سرینگر، جموں و کشمیر کے اینٹی کرپشن بیورو نے سرینگر کے جاوورا گارڈن میں ترقیاتی کاموں کی انجام دہی میں مبینہ بدعنوانی، مالی بے ضابطگیوں اور سرکاری عہدے کے ناجائز استعمال کے الزامات کے تحت کشمیر کے اس وقت کے ہورٹیکلچر (باغبانی) ڈائریکٹر، مختلف کمیٹیوں کے ارکان اور ایک نجی ٹھیکیدار کے خلاف مقدمہ درج کر لیا ہے۔

یہ کارروائی سرینگر کے جاوورا گارڈن میں محکمہ باغبانی کی جانب سے کرائے گئے ترقیاتی کاموں میں بدعنوانی، طریقہ کار کی خلاف ورزیوں اور اختیارات کے ناجائز استعمال کے الزامات پر کی جانے والی ‘مشترکہ اچانک جانچ’ کی رپورٹ سامنے آنے کے بعد کی گئی ہے۔ایس بی کے ترجمان نے تفصیلات بتاتے ہوئے کہا کہ سرینگر کے جاوورا گارڈن میں ‘سینٹر آف ایکسی لینس’ کی تعمیر و ترقی سے جڑے الزامات کی تحقیقات کے لیے اے سی بی پولیس اسٹیشن سرینگر نے یہ اچانک جانچ شروع کی تھی۔ اس تفتیش میں منصوبے کے تحت کیے گئے کاموں کے ٹینڈر اور ان پر عمل درآمد میں سنگین بے ضابطگیوں کے ٹھوس ابتدائی شواہد ملے ہیں۔

تفتیش کے دوران یہ بات سامنے آئی ہے کہ ٹینڈر کے نوٹس کو مبینہ طور پر اس انداز میں تیار کیا گیا تھا جس میں مخصوص کوالٹی کے معیار اور تکنیکی باریکیوں کو واضح نہیں کیا گیا تھا، تاکہ من مانے فیصلے کرنے کی گنجائش پیدا کی جا سکے۔

اے سی بی نے بتایا کہ ٹینڈر میں شامل مالیاتی دفعات، منظور شدہ تفصیلی پروجیکٹ رپورٹ کے طے شدہ فنڈز کے مقابلے میں کافی زیادہ تھیں۔

تحقیقات سے یہ بھی انکشاف ہوا ہے کہ فنانشل ٹرن اوور سے متعلق اہلیت کے معیار کو، اصل ضرورت بہت کم ہونے کے باوجود، جان بوجھ کر غیر معمولی طور پر بلند سطح پر طے کیا گیا تھا۔ الزام ہے کہ اس پابند شرط کا مقصد شفاف مقابلے کو ختم کرنا اور ایک مخصوص بولی دہندہ کو فائدہ پہنچانا تھا۔

مشترکہ اچانک جانچ کے نتائج سے پہلی نظر میں سرکاری ملازمین اور فائدہ اٹھانے والی نجی فرم کے درمیان مجرمانہ گٹھ جوڑ، سرکاری عہدے کے ناجائز استعمال اور مجرمانہ سازش کا اشارہ ملتا ہے، جس کے نتیجے میں ٹھیکیدار کو ناجائز مالی فائدہ پہنچایا گیا اور سرکاری خزانے کو بھاری نقصان اٹھانا پڑا۔

یواین آئی ۔م اع

جموں، مرکزی وزیر برائے سائنس و ٹیکنالوجی اور ارضیاتی علوم ڈاکٹر جتیندر سنگھ نے جمعہ کے روز کہا کہ جموں میں قائم کیا گیا نیا علاقائی موسمیاتی مرکز ملک کا ساتواں علاقائی موسمیاتی مرکز بن گیا ہے، جو جموں و کشمیر، لداخ اور ہماچل پردیش کو خصوصی موسمی خدمات، آفات سے متعلق انتباہات اور ہمالیائی خطے کی ضروریات کے مطابق موسمیاتی معاونت فراہم کرے گا۔

ڈاکٹر سنگھ نے جموں میں نئے آر ایم سی کا افتتاح کرتے ہوئے اعلان کیا کہ جلد ہی لکھنؤ میں بھی ایک ایسا ہی مرکز قائم کیا جائے گا، جس سے بھارت کے علاقائی موسمیاتی پیش گوئی کے نیٹ ورک کو مزید وسعت ملے گی۔

انہوں نے کہا کہ یہ نیا مرکز ایسے خطے میں موسمی نگرانی، پیش گوئی اور قبل از وقت انتباہی نظام کو مضبوط بنائے گا، جہاں میدانوں سے لے کر بلند پہاڑوں تک متنوع جغرافیائی حالات پائے جاتے ہیں۔

