نیپورہ کولگام میں جھڑپ،2مقامی جنگجو جاں بحق
ترال،شوپیان میں محاصرے،طرفین کے ما بین گولیوں کا تبادلہ، جنگجوفرار،بانڈی پورہ میں سرنگ ناکارہ

کولگام،شوپیان،ترال،بانڈی پورہ: جنوبی کشمیر کے تین اضلاع کولگام،پلوامہ اور شوپیان میں فوج وفورسز نے سنیچر وار کو جنگجو مخالف آپریشنز عمل میں لائے،جس دوران ضلع کولگام کے نیپورہ نامی گاؤں فوج وفورسز اور جنگجوؤں کے درمیان جھڑپ ہوئی جس میں 2جنگجو جاں بحق ہوئے۔

اس دوران علاقے میں جھڑپ شروع ہونے کے ساتھ ہی انتظامیہ نے انٹرنیٹ سروس کو معطل کر دیا۔ادھر جنوبی کشمیر کے گلاب باغ ترال اور شوپیان کے علاقے میں فورسز اور جنگجوؤں کے درمیان گولیوں کا مختصر تبادلہ ہوا، جس دوران2 مقامات سے جنگجو فرار ہونے میں کامیاب ہوئے۔ادھر بانڈی پورہ میں پولیس نے ایک سرنگ کو ناکارہ بنانے کا دعویٰ کیا ہے۔

کشمیر نیوز سروس (کے این ایس) کے مطابق فوج کے 19آر آر،ایس او جی اور سی آر پی ایف اہلکاوں نے مشترکہ طور جنوبی کشمیر کے ضلع کولگام میں قاضی گنڈ کے ساتھ آنے والے نپورہ نامی گاؤں میں جنگجوؤں کی موجود گی کے حوالے سے ایک مصدقہ اطلاع ملنے کے بعد سنیچر کی صبح محاصرے میں لے کر تلاشی کارروائی عمل میں لائی۔ذرائع کے مطابق جب فورسز اس جگہ پر پہنچی جہاں انہیں جنگجوؤں کے چھپنے کی اطلاع موصول ہوئی تھی،تو علاقے میں موجود جنگجوؤں کیساتھ اُن کا آمنا سامنا ہوا۔ذرائع کے مطابق فوج اور فورسز نے لاوڈ اسپیکر کے ذریعے سے جنگجوؤں کو خود سپردگی کی پیشکش کی۔

تاہم جنگجوؤں نے پیشکش کو ٹھکرا کر فرار ہونے کی کوشش کی جس دوران یہاں گولیوں کا ایک مختصر تبادلہ ہوا۔ طرفین کے مابین گولیوں کے تبادلے میں 2مقامی جنگجو جاں بحق ہوئے۔ پولیس نے کہا کہ دو جنگجوؤں کی لاشوں کو جائے جھڑپ سے برآمد کیا گیا۔ابتدائی فائرنگ کے فوراً بعد انتظامیہ نے علاقے میں انٹرنیٹ سروس کو معطل کر دیا۔ جھڑپ میں جاں بحق ہوئے دونوں جنگجوؤں کی شناخت ظاہر نہیں کی گئی جبکہ غیر سرکاری ذرائع کے مطابق دونوں جنگجو مقامی ہیں۔

جموں کشمیر پولیس کے ایک ترجمان نے بتایا کہ کولگام کے نپورہ میں ہفتہ کی علی الصبح چھڑنے والے مسلح تصادم میں دو جنگجو جاں بحق ہوگئے۔ انہوں نے مزید کہا کہ مہلوک جنگجوؤں ں کی شناخت معلوم کی جارہی ہے۔سری نگر میں قائم فوج کی پندرہویں کور کے ترجمان نے بتایا کہ خفیہ اطلاع پر سیکورٹی فورسز نے نپورہ کولگام میں آج علی الصبح کارڈن اینڈ سرچ آپریشن شروع کیا۔

انہوں نے کہا کہ طرفین کے درمیان چھڑنے والے مسلح تصادم میں دو جنگجو مارے گئے، جن کے قبضے سے دو پستول اور تین گرینیڈ بر آمد کئے گئے۔یہ جنوبی کشمیر میں رواں ہفتے چلایا جانے والا چوتھا جنگجو مخالف آپریشن تھا۔ قبل ازیں 7، 8 اور 10جون کو بالترتیب ضلع شوپیان کے ربن، پنجورہ اور سگھو ہندہامہ نامی علاقوں میں 14 جنگجو مارے گئے تھے۔

