سرینگر، پولیس نے منگل کے روز جاری نشہ مکت جموں و کشمیر ابھیان کے تحت اونتی پورہ اور سرینگر میں علیحدہ کارروائیوں کے دوران تین مبینہ منشیات فروشوں کی تقریباً 4 کروڑ روپے مالیت کی جائیدادیں ضبط کر لیں۔

جنوبی کشمیر کے ذیلی ضلع اونتی پورہ میں پولیس نے چرسو، اونتی پورہ کے رہائشی نثار احمد خانڈے کے دو منزلہ رہائشی مکان اور 7 کنال 18 مرلہ اراضی کو، جس کی مالیت تقریباً 2.50 کروڑ روپے بتائی گئی ہے، ضبط کر لیا۔

یہ کارروائی انسدادِ منشیات و نفسیاتی اثرات رکھنے والے مادوں کے قانون (این ڈی پی ایس ایکٹ) کی دفعہ 68-ایف کے تحت عمل میں لائی گئی۔

پولیس کے مطابق ٹول پلازہ پولیس پوسٹ کے انچارج کی جانب سے سینئر افسران کی نگرانی میں کی گئی تحقیقات سے ثابت ہوا کہ مذکورہ جائیداد منشیات اور نفسیاتی اثرات رکھنے والے ممنوعہ مادوں کی غیر قانونی اسمگلنگ سے حاصل ہونے والی آمدنی سے خریدی گئی تھی۔ خانڈے متعدد منشیات سے متعلق مقدمات میں ملوث بتایا جاتا ہے۔

دریں اثنا، سرینگر پولیس نے این ڈی پی ایس ایکٹ 1985 کی دفعات کے تحت دو مبینہ منشیات فروشوں کی 1.5 کروڑ روپے مالیت کی غیر منقولہ جائیدادیں بھی ضبط کر لیں۔

بٹمالو پولیس اسٹیشن نے سکندر فردوس کے نام پر مسلم آباد، نندریش کالونی، سرینگر میں واقع تقریباً 80 لاکھ روپے مالیت کے تین منزلہ رہائشی مکان کو این ڈی پی ایس ایکٹ کی دفعہ 68F(1) مع دفعہ 68E کے تحت ضبط کیا۔ ملزم ایف آئی آر نمبر 18/2022 میں این ڈی پی ایس ایکٹ اور تعزیراتِ ہند (آئی پی سی) کی مختلف دفعات کے تحت نامزد ہے۔

ایک اور کارروائی میں کرال کھڈ پولیس اسٹیشن نے غلام حسن بھٹ ساکن میرگنڈ کنالوان، بجبہاڑہ، اننت ناگ کے تقریباً 70 لاکھ روپے مالیت کے ایک منزلہ رہائشی مکان کو ضبط کیا۔ بھٹ این ڈی پی ایس ایکٹ کے تحت درج ایف آئی آر نمبر 20/2022 میں ملزم ہے اور اس وقت ضمانت پر ہے۔

پولیس کا کہنا ہے کہ تحقیقات سے معلوم ہوا کہ ضبط شدہ جائیدادیں منشیات کی اسمگلنگ سے حاصل شدہ آمدنی سے خریدی گئی تھیں۔

جاری۔یواین آئی۔ ظ ا

جموں، ناردرن ریلوے کے جموں ڈویژن نے پٹھانکوٹ، پنجاب سے لیچی پارسل لوڈنگ سروس میں ایک اور کامیابی حاصل کرتے ہوئے پٹھانکوٹ کینٹ ریلوے اسٹیشن سے 8.3 ٹن لیچی لوڈ کر کے ایس ایل آر کے ذریعے ملک کے مختلف اہم ریلوے اسٹیشنوں، جن میں باندرہ ٹرمینس، سورت، سہارنپور اور احمد آباد شامل ہیں، روانہ کی ہے۔

جاری کردہ بیان کے مطابق لیچی کے سیزن کے دوران مختلف مقامات کے لیے پارسل لوڈنگ سروس مسلسل جاری ہے اور یہ مقامی کسانوں اور تاجروں کے لیے ایک قابلِ اعتماد ذریعۂ نقل و حمل بن چکی ہے۔ تازہ پھل پارسل وینوں کے ذریعے کم وقت میں اور محفوظ طریقے سے ملک کے مختلف حصوں تک پہنچائے جا رہے ہیں۔

اس کامیاب ترسیل پر سینئر ڈویژنل کمرشل منیجر اوچت سنگھل نے کہا کہ جموں ڈویژن زرعی مصنوعات کی نقل و حمل کو ترجیح دے رہا ہے۔ ان کے مطابق پارسل لوڈنگ سروس نہ صرف کسانوں کی آمدنی میں اضافہ کر رہی ہے بلکہ ’’کسان ریل‘‘ کے تصور کو بھی عملی شکل دے رہی ہے۔انہوں نے زیادہ سے زیادہ کسانوں سے اس سہولت سے فائدہ اٹھانے کی اپیل کی۔