اس مرکز کے ذریعے ضلعی سطح کی موسمی پیش گوئیاں، پہاڑی علاقوں کے لیے خصوصی موسمی اطلاعات، سیاحتی مشورے، شہروں کے لیے مخصوص موسمی خدمات اور اچانک آنے والے سیلاب، بادل پھٹنے، برفانی تودے گرنے، شدید برفباری، گرج چمک کے طوفان اور لینڈ سلائیڈنگ سے متعلق بروقت انتباہات جاری کیے جائیں گے۔

انہوں نے کہا کہ ان خدمات سے امرناتھ یاترا اور ویشنو دیوی یاترا کے زائرین، کسان، ٹرانسپورٹ آپریٹرز، پن بجلی منصوبے، ڈیزاسٹر مینجمنٹ ادارے اور دشوار گزار علاقوں میں تعینات سکیورٹی فورسز کو فائدہ پہنچے گا۔

گزشتہ ایک دہائی کے دوران جموں و کشمیر اور لداخ میں موسمیاتی بنیادی ڈھانچے کی توسیع کا ذکر کرتے ہوئے ڈاکٹر سنگھ نے کہا کہ 2014 میں اس خطے میں ایک بھی ڈوپلر ویدر ریڈار موجود نہیں تھا، جبکہ اب جموں، سرینگر، لیہہ اور بنیہال ٹاپ میں چار ڈوپلر ریڈار کام کر رہے ہیں۔

جاری۔یواین آئی۔ ظا

سرینگر، امرناتھ یاترا کے دوران سیاحوں اور یاتریوں کی حفاظت اور سیکیورٹی کو مزید مؤثر بنانے کے لیے ضلع اننت ناگ کی جموں و کشمیر پولیس نے “پہچان ایپ” کے نام سے ایک نئی کیو آر کوڈ پر مبنی موبائل ایپلی کیشن متعارف کرائی ہے۔

پولیس کے مطابق اس ایپ کا مقصد یاترا کے راستوں اور اہم سیاحتی مقامات پر خدمات فراہم کرنے والے افراد کی رجسٹریشن اور تصدیق کو یقینی بنانا ہے۔

پولیس نے بتایا کہ یہ ایپ موقع پر ہی فوری تصدیق کی سہولت فراہم کرتی ہے اور ایک محفوظ نظام تشکیل دیتی ہے، جس کے ذریعے رجسٹرڈ اور تصدیق شدہ افراد کو غیر رجسٹرڈ افراد سے واضح طور پر الگ کیا جا سکتا ہے۔

پولیس کے مطابق “پہچان ایپ” کے اجراء کا بنیادی مقصد یاترا کے دوران مجموعی سیکیورٹی نظام کو مضبوط بنانا ہے تاکہ غیر تصدیق شدہ یا سماج دشمن عناصر کو سروس فراہم کنندگان کے بھیس میں داخل ہونے سے روکا جا سکے۔

بیان میں کہا گیا کہ تمام مجاز افراد کا ڈیجیٹل ریکارڈ تیار ہونے سے خدمات میں شفافیت اور جوابدہی بڑھے گی، جس سے یاتریوں اور سیاحوں کو بہتر اور محفوظ سہولیات فراہم کی جا سکیں گی۔

پولیس نے مزید کہا کہ یہ ایپ ہجوم کے بہتر انتظام میں بھی مددگار ثابت ہوگی، کیونکہ منظم اور ضابطہ بند خدمات کی فراہمی سے تنازعات، زائد وصولی (اوور چارجنگ) اور یاترا کے راستوں پر رش میں کمی آئے گی۔

پولیس کے ترجمان نے کہا کہ اس اقدام سے عوام میں مثبت اعتماد پیدا ہوگا۔

انہوں نے کہا کہ اس ایپ کے ذریعے یاتریوں، سیاحوں اور مقامی شہریوں کا اعتماد بڑھے گا کیونکہ انہیں یہ یقین ہوگا کہ وہ صرف تصدیق شدہ افراد سے ہی خدمات حاصل کر رہے ہیں۔

پولیس کے مطابق یہ ایپ حقیقی اور مستند سروس فراہم کنندگان کو ایک ڈیجیٹل شناخت اور باضابطہ منظوری فراہم کرتی ہے، جبکہ ساتھ ہی پولیس کی ایک فعال، جدید ٹیکنالوجی سے لیس اور عوام دوست فورس کے طور پر شبیہ کو بھی مضبوط بناتی ہے، جو محفوظ اور پریشانی سے پاک زیارت کو یقینی بنانے کے لیے پرعزم ہے۔

واضح رہے کہ سالانہ امرناتھ یاترا 3 جولائی سے شروع ہوگی اور 57 دن جاری رہنے کے بعد 28 اگست کو اختتام پذیر ہوگی۔

یواین آئی۔ ظ ا