جموں، شری امرناتھ یاترا کے 5300 سے زیادہ تیرتھ یاتریوں کا ایک نیا جتھہ منگل کو جموں کے بھگوتی نگر یاتری نواس بیس کیمپ سے جنوبی کشمیر ہمالیہ میں واقع گپھا مندر کے دو بیس کیمپوں کے لیے سخت سکیورٹی کے درمیان روانہ ہوا۔

اہلکاروں نے بتایا کہ 5335 تیرتھ یاتری آج صبح 232 ہلکی اور بھاری گاڑیوں کے قافلے میں بیس کیمپ سے روانہ ہوئے۔ اس جتھے میں 1736 تیرتھ یاتری بالتال بیس کیمپ اور 3599 تیرتھ یاتری پہلگام بیس کیمپ کے لیے روانہ ہوئے۔ تیرتھ یاتری کئی سطحوں والی سکیورٹی کے درمیان روانہ ہوئے؛ یاترا محفوظ اور پرامن طریقے سے مکمل ہو، اس کے لیے سول ایڈمنسٹریشن، پولیس، سکیورٹی فورسز اور شری امرناتھ شرائن بورڈ نے مل کر انتظام کیا تھا۔

واضح رہے کہ یاترا کے پہلے آٹھ دنوں میں ملک کے الگ الگ حصوں سے 2.5 لاکھ سے زیادہ تیرتھ یاتریوں نے گپھا مندر کے درشن کیے ہیں۔ جموں و کشمیر انتظامیہ نے تیرتھ یاتریوں سے اپیل کی ہے کہ وہ کنفرم رجسٹریشن ملنے اور اپنی طے شدہ یاترا کی تاریخ پر ہی یاترا کریں، کیونکہ بغیر رجسٹریشن والے کسی بھی تیرتھ یاتری کو بیس کیمپ تک جانے کی اجازت نہیں دی جائے گی۔

جموں و کشمیر کے لیفٹیننٹ گورنر منوج سنہا نے 2 جون کو جموں سے یاترا کے پہلے جتھے کو ہری جھنڈی دکھا کر روانہ کیا تھا۔

یو این آئی۔ این یو۔

سرینگر، اقتصادی جرائم ونگ (ای او ڈبلیو) کشمیر نے سرکاری ملازمت دلانے کے نام پر مبینہ فراڈ، جعلسازی اور دھوکہ دہی کے 11 مقدمات میں مطلوب ایک ملزم کو برسوں تک گرفتاری سے بچنے کے بعد گرفتار کر کے عدالتی احکامات کے تحت سینٹرل جیل سرینگر منتقل کر دیا ہے۔ای او ڈبلیو کے مطابق گرفتار ملزم کی شناخت عبدالمجید میر، ساکن لشتیال، کلاروس، ضلع کپواڑہ کے طور پر ہوئی ہے۔ اسے پرنسپل ڈسٹرکٹ اینڈ سیشنز جج سرینگر کی جانب سے جاری طویل عرصے سے زیرِ التوا وارنٹ کی تعمیل میں گرفتار کیا گیا۔

حکام نے بتایا کہ ملزم کے خلاف 2015 میں کرائم برانچ کشمیر میں درج ایف آئی آر کے تحت دھوکہ دہی، جعلسازی، جعلی دستاویزات کے استعمال اور مجرمانہ سازش سے متعلق دفعات کے تحت مقدمہ درج کیا گیا تھا۔ای او ڈبلیو کے مطابق عبدالمجید میر ایک عادی ملزم ہے اور اس کے خلاف کشمیر کے مختلف علاقوں میں سرکاری ملازمتوں کے نام پر جعلسازی اور جعلی تقرری ناموں کے استعمال سے متعلق مجموعی طور پر 11 مقدمات درج ہیں۔ ان میں سے چار مقدمات زیرِ تفتیش ہیں، جبکہ سات مقدمات میں چارج شیٹ متعلقہ عدالتوں میں پیش کی جا چکی ہے۔