ادھر جنوبی کشمیر کے سب ضلع ترال کے گلاب ترال میں فوج، پولیس اور سی آر پی ایف اہلکاروں نے مشترکہ طور پرجنگجو مخالف آپریشن عمل میں لیا۔فورسز نے جنگجوؤں کی موجود گی کے حوالے سے اطلاع موصول ہونے کے بعدسنیچر کے صبح سویرے بستی کو محاصرے میں لیا ہے جس دوران مقامی آبادی کے مطابق علاقے میں گولیاں چلنے کی آواز یں سنی گئیں جس کے نتیجے میں تمام لوگ نیند سے بیدار ہوئے۔

فورسز نے واقعے کے فوراْ بعد وسیع علاقے کو محاصرے میں لیا اور جنگجوؤں کی تلاش شروع کی۔بتایاجاتا ہے کہ اس واقعے میں جنگجو فرار ہونے میں کا میاب ہوئے۔

ادھر فورسز نے متعدد گاؤں دیہات کو محاصرے میں لے کرمفرور جنگجوؤں کی تلاش شروع کی،تاہم بعد میں علاقے سے کوئی بھی قابل اعتراض چیز برآمد نہیں ہوئی۔

دریں اثنا پہاڑی ضلع شوپیان میں فورسز نے علاقے کے باغات میں جنگجوؤں کے چھپنے کے حوالے سے ایک مصدقہ اطلاع حاصل کی جس کے بعد فوج،سی آر پی ایف اور پولیس کی بھاری تعداد علاقے میں پہنچی جس دوران باغ میں شدید فائرنگ کا تبادلہ ہوا۔

ذرائع نے بتایا ابتدائی فائرنگ کے بعد علاقے میں خاموشی چھائی ہوئی ہے جس سے یہ اندازہ لگایا جا رہا ہے کہ جنگجو یہاں سے بھی فرار ہوئے۔اس رپورٹ کو فائل کرنے تک علاقے میں طرفین کے مابین دوبارہ آمنا سامنا ہونے کی کوئی اطلاع نہیں ملی۔ادھرشمالی کشمیر کے ضلع بانڈی پورہ میں ہفتہ کی صبح سیکورٹی فورسز نے بانڈی پورہ۔

سری نگر شاہراہ پر گامرو لاؤ ڈارہ کراسنگ کے قریب نصب ایک آئی ای ڈی بم کو ناکارہ بنانے کا دعویٰ کردیا۔پولیس ترجمان کے مطابق کراسنگ بانڈی پورہ سرینگر قومی شہرہ سڑک پر گشت پر معمور سی آر پی ایف بٹالین کی پارٹی نے ایک مشکوک مادے کو دیکھا۔ متذکورہ علاقے کو مشترکہ طور پر فورسز نے فوری طور پر سربمہر کر کے ٹریفک کی نقل و حرکت پر روک لگادی۔

بم ناکارہ بنانے والی پولیس اور آرمی کی ٹیم جائے وقوعہ پر پہنچی کراس دھماکہ خیز مادے کی جانچ کرنے کے بعد بم ناکارہ بنانے والی پولیس، سی آر پی ایف اور آرمی کی ٹیم نے مشکوک مادے کو بغیر کسی نقصان کے ناکارہ بنادیااور بعد میں ٹریفک کی نقل و حرکت بحال ہوئی ہے۔

ابتدائی تحقیقات کے دوران پتہ چلا کہ دھماکہ خیز مادے کو اس علاقے سے گزرنے والے حفاظتی دستوں کے قافلے کو نشانہ بنانا مطلوب تھا، جس کو پولیس اور سیکو رٹی فورسز نے کامیابی سے ناکارہ بنایا۔ تھانہ پولیس بانڈی پورہ نے اس سلسلے میں کیس زیر ایف آر نمبر61/2020 متعلقہ دفعات کے تحت درج کرکے اس سلسلے میں مذید تحقیقات شروع کردی۔