نئی دہلی، کانگریس نے وزیر اعظم نریندر مودی کے سونے کے زیورات نہ خریدنے کے مشورے اور مرکزی حکومت کی جانب سے سونے چاندی پر امپورٹ ڈیوٹی بڑھانے کے فیصلے کو جولری کی صنعت پر حملہ قرار دیتے ہوئے حکومت سے 3.5 کروڑ سے زائد سناروں، کاریگروں اور چھوٹے کاروباریوں کے لیے خصوصی اقتصادی ریلیف پیکیج دینے کا مطالبہ کیا ہے کانگریس کے جنرل سکریٹری اور ایم پی رندیپ سنگھ سرجے والا نے جمعہ کو یہاں پارٹی ہیڈکوارٹر میں پریس کانفرنس کرتے ہوئے کہا کہ مسٹر مودی کی جانب سے سونے کے زیورات نہ خریدنے کی اپیل اور حکومت کی جانب سے سونے اور چاندی پر درآمدی ڈیوٹی (امپورٹ ڈیوٹی) 6 فیصد سے بڑھا کر 15 فیصد کرنے سے جیولری کے شعبے پر شدید بحران منڈلا رہا ہے۔ انہوں نے الزام لگایا کہ اس سے 3.5 کروڑ سے زائد سناروں، دکانداروں، تاجروں، کاریگروں اور مزدوروں کا روزگار متاثر ہونے والا ہے۔ انہوں نے کہا کہ ہندوستان میں سونے کے زیورات ثقافتی، سماجی اور مذہبی روایات کا اہم حصہ ہیں اور کروڑوں خواتین کے لیے معاشی تحفظ کا ذریعہ بھی ہیں۔ ملک میں 90 فیصد سے زیادہ جولری کا کاروبار ایم ایس ایم ای سیکٹر سے وابستہ ہے، جس سے کروڑوں لوگوں کی روزی روٹی وابستہ ہے۔

مسٹر سرجے والا نے الزام لگایا کہ سونے کے زیورات نہ خریدنے کے مشورے اور امپورٹ ڈیوٹی میں اضافے سے زیورات کے کاروبار پر دوہری مار پڑے گی اور اس سے اسمگلنگ بڑھنے کا بھی خدشہ ہے۔ ان کا کہنا تھا کہ مودی حکومت کے نوٹ بندی، ٹیکس پالیسیوں، جی ایس ٹی اور لازمی ہال مارکنگ جیسے فیصلوں سے یہ شعبہ پہلے ہی متاثر رہا ہے۔ انہوں نے حکومت سے مطالبہ کیا کہ جولری کی صنعت سے وابستہ کروڑوں محنت کشوں کے لیے فوری طور پر ریلیف پیکیج کا اعلان کیا جائے تاکہ وہ حکومتی پالیسیوں سے پیدا ہونے والے بحران سے نکل سکیں۔ کانگریس نے یہ بھی مطالبہ کیا کہ سونے پر امپورٹ ڈیوٹی بڑھانے کے بجائے مقامی سطح پر سونے کے استعمال، ری سائیکلنگ اور انکم ٹیکس قوانین میں ترمیم جیسے متبادل راستوں پر غور کیا جائے۔ پارٹی نے کہا کہ وہ اس مسئلے کو پارلیمنٹ سے سڑک تک اٹھائے گی۔

یواین آئی۔ایف اے

نئی دہلی، کانگریس صدر ملکارجن کھرگے نے ملک میں ایندھن کے مسئلے کو مودی حکومت کا پیدا کردہ بحران قرار دیا ہے اور کہا ہے کہ اس کے لیے حکومت میں بیٹھے لوگوں میں دور اندیشی کا فقدان اور ان کی نااہلی ذمہ دار ہے مسٹر کھرگے نے جمعہ کو یہاں کہا کہ ہندوستان کے عوام کو یہ سمجھنا ہوگا کہ عالمی ایندھن کے بحران کے ساتھ ساتھ ہندوستان میں اقتصادی بحران کی بڑی وجہ مودی حکومت میں قیادت کا بحران، دور اندیش سوچ کی کمی اور نااہلی ہے۔ انہوں نے الزام لگایا کہ اس بحران کا خمیازہ عوام کو پیٹرول، ڈیزل اور رسوئی گیس کی بڑھی ہوئی قیمتوں کی صورت میں اپنی جیب سے بھگتنا پڑ رہا ہے۔ انہوں نے کہا کہ ڈیزل کی قیمتوں میں اضافے کا مہنگائی پر وسیع اثر ہوتا ہے اور اس سے پورے ہندوستان میں مہنگائی کی سلسلہ وار مار پڑتی ہے، جس کا اثر صنعتوں، کسانوں اور گھریلو بجٹ پر ہوتا ہے۔

