نئی دہلی عام آدمی پارٹی (عآپ) نے کہا ہے کہ بھارتیہ جنتا پارٹی (بی جے پی) کی حکومت میں دہلی کی سڑکوں پر چلتی بس کے اندر ایک خاتون کے ساتھ اجتماعی عصمت دری نے ایک بار پھر نربھیا سانحہ کی یادیں تازہ کر دی ہیں ‘عآپ’ کے قومی کنوینر اروند کیجریوال نے جمعرات کو ‘ایکس’ پر کہا کہ دہلی میں ایک بار پھر چلتی بس میں عصمت دری ہوئی ہے  ہم نے نربھیا سے کچھ نہیں سیکھا  یہ واقعہ پورے سماج کے لیے کلنک ہے۔ ‘عآپ’ کے دہلی ریاستی صدر سوربھ بھاردواج نے کہا کہ یہ انتہائی شرمناک ہے کہ دہلی میں نربھیا جیسا واقعہ دہرایا گیا ہے۔ 30 سال کی ایک خاتون کو رات میں بس میں وقت پوچھنے کے بہانے اغوا کر لیا گیا اور اس کے بعد چلتی بس میں تقریباً دو گھنٹے تک کئی لوگوں نے اس کے ساتھ اجتماعی عصمت دری کی۔ یہ بس دہلی کے رانی باغ علاقے میں سات کلومیٹر تک گھومتی رہی۔ انہوں نے کہا کہ دہلی پولیس سے اور کیا امید کی جا سکتی ہے، جس کے سربراہ لیفٹیننٹ گورنر چاہتے ہیں کہ دہلی کے باشندے ان کی ریلز دیکھیں، جن میں وہ چھولے بھٹورے اور جلیبی کھا رہے ہیں۔

مسٹر بھاردواج نے کہا کہ چلتی بس میں ڈرائیور اور کنڈکٹر نے خاتون کی اجتماعی عصمت دری کی۔ یہ معلومات دہلی پولیس نے میڈیا کو دیر سے کیوں دیں؟ اس کے پیچھے کیا وجہ تھی؟ کیا پولیس عصمت دری کے واقعے کو دبانا چاہتی تھی؟ کیا پولیس متاثرہ پر دباؤ بنانا چاہتی تھی، معاملے کو دبانے کی کوشش کر رہی تھی یا پھر ملزمان کو گرفتار کرنے کے بعد میڈیا کو بتانا چاہتی تھی کہ ایسا ہوا تھا، مگر پولیس نے انہیں پکڑ لیا ہے۔ انہوں نے کہا کہ پوری حکومت ریلز پر چلتی ہے۔ ہمارا اعتراض ریلز بنانے پر نہیں ہے، بلکہ انہیں اپنے حساب سے ایڈٹ کر کے پیش کرنے پر ہے۔ دہلی والے حکومت کی آڈینس نہیں ہیں لیکن آج بی جے پی نے دہلی کے شہریوں اور ووٹروں کو محض ایک آڈینس بنا دیا ہے۔

‘عآپ’ لیڈر نے دہلی کے پولیس کمشنر سے پوچھا کہ یہ کیسی امن و امان کی صورتحال ہے کہ شہر میں دو گھنٹے تک ایک بس چلتی رہی اور رانی باغ کوئی دور دراز کا علاقہ نہیں ہے، یہ بالکل سینٹرل دہلی ہے۔ اس میں بس گھومتی رہی، ایک خاتون کے ساتھ دو گھنٹے تک عصمت دری ہوتی رہی اور پھر اس خاتون کو سڑک پر پھینک دیا گیا۔ اس کے بعد بھی اس خبر کو دو دن تک چھپایا گیا۔ ہم پولیس کمشنر سے جاننا چاہتے ہیں کہ اس خبر کو کیوں چھپایا گیا اور آگے ایسا واقعہ نہ ہو، اس کے لیے وہ کیا کر رہے ہیں؟ دہلی کے سابق نائب وزیر اعلیٰ اور پنجاب کے ‘عآپ’ انچارج منیش سسودیا نے ‘ایکس’ پر کہا کہ دہلی میں ایک اور نربھیا سانحہ! چلتی بس میں پھر سے گینگ ریپ۔ دہلی میں بی جے پی کے تمام انجن ٹھپ ہو چکے ہیں۔ اسکول میں بچیاں محفوظ نہیں، بسوں میں بھی محفوظ نہیں ہیں۔