اقتصادی جرائم ونگ نے خفیہ اطلاع کی بنیاد پر ملزم کو گرفتار کر کے عدالت میں پیش کیا، جہاں سے اسے عدالتی تحویل میں بھیجنے کے احکامات صادر کیے گئے، جس کے بعد اسے سینٹرل جیل سرینگر منتقل کر دیا گیا۔ای او ڈبلیو کے مطابق ملزم کے خلاف 2015 سے 2026 کے دوران کرائم برانچ کشمیر، ای او ڈبلیو کشمیر، میسومہ، کپواڑہ، پنتھا چوک اور لال بازار پولیس تھانوں میں مختلف ایف آئی آرز درج کی گئی ہیں۔اقتصادی جرائم ونگ نے عوام سے اپیل کی ہے کہ سرکاری ملازمت دلانے کے جعلی وعدوں، فرضی تقرری ناموں اور روزگار سے متعلق ہر قسم کی دھوکہ دہی سے ہوشیار رہیں اور ایسی کسی بھی مشتبہ سرگرمی کی فوری اطلاع قریبی پولیس تھانے یا کرائم برانچ کو دیں تاکہ بروقت قانونی کارروائی عمل میں لائی جا سکے۔

یواین آئی ۔م ا ع

سرینگر، جموں و کشمیر کے وزیرِ اعلیٰ عمر عبداللہ نے کہا ہے کہ 13 جولائی کو مزارِ شہداء، پرانے سرینگر جانے سے رہنماؤں کو روکنے کے لیے عائد کی گئی پابندیوں نے جموں و کشمیر میں معمول کے حالات کے حکومتی دعوؤں کو بے نقاب کر دیا ہے۔

نواۓ صبح میں واقع نیشنل کانفرنس کے ہیڈکوارٹر میں 13 جولائی 1931 کے شہداء کو خراجِ عقیدت پیش کرنے کے بعد صحافیوں سے گفتگو کرتے ہوئے عمر عبداللہ نے کہا کہ مزارِ شہداء جانے سے روکنے کے فیصلے سے نیشنل کانفرنس نہیں بلکہ فیصلہ کرنے والے خود بے نقاب ہوئے ہیں۔

انہوں نے کہا کہ ایک طرف حکومت معمول کے حالات کا دعویٰ کرتی ہے، جبکہ دوسری جانب امرناتھ یاترا کے لیے قومی شاہراہ بند کرنا اور مزارِ شہداء پر جانے سے روکنا اس دعوے کی نفی کرتا ہے۔

وزیرِ اعلیٰ نے کہا کہ اگر انتظامیہ صرف تقریباً 150 نیشنل کانفرنس کارکنوں کے مزارِ شہداء جانے سے بھی خوفزدہ ہے تو یہ ان کی اپنی کمزوری کو ظاہر کرتا ہے۔

13 جولائی 1931 کے شہداء کا ذکر کرتے ہوئے عمر عبداللہ نے کہا کہ ان کی قربانیوں کو فرقہ وارانہ نظر سے نہیں بلکہ تاریخی تناظر میں دیکھا جانا چاہیے، کیونکہ ان کی جدوجہد برطانوی بالادستی کے خلاف، جمہوری حقوق اور آزادی کے لیے تھی، نہ کہ مذہبی بنیادوں پر۔

انہوں نے الزام عائد کیا کہ شہداء کی قربانیوں کو صرف اس لیے نظرانداز کیا جا رہا ہے کیونکہ وہ مسلمان تھے، جبکہ اُس وقت کے مہاراجہ مسلمان نہیں تھے۔عمر عبداللہ نے کہا کہ مزارِ شہداء پر عائد پابندیاں عارضی ہیں اور وہ جلد یا بدیر وہاں جا کر شہداء کو خراجِ عقیدت پیش کریں گے۔ریاستی درجے کی بحالی کے مطالبے پر جنتر منتر میں نیشنل کانفرنس کے مجوزہ احتجاج کے حوالے سے انہوں نے بتایا کہ پارٹی نے مقررہ طریقۂ کار کے مطابق دہلی پولیس سے اجازت طلب کی ہے اور توقع ہے کہ منگل یا بدھ تک اس بارے میں جواب موصول ہو جائے گا۔

یو این آئی۔م ا ع