپلز کانفرنس کے ساتھ اس معاملے پر بات چیت ہوگی۔انہوں نے کہا کہ اگر چہ اسمبلی انتخابات کے دوران پارٹی اپنا کھاتہ کھولنے میں کامیاب نہیں ہوئی تاہم حال ہی میں منعقدہ بلدیاتی اور پنچایتی انتخابات کے دوران پارٹی نے زمینی سطح پر اپنا ایک نیٹ ورک قائم کرلیا۔انہوں نے بتایا کہ ہمارے تعاون سے ہی پیپلز کانفرنس کے اُمیدوار نے سرینگر میونسپل کارپوریشن میں بطور میئر کے عہدے پر کامیابی حاصل کرلی۔ذرائع نے بتایا کہ میٹنگ کے دوران وزیر اعظم نریندر مودی ریاستی لیڈران کے ساتھ پارلیمانی اور اسمبلی انتخابات سے متعلق صورتحال حاصل کریں گے ۔ انہوں نے بتایا کہ وزیر اعظم ریاستی یونٹ کے لیڈران کے ساتھ پارلیمانی اور اسمبلی انتخابات کو الگ الگ یا اکھٹے منعقد کرانے کے حوالے سے رائے حاصل کریں گے۔ انہوں نے بتایا کہ میٹنگ کے دوران سال 2014میں منعقد ہوئے اسمبلی انتخابات میں بی جے پی کی طرف سے 25سیٹوں پر کامیابی حاصل کرنے کا معاملہ بھی چھایا رہے گا جبکہ پارٹی آنے والے اسمبلی انتخابات کے دوران 44سیٹوں کا ہدف سامنے رکھے گی ۔انہوں نے بتا یا کہ ریاستی یونٹ کے لیڈران بشمول صدر رویندررینا اور جنرل سیکرٹری اشوک کول بھی میٹنگ میں موجود رہیں گے۔انہوں نے بتایا کہ میٹنگ کے دوران بی جے پی کے قومی جنرل سیکرٹری رام مادھو کے علاوہ پی ایم او آفس میں تعینات ڈاکٹر جتیندر سنگھ بھی شرکت کررہے ہیں۔

ادھر پارٹی ذرائع نے بتایا کہ میٹنگ کے حوالے سے وزیر اعظم نریندر مودی اور پارٹی صدر امت شاہ کا دورہ کشمیرکی تاریخ پارٹی آنے والے دنوں میں طے کرے گی۔انہوں نے بتایا کہ وزیر اعظم نریندر مودی دورے کے دوران ریاست میں کئی اہم پروجیکٹوں کا سنگ بنیاد بھی رکھنے والے ہیں جبکہ اس دوران وہ پارٹی کارکنان کے جلسے سے بھی خطاب کریں گے۔ کے این ایس