‘عآپ’ کی سینئر لیڈر اور دہلی اسمبلی میں اپوزیشن لیڈر آتشی نے دہلی کے امن و امان پر گہرے دکھ اور غصے کا اظہار کرتے ہوئے کہا کہ دہلی میں نربھیا جیسا خوفناک منظر دوبارہ دیکھنا انتہائی دکھ بھرا اور شرمناک ہے۔ انہوں نے کہا کہ رانی باغ میں چلتی بس میں دو گھنٹے تک درندگی ہوتی رہی، لیکن بی جے پی حکومت کی ترجیح جوابدہی کے بجائے صرف ریلز اور برانڈنگ تک محدود رہ گئی ہے۔ مجرموں کے حوصلے اتنے بلند ہیں کہ انہیں قانون کا ڈر ہی نہیں رہا۔ دہلی کی بہن بیٹیاں کب تک بی جے پی کے اس بدانتظامی کے خوف میں زندگی گزاریں گی

یواین آئی۔ایف اے

نئی دہلی، کانگریس صدر ملکارجن کھرگے نے مرکزی حکومت پر بزرگوں، بیواؤں اور معذور افراد کو نظر انداز کرنے کا الزام لگاتے ہوئے کہا ہے کہ ان کی ماہانہ پنشن میں برسوں سے کوئی اضافہ نہیں کیا گیا ہے، جب کہ مہنگائی کی وجہ سے غریب اور محروم طبقہ شدید معاشی بحران کا سامنا کر رہا ہے مسٹر کھرگے نے بدھ کو سوشل میڈیا ‘ایکس’ پر لکھا کہ حکومت ایک طرف ملک کو کفایت شعاری اور قربانی کا درس دیتی ہے، وہیں دوسری طرف بزرگوں، بیواؤں اور معذوروں کا وقار چھین رہی ہے۔

انہوں نے الزام لگایا کہ گزشتہ 12 برسوں میں مودی حکومت نے بڑھاپے کی پنشن میں ‘ایک پیسے’ کا بھی اضافہ نہیں کیا، جبکہ مہنگائی مسلسل بڑھ رہی ہے۔ انہوں نے کہا کہ شہریوں کی قوتِ خرید میں تقریباً 45 فیصد کمی کے باوجود 200 روپے کی پنشن کی حقیقی قدر اب صرف 110 روپے، 300 روپے کی پنشن کی قدر 165 روپے اور 500 روپے کی پنشن کی قدر تقریباً 275 روپے کے برابر رہ گئی ہے۔

کانگریس صدر نے الزام لگایا کہ مرکزی حکومت عوام کی فلاح و بہبود پر اخراجات بڑھانے کے بجائے اشتہارات اور اپنی تشہیر پر بھاری رقم خرچ کر رہی ہے۔ انہوں نے کہا کہ 2014-15 سے 2024-25 کے درمیان حکومت نے اشتہارات کے ذریعے اپنی تشہیر پر 5,987.46 کروڑ روپے خرچ کیے۔ جناب کھرگے نے کہا کہ کروڑوں بزرگ شہری بنیادی ادویات اور خوراک تک کے لیے جدوجہد کر رہے ہیں، جبکہ حکومت اپنی تشہیر، بڑے پروگراموں اور انتخابی مہمات پر فضول خرچی کر رہی ہے۔

