سری نگر، حریت کانفرنس کے چیئرمین اور کشمیر کے معروف مذہبی رہنما میرواعظ عمر فاروق نے منگل کے روز نئی دہلی اور اسلام آباد پر زور دیا ہے کہ وہ اپنے دیرینہ تنازعات کو حل کرنے کے لیے سفارتی بات چیت کا راستہ اختیار کریں۔ انہوں نے کہا کہ اگر شدید ترین تناؤ کے باوجود امریکہ اور ایران مذاکرات کی میز پر واپس لوٹ سکتے ہیں، تو ہندوستان اور پاکستان کے درمیان بات چیت نہ ہونے کی کوئی وجہ نہیں ہے۔

سری نگر میں صحافیوں سے گفتگو کرتے ہوئے میرواعظ نے ان حالیہ رپورٹس پر خوشی کا اظہار کیا جن کے مطابق امریکہ اور ایران کے درمیان سفارتی تعلقات کی بحالی کی کوششیں تیز ہو رہی ہیں اور اس ہفتے دونوں ممالک کے درمیان دوبارہ مذاکرات متوقع ہیں۔

شہرِ آفاق جامع مسجد سری نگر میں گزشتہ جمعہ کے خطبے کا حوالہ دیتے ہوئے میرواعظ عمر فاروق نے کہا”اگر ایران اور امریکہ شدید ترین کشیدگی کے بعد مذاکرات کی میز پر آ سکتے ہیں، تو ہندوستان اور پاکستان بھی اپنے مسائل کو حل کرنے کے لیے ایک ساتھ بیٹھ سکتے ہیں۔ جنگیں کبھی تنازعات کا حل نہیں ہوتیں، بلکہ مذاکرات کے ذریعے ہی مسائل کو حل کیا جاتا ہے۔”

انہوں نے مزید کہا کہ انہوں نے اسی مثبت جذبے کے تحت ہندوستانی قیادت سے بھی مذاکرات کا راستہ اپنانے کی اپیل کی ہے تاکہ خطے کو جنگ کے بادلوں سے بچایا جا سکے۔میرواعظ نے زور دے کر کہا کہ برصغیر پاک و ہند میں انسانی وسائل اور ترقی کے بے پناہ مواقع موجود ہیں، جنہیں دونوں ممالک کے مابین تعلقات کی بہتری کے ذریعے ہی حاصل کیا جا سکتا ہے۔ ان کا کہنا تھا”میرا ماننا ہے کہ ہندوستان اور پاکستان کے درمیان دوستی ہی مسئلہ کشمیر سمیت تمام دیرینہ تنازعات کو حل کرنے کا سب سے بہترین راستہ ہے۔ ہمیں امید ہے کہ ہندوستان، پاکستان اور کشمیری قیادت ایسے امن پسند اقدامات کی حمایت کرے گی۔”

سیاسی امور کے علاوہ میرواعظ عمر فاروق نے کشمیر کے مسلمانوں کے مابین باہمی اتحاد اور یکجہتی پر خصوصی توجہ مبذول کرائی۔ انہوں نے واضح کیا کہ جموں و کشمیر کے مذہبی رہنماؤں کی سب سے بڑی تنظیم ‘متحدہ مجلسِ علماء’ کے تمام اراکین اس بات پر متفق ہیں کہ تمام مکاتبِ فکر کے درمیان اتحاد وقت کی اہم ترین ضرورت ہے۔انہوں نے اپیل کی کہ اگر کبھی مختلف فرقوں کے درمیان یا کسی ایک ہی فرقے کے اندر کوئی غلط فہمی پیدا ہو، تو اسے وسیع تر اسلامی اتحاد کے مفاد میں دوستانہ ماحول اور بات چیت کے ذریعے حل کیا جانا چاہیے، کیونکہ اتحاد کے بغیر تشخص اور حقوق کی حفاظت ممکن نہیں ہے۔

یواین آئی ۔م ا ع

جموں، جموں و کشمیر میں سالانہ شری امرناتھ یاترا کے باقاعدہ آغاز سے قبل، ٹوکن کی تقسیم کے پہلے ہی دن توئی ریور فرنٹ سینٹر پر ہزاروں عقیدت مندوں کا تانتا بندھ گیا۔ یہ سینٹر بھگوتی نگر میں واقع یاتری نواس سے محض چند میٹر کے فاصلے پر قائم کیا گیا ہے۔واضح رہے کہ سالانہ شری امرناتھ یاترا کا باقاعدہ آغاز 3 جولائی سے ہوگا، جبکہ زائرین کا پہلا جتھہ 2 جولائی کو اسی مقام سے روانہ کیا جائے گا۔ جموں کے ڈپٹی کمشنر راکیش منہاس نے سینئر سپرنٹنڈنٹ آف پولیس (ایس ایس پی) جوگندر سنگھ اور دیگر اعلیٰ حکام کے ہمراہ مرکز کا دورہ کیا اور ٹوکن کی تقسیم کے عمل کی نگرانی کی۔

