ریاض، سعودی عرب کے وزیر خارجہ شہزادہ فیصل بن فرحان اور ایران کے وزیر خارجہ عباس عراقچی کے درمیان ٹیلی فون پر رابطہ ہوا، جس میں ایران اور امریکہ کے درمیان جاری مذاکرات اور خطے کی تازہ ترین صورتحال پر تبادلۂ خیال کیا گیا۔

دونوں وزرائے خارجہ نے گفتگو کے دوران ایران اور امریکہ کے درمیان جاری مذاکرات کی تازہ ترین پیش رفت اور طے شدہ مفاہمتوں پر عمل درآمد کا جائزہ لیا۔

اس موقع پر دونوں رہنماؤں نے خطے میں امن و استحکام کے لیے سفارتی کوششیں جاری رکھنے اور مذاکرات کے ذریعے مسائل کے حل کی اہمیت پر زور دیا۔

انہوں نے اس بات پر اتفاق کیا کہ سیاسی مذاکرات اور سفارت کاری ہی ایسے مؤثر ذرائع ہیں جو خطے کے ممالک اور عوام کے مشترکہ مفادات کے تحفظ اور پائیدار استحکام کو یقینی بنا سکتے ہیں۔

ادھر ایرانی وزارت خارجہ کے مطابق عباس عراقچی نے سعودی وزیر خارجہ کو امریکہ کے ساتھ جاری مذاکرات کے مختلف مراحل اور حالیہ پیش رفت سے بھی آگاہ کیا۔

ایرانی وزیر خارجہ نے مذاکراتی عمل کے حوالے سے تہران کے مؤقف اور آئندہ کے لائحہ عمل پر بھی تفصیلی بریفنگ دی۔

سعودی عرب نے اس موقع پر ایران اور امریکہ کے درمیان ایک جامع اور مستقل معاہدے تک پہنچنے کی خواہش کا اظہار کرتے ہوئے کہا کہ ایسا معاہدہ خطے میں سلامتی اور استحکام کے فروغ میں اہم کردار ادا کرے گا۔

یواین آئی۔ م س

تل ابیب، سابق اسرائیلی وزیراعظم نفتالی بینیٹ نے دعویٰ کیا ہے کہ ایران میں کر کے حکومت مخالف مظاہروں کو ہوا دینے کا منصوبہ ناکام ہو گیا۔

مقبوضہ بیت المقدس میں خطاب کرتے ہوئے نفتالی بینیٹ نے کہا کہ اسرائیلی حکومت کی منصوبہ بندی تھی کہ ایران میں انٹرنیٹ بلیک آؤٹ کے دوران اسٹار لنک ڈیوائسز کے ذریعے مواصلاتی سہولت فراہم کر کے حکومت مخالف احتجاج کو منظم کیا جائے۔

ان کے مطابق یہ منصوبہ اپنے مقاصد حاصل کرنے میں کامیاب نہ ہو سکا اور بدترین ناکامی سے دوچار ہوا۔

سابق اسرائیلی وزیراعظم نے دعویٰ کیا کہ یہ منصوبہ وزیراعظم بنیامین نیتن یاہو کی حکومت کے دور میں تیار کیا گیا تھا۔

واضح رہے کہ ایران اس سے قبل بھی اسرائیل پر ایسے الزامات عائد کرتا رہا ہے کہ وہ ملک کے اندر عدم استحکام پیدا کرنے کے لیے خفیہ سرگرمیوں میں ملوث ہے۔

نفتالی بینیٹ کے بیان کو اس حوالے سے پہلی مرتبہ کسی اہم اسرائیلی سیاسی شخصیت کی جانب سے ایسے منصوبے کے دعوے کے طور پر پیش کیا جا رہا ہے۔

اسرائیلی یا دیگر آزاد ذرائع سے اس دعوے کی باضابطہ تصدیق سامنے نہیں آئی ہے، جبکہ ایران کی جانب سے بھی اس بیان پر فوری طور پر کوئی ردعمل جاری نہیں کیا گیا۔

یواین آئی۔ م س

واشنگٹن، لبنان اور اسرائیل کے درمیان کشیدگی میں کمی اور طویل مدتی سکیورٹی و سیاسی مفاہمت کی کوششوں کے تحت دونوں ممالک کے درمیان مذاکرات کا پانچواں دور امریکی دارالحکومت واشنگٹن میں شروع ہوگیا، تاہم اسرائیلی انخلا اور حزب اللہ کے ہتھیاروں سے متعلق اختلافات بدستور برقرار ہیں۔

