مسقط، امریکہ اور خلیجی ممالک کی مخالفت کے باوجود عمان نے آبنائے ہرمز سے گزرنےوالے جہازوں سے رقم وصول کرنے کا عندیہ دے دیا۔

امریکی جریدے بلومبرگ کے مطابق عمان نے یورپی حکام سے کہا ہے کہ آبنائے ہرمز کو آلودگی سے بچانے اور جہازوں کو راہداری میں مدد دینے کے عوض فیس وصول کی جا سکتی ہے۔

عمانی حکام نے کہا ہے کہ آبنائے ہرمز کو اب جنگ سے پہلے کے حالات تک لے جایا نہیں جا سکتا۔ عمانی حکام کا کہنا ہے کہ وہ بین الاقوامی سمندری قوانین کی ہمیشہ پابندی کریں گے لیکن آبنائے ہرمز کو آلودگی سے پاک رکھنے اور جہازوں کو راہداری میں مدد دینے کی خدمات کے لیے کچھ فیس لی جا سکتی ہے۔

قطر نے بھی آبنائے ہرمز فیس پر ملا جلا ردعمل دیا ہے۔ قطر نے پہلے کہا تھا کہ وہ ایران کے ساتھ مل کر سمندری راستوں پر آنے والے خرچ سے متعلق بات کرے گا۔

واضح رہے کہ خلیج تعاون کونسل کے آبنائے ہرمز میں ٹول لگانے کی مخالفت سے متعلق اعلامیے پر عمان اور قطر دونوں نے ہی دستخط کیے تھے۔ دوسری جانب امریکی وزیرخارجہ مارکو روبیو نے واضح کیا تھا کہ آبنائے ہرمز سے گزرنے کی کوئی فیس نہيں ہوگی ، کوئی بھی ملک آبنائے ہرمز سے ٹیکس وصول نہيں کرسکتا۔

یو این آئی۔ ع ا۔

تہران، ایران پر امریکی حملے کے بعد پاسداران انقلاب نے فوری ردعمل ظاہر کرتے ہوئے کہا ہے کہ اس نے سرک جزیرے پر امریکی فوج کا حملہ ناکام بنا دیا ہے۔

ایرانی پاسدارانِ انقلاب نے امریکی فضائی حملے کا بھرپور اور فیصلہ کن جواب دینے کا اعلان کیا ہے، ترجمان پاسداران انقلاب کے مطابق امریکی افواج نے جزیرہ سرک پر حملہ کیا تھا لیکن ایرانی دفاعی فورسز نے کارروائی کو ناکام بنا کر حملہ پسپا کر دیا۔ پاسداران انقلاب کے بیان میں کہا گیا ہے کہ ایران اپنی خودمختاری کے دفاع کے لیے ہر ضروری اقدام کرے گا اور امریکی کارروائی کا فوری اور مؤثر جواب دیا جائے گا۔ پاسداران انقلاب نے یہ بھی کہا کہ اس نے خطے میں امریکی فوج کے متعدد ٹھکانوں کو نشانہ بنایا ہے، اور امریکا کے کسی بھی نئے حملے کا زیادہ سخت اور وسیع جواب دیا جائے گا۔

ایران کا کہنا ہے کہ آبنائے ہرمز میں آمد و رفت، ٹرانزٹ کے انتظامات سے متعلق ذمہ داریاں ایک مفاہمتی یادداشت کے تحت ایران کے پاس ہیں، امریکہ نے مختلف فریقوں کو اُکسا کر ان انتظامات کی خلاف ورزی کی کوشش کی ہے، اس لیے مناسب جواب دیا گیا ہے۔

واضح رہے کہ اس سے قبل امریکی سینٹرل کمانڈ (سینٹکام) نے بیان میں کہا تھا کہ آبنائے ہرمز میں تجارتی جہاز پر مبینہ ایرانی ڈرون حملے کے جواب میں امریکہ نے ایران کے اندر فضائی کارروائی کی، اور ایرانی میزائل اور ڈرون ذخائر کے علاوہ ساحلی ریڈار تنصیبات کو نشانہ بنایا۔ یہ حملے 25 جون کو سنگاپور کے تجارتی جہاز پر ہونے والے مبینہ ڈرون حملے کے ردعمل میں کیے گئے ہیں، سینٹ کام نے کہا کہ تجارتی جہاز پر ایرانی حملہ جنگ بندی کی خلاف ورزی ہے، خطے میں استحکام اور محفوظ بحری نقل و حمل کے لیے کارروائیاں جاری رہیں گی۔

یو این آئی۔ ع ا۔

کراکاس، جنوبی امریکی ملک وینزوئیلا میں تباہ کن زلزلوں کے بعد اموات کی تعداد 920 سے تجاوز کرگئی ہے۔

دارالحکومت کراکس و دیگر متاثرہ علاقوں میں سیکڑوں عمارتیں زمین بوس ہو چکی ہیں، درجنوں افراد ملبے تلے دبے ہوئے ہیں، جن کی تلاش کا کام جاری ہے۔ مقامی حکام کے مطابق زلزلوں میں 13 اسپتال، 25 شاپنگ سینٹرز اور 1,002 دیگر ڈھانچے شدید متاثر ہوئے ہیں۔ زلزلوں میں 4 ہزار 300 سے زائد افراد زخمی ہوئے ہیں جب کہ ہزاروں لاپتہ ہیں، سائمن بولیوار ایئرپورٹ کی بندش کے باعث امدادی سرگرمیوں میں مشکلات پیش آ رہی ہیں، دنیا بھر سے امدادی سامان اور رضاکار متاثرہ علاقوں میں پہنچ رہے ہیں اور مواصلاتی بحالی کے لیے مختلف اقدامات بھی جاری ہیں۔

واضح رہے کہ ملبوں تلے دبے افراد سے متعلق بے چینی بڑھتی جا رہی ہے، کیوں کہ وینزوئیلا پہلے ہی سیاسی اور مالی بحران میں گھرا ہوا تھا اور ایسے میں بعض مقامی رہائشی ملبہ ہٹانے کے لیے شہری رضاکاروں سے مدد کی اپیل کر رہے ہیں، ان کا کہنا ہے کہ ہنگامی امدادی کارروائیاں ناکافی ہیں۔

ڈاکٹروں کے مطابق طویل عرصے سے فنڈز کی کمی کے باعث صحت کا نظام مریضوں کی اچانک بڑھتی ہوئی تعداد کا مؤثر علاج کرنے کے لیے تیار نہیں ہے۔ امریکی فوج وینزوئیلا میں امدادی اور ریسکیو کارروائیوں میں مصروف ہے۔ یاد رہے کہ رواں سال کے آغاز میں امریکی اسپیشل فورسز نے اُس وقت کے صدر نکولس مادورو کو گرفتار کرنے کے لیے ایک مہلک کارروائی بھی کی تھی۔ امدادی کارروائیوں میں حصہ لینے کے لیے بھاری مشینری، امدادی سامان اور بین الاقوامی امدادی کارکنوں کی بڑی تعداد شدید متاثرہ علاقوں کی جانب روانہ ہو رہی ہے۔

یو این آئی۔ ع ا۔