انہوں نے بتایا کہ لیچی کے سیزن کے دوران پارسل وینوں اور لوڈنگ و اَن لوڈنگ کے لیے خصوصی انتظامات کیے گئے ہیں تاکہ کسانوں کو کسی قسم کی دشواری کا سامنا نہ کرنا پڑے۔

سنگھل نے پارسل لوڈنگ سروس کے فوائد بیان کرتے ہوئے کہا کہ اس کے ذریعے تیز رفتار ترسیل، کم لاگت، وسیع منڈیوں تک رسائی اور سامان کی حفاظت و بھروسے مندی یقینی بنتی ہے۔

یواین آئی۔ ظ ا

سری نگر، مرکزی وزیر جتیندر سنگھ نے منگل کے روز کہا کہ اس سال امرناتھ یاترا کامیاب رہے گی اور یاترا کے پرامن اور منظم انعقاد کے لیے تمام ضروری انتظامات کیے جا چکے ہیں۔ یاترا جولائی کے پہلے ہفتے میں شروع ہوگی۔

وزیر مملکت (آزادانہ چارج) برائے سائنس و ٹیکنالوجی، ارضیاتی علوم، وزیر اعظم کا دفتر، عملہ، عوامی شکایات، پنشن، ایٹمی توانائی اور خلائی امور جتیندر سنگھ نے کہا کہ اس سال سالانہ امرناتھ یاترا طویل مدت کے لیے منعقد کی جا رہی ہے۔

انہوں نے سری نگر میں ایک تقریب کے موقع پر صحافیوں سے گفتگو کرتے ہوئے کہاکہ”اس بار یاترا کا دورانیہ زیادہ ہے اور انتظامیہ نے سکیورٹی سمیت تمام پہلوؤں کا مکمل خیال رکھا ہے۔ ہمیں یقین ہے کہ یاترا انتہائی کامیاب رہے گی۔”

جنوبی کشمیر میں واقع مقدس امرناتھ گپھا کی سالانہ یاترا 3 جولائی سے شروع ہوگی اور 57 دن بعد 28 اگست کو اختتام پذیر ہوگی۔

اس سے قبل، سری نگر کے شیرِ کشمیر انٹرنیشنل کانفرنس سینٹر (ایس کے آئی سی سی) میں محکمہ پنشن و پنشنرز ویلفیئر کی جانب سے منعقدہ 59ویں پری ریٹائرمنٹ کونسلنگ ورکشاپ اور 13ویں بینکرز آگاہی پروگرام سے خطاب کرتے ہوئے جتیندر سنگھ نے کہا کہ گزشتہ 12 برسوں میں وزیر اعظم نریندر مودی کی قیادت میں نافذ کی گئی گورننس اور پنشن اصلاحات سے جموں و کشمیر کے ملازمین اور پنشنرز کو خاطر خواہ فائدہ پہنچا ہے، خاص طور پر ریاست کے مرکز کے زیر انتظام علاقہ بننے کے بعد۔

انہوں نے کہا کہ جموں و کشمیر کی تنظیمِ نو کے بعد خطے میں مرکزی حکومت کے ملازمین کی تعداد میں نمایاں اضافہ ہوا، جس کے باعث ابتدائی طور پر کام کے بوجھ اور خدمات کی فراہمی سے متعلق بعض مشکلات سامنے آئیں، تاہم حکومت اور متعلقہ اداروں کی مشترکہ کوششوں سے ان مسائل کو بتدریج حل کر لیا گیا۔

جتیندر سنگھ نے جموں و کشمیر سینٹرل پنشنرز ایسوسی ایشنز کے کردار کو سراہتے ہوئے کہا کہ ان تنظیموں نے حکومت کے ساتھ بھرپور تعاون کیا اور مسائل کی نشاندہی کے ساتھ ان کے عملی حل بھی تجویز کیے۔ ان کی تعمیری شراکت داری نے سابق ریاستی ملازمین کو مرکزی حکومت کے نظام میں شامل کرنے اور پنشن اصلاحات کے مؤثر نفاذ میں اہم کردار ادا کیا۔

انہوں نے کہا کہ آج جموں و کشمیر کے ملازمین اور پنشنرز وزیر اعظم مودی کی قیادت میں شروع کی گئی عوام دوست اسکیموں سے فائدہ اٹھا رہے ہیں، جو گزشتہ ایک دہائی میں پنشن نظام میں آنے والی مثبت تبدیلیوں کی عکاسی کرتی ہیں۔

یواین آئی۔ ظ ا