سفارتی ذرائع کے مطابق مذاکرات میں دونوں ممالک کے سیاسی اور فوجی حکام امریکی سرپرستی میں شریک ہیں، جبکہ واشنگٹن جنوبی لبنان میں مستقل استحکام اور سکیورٹی انتظامات کو حتمی شکل دینے کے لیے کوششیں کر رہا ہے۔

اقوام متحدہ میں اسرائیل کے مندوب نے جاری مذاکرات کو نتیجہ خیز قرار دیتے ہوئے کہا کہ امریکی ثالثی میں ہونے والے رابطوں سے کئی دیرینہ مسائل کے حل کی راہ ہموار ہو رہی ہے۔

امریکی ذرائع کے مطابق مذاکرات کے پانچویں دور کے دوسرے روز کا ماحول پہلے دن کے مقابلے میں زیادہ مثبت رہا اور جنگ بندی، اسرائیلی انخلا اور مجوزہ سکیورٹی انتظامات کے نفاذ کے طریقہ کار پر پیش رفت دیکھنے میں آئی۔

ذرائع کا کہنا ہے کہ لبنانی وفد جنوبی لبنان میں مکمل جنگ بندی، اسرائیلی افواج کے مکمل انخلا اور اس کے لیے واضح ٹائم فریم کے مطالبے پر قائم ہے۔

دوسری جانب مذاکرات میں ممکنہ مفاہمتوں پر عمل درآمد کے لیے انتظامی اور عملی طریقہ کار پر بھی تفصیلی غور کیا جا رہا ہے، جہاں بات چیت عمومی اصولوں سے آگے بڑھ کر جنگ بندی، نگرانی اور انخلا کے عملی مراحل تک پہنچ چکی ہے۔

امریکی حکام کے مطابق لبنانی فوج کو نئے سکیورٹی انتظامات نافذ کرنے کے لیے حکومتی حمایت حاصل ہے اور واشنگٹن لبنانی فوج کو ان علاقوں کی سکیورٹی سنبھالنے کے لیے مرکزی ادارہ تصور کرتا ہے جہاں سے اسرائیلی افواج مستقبل میں انخلا کر سکتی ہیں۔

اگرچہ اسرائیلی انخلا کے وقت اور طریقہ کار پر اختلافات برقرار ہیں، تاہم امریکی ذرائع کا کہنا ہے کہ موجودہ مذاکراتی ماحول پہلے کے مقابلے میں زیادہ امید افزا ہے۔

اس سے قبل لبنانی صدر جوزف عون نے واضح کیا تھا کہ لبنان اپنی سرزمین سے ہر قسم کی غیر ملکی فوجی موجودگی کے خاتمے اور مکمل خودمختاری کی بحالی سے کم کسی حل کو قبول نہیں کرے گا۔

ادھر اسرائیلی وزیراعظم بنیامین نیتن یاہو نے اپنے حالیہ بیان میں کہا تھا کہ لبنان میں اسرائیل کا مشن ابھی مکمل نہیں ہوا اور جنوبی لبنان میں قائم سکیورٹی زون اس وقت تک برقرار رہے گا جب تک اسرائیل کو لاحق خطرات مکمل طور پر ختم نہیں ہو جاتے۔

اسرائیل بدستور اس بات پر زور دے رہا ہے کہ کسی بھی حتمی معاہدے میں حزب اللہ کو غیر مسلح کرنا شامل ہونا چاہیے، جبکہ حزب اللہ اس مطالبے کو مسترد کرتے ہوئے حکومتِ لبنان سے براہ راست مذاکرات ترک کرنے اور مسئلے کے حل کے لیے ایران۔امریکہ سفارتی عمل پر انحصار کرنے کا مطالبہ کر چکی ہے۔

تجزیہ کاروں کے مطابق حالیہ دنوں میں جنوبی لبنان میں نسبتاً سکون کے باعث مذاکرات میں محدود پیش رفت کی امید پیدا ہوئی ہے، تاہم لبنانی حکام کو خدشہ ہے کہ امریکہ اور ایران کے درمیان وسیع تر علاقائی مذاکرات میں لبنانی معاملہ شامل ہونے سے بیروت کی اپنی ترجیحات متاثر ہو سکتی ہیں۔

یواین آئی۔ م س