میڈیا سے گفتگو کرتے ہوئے راکیش منہاس نے بتایا کہ”ٹوکن کی تقسیم کے پہلے دن عقیدت مندوں کی ایک بڑی تعداد یہاں پہنچی اور آج کا مقررہ کوٹہ کامیابی کے ساتھ تقسیم کر دیا گیا ہے۔ یاتریوں کی رجسٹریشن کا عمل کل سے شروع ہوگا۔”انہوں نے مزید کہا کہ ضلع انتظامیہ تمام زائرین کے لیے یاترا کو پرامن، محفوظ اور آسان بنانے کے لیے پوری طرح پرعزم ہے۔

ڈپٹی کمشنر نے بتایا کہ جموں ضلع انتظامیہ نے امسال ‘شری امرناتھ جی یاترا 2026’ کے زائرین کے استقبال اور سہولت کے لیے وسیع انتظامات کیے ہیں۔ توئی ریور فرنٹ سینٹر پر تمام مسافروں کے ٹھہرنے اور آرام کرنے کی سہولیات کے ساتھ ساتھ 100 سے زائد بیت الخلا اور غسل خانے تعمیر کیے گئے ہیں۔ اس کے علاوہ 24 گھنٹے لنگر (کمیونٹی کچن) کا بھی انتظام کیا گیا ہے۔ شفاف طریقے سے ٹوکن کی تقسیم اور رجسٹریشن کے لیے 18 کاؤنٹرز بنائے گئے ہیں۔ اس کے ساتھ ہی گیتا بھون، مہاجن ہال، شری رام مندر پرانی منڈی اور ریلوے اسٹیشن جیسے دیگر مراکز بھی حسب معمول کام کرتے رہیں گے۔

یواین آئی ۔م ا ع

سری نگر، جموں و کشمیر میں پیپلز ڈیموکریٹک پارٹی (پی ڈی پی) نے منگل کے روز الزام لگایا کہ سرکاری ملازمتوں کی آؤٹ سورسنگ کے خلاف پارٹی کے مجوزہ احتجاج سے قبل بارہمولہ ضلع کے صدر محمد رفیق راتھر کو گھر میں نظر بند کر دیا گیا۔

پارٹی کی جانب سے جاری بیان میں کہا گیا کہ محمد رفیق راتھر کو ان کی رہائش گاہ سے باہر نکلنے کی اجازت نہیں دی گئی تاکہ وہ ضلعی سطح پر ہونے والے احتجاج میں شرکت نہ کر سکیں۔

پی ڈی پی نے حکومت کی مبینہ “آؤٹ سورسنگ پالیسی” اور تقرریوں میں مبینہ بے ضابطگیوں کے خلاف جموں و کشمیر کے مختلف ضلعی ہیڈکوارٹروں پر احتجاجی مظاہروں کا اعلان کیا ہے۔

محمد رفیق راتھر کو نظر بند کیے جانے کے پی ڈی پی کے الزام پر انتظامیہ یا پولیس کی جانب سے فوری طور پر کوئی ردعمل سامنے نہیں آیا۔

سرکاری ملازمتوں کی آؤٹ سورسنگ کا معاملہ حکمراں نیشنل کانفرنس (این سی) اور اپوزیشن پی ڈی پی کے درمیان ایک اہم سیاسی تنازع بن گیا ہے۔ پی ڈی پی کا الزام ہے کہ نیشنل کانفرنس کی حکومت آؤٹ سورسنگ کے ذریعے تقرریاں کر رہی ہے اور “بیک ڈور تقرریوں” کو فروغ دے رہی ہے۔

دوسری جانب نیشنل کانفرنس نے ان الزامات کو مسترد کرتے ہوئے کہا ہے کہ آؤٹ سورسنگ کا نظام 2015 سے 2018 کے دوران پی ڈی پی اور بھارتیہ جنتا پارٹی (بی جے پی) کی مخلوط حکومت کے دور میں متعارف کرایا گیا تھا۔

دونوں جماعتیں ایک دوسرے پر سرکاری بھرتیوں میں بدعنوانی کو فروغ دینے کے الزامات عائد کر رہی ہیں۔

گزشتہ ہفتے بھی پی ڈی پی نے اسی معاملے پر سری نگر میں احتجاج کیا تھا۔ پارٹی صدر محبوبہ مفتی نے دعویٰ کیا تھا کہ اکتوبر 2024 میں اقتدار سنبھالنے کے بعد نیشنل کانفرنس حکومت تقریباً 25 ہزار “بیک ڈور تقرریاں” کر چکی ہے۔

یواین آئی۔ م س