یواین آئی ۔ایف اے

نئی دہلی، عام آدمی پارٹی (عآپ) کے قومی کنوینر اروند کیجریوال نے بدھ کو کہا کہ پیپر لیک جیسے گھناؤنے کھیل کو بند کرنے کے لیے ملک کی ‘جنریشن زی’ (نوجوان نسل) کو سڑکوں پر اتر کر پرامن احتجاج کرنا پڑے گا مسٹر کیجریوال نے نیٹ پیپر لیک معاملے کے حوالے سے بدھ کو ملک کے نوجوانوں سے براہِ راست ورچوئل خطاب کیا۔ انہوں نے نوجوان نسل کو پکارتے ہوئے کہا کہ پیپر لیک بہت ہو چکا، اب اس گھناؤنے کھیل کو ختم کرنے کے لیے ملک کے نوجوانوں کو سڑکوں پر نکلنا ہوگا۔ انہوں نے نیپال اور بنگلہ دیش کی مثال دیتے ہوئے کہا کہ جب وہاں کے نوجوان اپنی حکومتیں بدل سکتے ہیں، تو ہمارے ملک کے نوجوان پیپر لیک میں ملوث وزراء اور لیڈروں کو جیل کیوں نہیں بھیج سکتے؟ انہوں نے کہا کہ ہر بار جانچ سی بی آئی کے سپرد کر دی جاتی ہے، لیکن آج تک کسی کو سزا نہیں ملی اور اس بار بھی کچھ ہونے والا نہیں ہے۔

انہوں نے سوال کیا کہ زیادہ تر پیپر لیک بی جے پی کے زیرِ اقتدار ریاستوں میں ہی کیوں ہوتے ہیں؟ کیا اس گھناؤنے کھیل میں بی جے پی کے لیڈر براہِ راست ملوث ہیں؟ کچھ لوگ اسے سسٹم کی ناکامی کہتے ہیں، لیکن ایسا کہہ کر وہ نادانستہ طور پر پیپر لیک میں شامل اعلیٰ عہدوں پر بیٹھے افراد کو بچا رہے ہیں۔ کیجریوال نے کہا کہ یہ ملک نوجوانوں کا ہے، ان لیڈروں کو ملک میں کوئی دلچسپی نہیں ہے کیونکہ ان کے بچے بیرون ملک پڑھتے ہیں۔ انہوں نے یاد دلایا کہ ملک کے ایک بڑے لیڈر نے کہا تھا کہ ضرورت پڑی تو جھولا اٹھا کر چلا جاؤں گا، لیکن ہم کہاں جائیں گے؟ ہمارا خاندان تو اسی ملک میں رہتا ہے، اس لیے ہمیں اور نوجوانوں کو مل کر ہی اس ملک کو بچانا ہوگا۔

انہوں نے کہا کہ ہر بار کی طرح اس بار بھی سی بی آئی نے 10-15 لوگوں کو گرفتار کیا ہے، لیکن ہر بار کی طرح یہ تمام ملزمان تین چار مہینوں میں ضمانت پر باہر آ جائیں گے اور اگلے سال پھر پیپر لیک کی تیاری شروع کر دیں گے۔ مسٹر کیجریوال نے اعداد و شمار دیتے ہوئے بتایا کہ 2014 سے اب تک ملک میں 93 پیپر لیک ہوئے ہیں، جن میں سے زیادہ تر بی جے پی کی ‘ڈبل اور ٹرپل انجن’ حکومتوں میں ہوئے۔ ان واقعات سے تقریباً 6 کروڑ نوجوانوں کا مستقبل برباد ہوا۔ سب سے زیادہ پیپر لیک راجستھان، اتر پردیش، اتراکھنڈ اور گجرات میں ہوئے جہاں بی جے پی کی حکومت ہے۔ حالیہ نیٹ پیپر لیک کا مرکز بھی راجستھان ہے اور جن پر شبہ ہے وہ بی جے پی کے لیڈر ہیں۔

عآپ لیڈر نے کہا کہ اگر نیپال اور بنگلہ دیش کے نوجوان سڑکوں پر اتر کر اپنی حکومتیں بدل سکتے ہیں تو ہمارے ملک کے نوجوان وزراء کو جیل کیوں نہیں بھیج سکتے؟ مجھے اپنے ملک کے نوجوانوں پر پورا بھروسہ ہے۔ یہ ملک نوجوانوں کا ہے، جبکہ لیڈروں کے بچے بیرون ملک تعلیم حاصل کر رہے ہیں۔

یواین آئی ۔ایف اے