تہران، ایرانی سپریم لیڈر کے مشیر برائے خارجہ امور علی اکبر ولایتی نے خبردار کیا ہے کہ جارحانہ طرز عمل کو روکیں، یا طاقت کے نئے توازن کے مرحلے میں داخل ہوں۔

علی اکبر ولایتی نے کہا ہے کہ ایک روز قبل ہوئی پیش گوئی کے مطابق ذات السلاسل طرز کا میزائل ردِعمل شروع ہو چکا ہے، بیروت میں جنگ بندی کی واضح خلاف ورزی نے ہماری جوابی کارروائیوں کی پہلی کڑی کو متحرک کیا۔ اُنہوں نے مزید کہا کہ باب المندب میں موجودہ سیکیورٹی صورتِ حال سے دشمن کو کسی غلط اندازے میں مبتلا نہیں ہونا چاہیے۔

علی اکبر ولایتی نے یہ بھی کہا کہ ہمارا مرکزی مزاحمتی نظام دونوں آبی گزرگاہوں کو بند کرنے کی صلاحیت رکھتا ہے۔

یو این آئی۔ ع ا۔

تہران، ایرانی نیشنل سیکیورٹی اور فارن پالیسی کمیشن کے ترجمان ابراہیم رضائی نے کہا ہے کہ ہم تب تک خاموش نہیں رہیں گے جب تک دشمن ندامت محسوس نہ کرے۔

ایک بیان میں ان کا کہنا ہے کہ ہمیں کسی بھی قسم کی مس کیلکولیشن کا شکار نہیں ہونا چاہیے، امن و استحکام کا راستہ داخلی محاذ کی مضبوطی اور جدوجہد سے ہو کر گزرتا ہے۔ انہوں نے کہا کہ آپ دشمن کو فیصلہ کن جواب دینے کے لیے خود کو تیار نہیں کرتے، تو جنگ آپ کے دروازے پر دستک دے گی، جنگ بندی کے بعد ایرانی افواج نے اپنی صلاحیتوں میں اضافہ اور نقصانات کا ازالہ کر لیا ہے۔

ابراہیم رضائی نے کہا کہ ہم 9 مارچ کے مقابلے میں کہیں زیادہ طاقتور جواب دینے کے لیے تیار ہیں، اس وقت تک خاموش نہیں رہیں گے، جب تک دشمن اپنی سوچ، حکمتِ عملی میں تبدیلی نہ لے آئے۔

یو این آئی۔ ع ا۔

جموں، جموں و کشمیر کے لیفٹیننٹ گورنر منوج سنہا نے پیر کے روز مبارک منڈی ہیریٹیج کمپلیکس کے دورے کے دوران اس تاریخی ورثہ کمپلیکس کے تحفظ اور ترقی سے متعلق جاری منصوبوں کی پیش رفت کا جائزہ لیا۔

اس موقع پر جموں مشرق کے رکن اسمبلی یدھویر سیٹھی، چیف سیکریٹری اٹل ڈلو، پرنسپل سیکریٹری ثقافت برج موہن شرما، ڈویژنل کمشنر جموں رمیش کمار، آئی جی پی جموں بھیم سین توتی، جموں میونسپل کارپوریشن کے کمشنر ڈاکٹر دیوانش یادو، ڈپٹی کمشنر جموں راکیش منہاس، ایس ایس پی جموں جوگیندر سنگھ، مبارک منڈی جموں ہیریٹیج سوسائٹی (ایم ایم جے ایچ ایس) کی ایگزیکٹو ڈائریکٹر دیپیکا شرما اور دیگر متعلقہ افسران موجود تھے۔

لیفٹیننٹ گورنر نے مبارک منڈی ہیریٹیج کمپلیکس سے متصل تاریخی گدادھر مندر کی متاثرہ دیوار اور سلیب کی بحالی کے جاری کاموں کا معائنہ کیا۔

انہوں نے افسران کو ہدایت دی کہ کام کے معیار کو برقرار رکھتے ہوئے بحالی کے عمل میں تیزی لائی جائے۔

جموں میونسپل کارپوریشن کے کمشنر نے لیفٹیننٹ گورنر کو مبارک منڈی ہیریٹیج کمپلیکس میں ریمپ پر مبنی کثیر منزلہ کار پارکنگ سہولت کی تعمیر کی پیش رفت سے آگاہ کیا۔

بعد ازاں لیفٹیننٹ گورنر نے نئے قائم کردہ لائبریری و کیفے ٹیریا کا بھی دورہ کیا۔ اس موقع پر ایم ایم جے ایچ ایس کی ایگزیکٹو ڈائریکٹر نے مبارک منڈی جموں ہیریٹیج کمپلیکس کی بحالی، مرمت اور تزئین و آرائش کے باقی ماندہ کاموں کے بارے میں تفصیلات پیش کیں۔

ان منصوبوں میں دربار ہال کا تحفظ، راجا رام سنگھ محل کا تحفظ، راجا امر سنگھ محل کا تحفظ، ڈوگرا آرٹ میوزیم کا تحفظ اور دیگر اہم کام شامل ہیں، جن کے آئندہ چند ماہ میں مکمل ہونے کی توقع ہے۔

یواین آئی۔ ظ ا