کانگریس صدر نے الزام لگایا کہ مغربی ایشیا میں جنگ شروع ہونے کے وقت حکومت نے صورتحال کو معمول کے مطابق بتانے کی کوشش کی اور کانگریس پارٹی کی جانب سے اٹھائے گئے جائز سوالات کو مسترد کر دیا۔ ان کا کہنا تھا کہ روس سے تیل کی خریداری کے حوالے سے مارچ میں امریکہ نے 30 دن کی چھوٹ کی ‘اجازت’ دینے جیسے توہین آمیز الفاظ استعمال کیے۔ انہوں نے سوال کیا کہ آخر وزیر اعظم نریندر مودی نے ملک کو ایسی صورتحال میں کیوں پہنچا دیا کہ ہندوستان کو اجازت مانگنی پڑے۔ مسٹر کھرگے نے کہا کہ انتخابات کے دوران مرکزی حکومت یہ پیغام دیتی رہی کہ سب کچھ معمول پر ہے لیکن اب بحران بڑھنے پر وزیر اعظم لوگوں کو گھر سے کام کرنے اور ایندھن بچانے کا مشورہ دے رہے ہیں۔ انہوں نے یہ بھی کہا کہ جب بین الاقوامی سطح پر خام تیل کی قیمتیں کم تھیں، تب مرکزی حکومت نے عام لوگوں کو راحت نہیں دی، بلکہ مرکزی ٹیکسوں کے ذریعے بھاری ریونیو حاصل کیا۔ انہوں نے سوال کیا کہ اب مہنگائی کا بوجھ عام لوگوں پر کیوں ڈالا جا رہا ہے۔

یواین آئی۔ایف اے

نئی دہلی، وزیر تعلیم دھرمیندر پردھان نے اعلان کیا ہے کہ نیٹ-یو جی کا دوبارہ امتحان 21 جون کو منعقد کیا جائے گا اور طلبہ کو 14 جون تک داخلہ کارڈ (ایڈمٹ کارڈ) جاری کر دیے جائیں گے۔

مسٹر پردھان نے جمعہ کو پریس کانفرنس میں کہا کہ اگلے سال سے نیٹ کا امتحان او ایم آر شیٹ کے بجائے کمپیوٹر پر مبنی موڈ میں کرایا جائے گا۔ ساتھ ہی اس بار دوبارہ امتحان دینے والے طلبہ کو اپنی سہولت کے مطابق امتحان کےلیے شہر منتخب کرنے کے لیے ایک ہفتے کا وقت دیا جائے گا، تاکہ انہیں سفر اور دیگر پریشانیوں کا سامنا نہ کرنا پڑے۔ انہوں نے کہا کہ تین مئی کو منعقدہ امتحان کے بعد سات مئی کو کچھ شکایات سامنے آئی تھیں، جس کے بعد حکومت نے فوری تحقیقات شروع کر دیں۔ تحقیقات میں 12 مئی تک یہ واضح ہو گیا کہ “گیس پیپر” کے نام پر اصل سوال نامے باہر پہنچے تھے۔ انہوں نے کہا کہ حکومت نہیں چاہتی کہ تعلیمی مافیا کی وجہ سے کسی محنتی اور ایماندار طالب علم کا مستقبل متاثر ہو۔

انہوں نے بتایا کہ معاملے کی سنگینی کو دیکھتے ہوئے تحقیقات سی بی آئی کے سپرد کر دی گئی ہیں۔ امتحان مافیا کے خلاف حکومت کی لڑائی جاری رہے گی اور اس بار تحقیقاتی ایجنسیاں پوری سختی سے کارروائی کریں گی۔ انہوں نے انتباہ دیتے ہوئے کہا کہ امتحان میں گڑبڑ کرنے والوں کو سخت سزا بھگتنا ہوگی۔ مرکزی وزیر نے سوشل میڈیا پر پھیلنے والی افواہوں اور گمراہ کن معلومات سے ہوشیار رہنے کی اپیل بھی کی۔ انہوں نے کہا کہ ڈیجیٹل دور میں فرضی خبریں ایک بڑا چیلنج بن چکی ہیں، اس لیے طلبہ اور والدین صرف حکومت یا این ٹی اے کی جانب سے جاری کردہ سرکاری معلومات پر ہی بھروسہ کریں۔

مسٹر پردھان نے کہا کہ این ٹی اے ہر سال کروڑوں طلبہ کے امتحانات منعقد کرتی ہے اور “زیرو ایرر” کو یقینی بنانا حکومت کی ذمہ داری ہے۔ انہوں نے کہا کہ طلبہ کے مفادات کا تحفظ کرنا حکومت کی اولین ترجیح ہے اور امتحان کے عمل کو مکمل طور پر منصفانہ اور شفاف بنایا جائے گا۔

یواین آئی۔ایف اے