تہران، ایران کے سپریم لیڈر مجتبیٰ خامنہ ای کے اعلیٰ بین الاقوامی امور کے مشیر علی اکبر ولایتی نے بحرین کو سنگین انتباہ جاری کرتے ہوئے کہا کہ اپنی حد میں رہے اور اپنی قسمت سے نہ کھیلے۔

تفصیلات کے مطابق ایران کے سپریم لیڈر مجتبیٰ خامنہ ای کے اعلیٰ بین الاقوامی امور کے مشیر علی اکبر ولایتی نے بحرین کو سنگین نتائج کی دھمکی دے دی۔

تسنیم نیوز کی جانب سے کہا گیا کہ اپنے ایک بیان میں علی اکبر ولایتی نے اپنے ایک بیان میں کہا ہے کہ بحرین اپنی حد میں رہے۔ اپنی قسمت سےنہ کھیلے اورایران کو سخت فیصلے لینے پرمجبورنہ کرے۔

علی اکبرولایتی نے بحرین کو خبردار کیا کہ اگر اشتعال انگیزی کی گئی تو تہران ملک پر زیادہ طاقت سے حملہ کرے گا۔

ولایتی نے بحرین کو سب سے زیادہ واشنگٹن سے تعاون کرنے والی خیلجی ریاست قرار دیا اور ایران کے خلاف نفرت پھیلانے کا الزام بھی لگایا۔

ایران کے سپریم لیڈر کے مشیر نے مطالبہ کیا کہ بحرین شیعہ شہریوں اورعلماء پر دباؤ ختم اور شیخ عیسیٰ قاسم کی بحرینی شہریت بحال کرے، تب ہی ایران اچھی ہمسائیگی کو برقرار رکھے گا۔

یو این آئی۔ ع ا۔

سری نگر، جموں و کشمیر پولیس نے وسطی کشمیر کے ضلع بڈگام میں مختلف شیعہ تنظیموں کے پیروکاروں کے درمیان مبینہ جھڑپ کے معاملے میں ایف آئی آر درج کرکے تحقیقات شروع کر دی ہیں۔

پولیس نے پیر کو بتایا کہ بڈگام کے ہاردپنجو گاؤں میں پیش آنے والے اس واقعے کی تحقیقات جاری ہیں اور کسی بھی غیر قانونی سرگرمی کو ہوا دینے یا اس میں ملوث پائے جانے والے افراد کے خلاف سخت قانونی کارروائی کی جائے گی۔

پولیس نے یقین دہانی کرائی کہ معاملے کی تحقیقات غیر جانبدارانہ، شفاف اور پیشہ ورانہ انداز میں کی جائیں گی۔ پولیس کے مطابق، “واقعے کے ہر پہلو کی شواہد کی بنیاد پر جانچ کی جا رہی ہے اور جو بھی شخص قصوروار پایا گیا، خواہ اس کا تعلق کسی بھی تنظیم سے ہو، اسے بخشا نہیں جائے گا۔”

پولیس نے کہا کہ واقعے سے متعلق سوشل میڈیا پر پھیلائے جانے والے گمراہ کن اور غیر مصدقہ مواد کا بھی نوٹس لیا گیا ہے۔

پولیس کے مطابق، “اس طرح کی گمراہ کن معلومات غیر ضروری خوف و ہراس پھیلانے، امن و امان کو متاثر کرنے اور فرقہ وارانہ ہم آہنگی کو نقصان پہنچانے کی صلاحیت رکھتی ہیں۔”

پولیس نے عوام سے اپیل کی ہے کہ وہ تحمل کا مظاہرہ کریں اور کسی بھی پلیٹ فارم پر افواہیں، غیر مصدقہ دعوے یا اشتعال انگیز مواد تیار، شیئر یا فارورڈ نہ کریں۔ شہریوں کو مشورہ دیا گیا ہے کہ وہ صرف سرکاری ذرائع سے جاری کردہ اطلاعات پر ہی اعتماد کریں۔

بڈگام پولیس نے کہا کہ سوشل میڈیا کی سرگرمیوں پر مسلسل نظر رکھی جا رہی ہے۔ اگر کوئی شخص عوام کو گمراہ کرنے یا امن و امان میں خلل ڈالنے کی نیت سے جھوٹا یا اشتعال انگیز مواد تیار کرتا، پھیلاتا یا اس کے فروغ میں ملوث پایا گیا تو اس کے خلاف متعلقہ قانونی دفعات کے تحت سخت کارروائی کی جائے گی۔

بڈگام پولیس نے معاشرے کے تمام طبقات سے امن برقرار رکھنے، فرقہ وارانہ ہم آہنگی کو فروغ دینے اور تحقیقات میں تعاون کرنے کی اپیل کی ہے۔ پولیس نے کہا کہ وہ شفاف، غیر جانبدار اور قانون کے مطابق تحقیقات کے ذریعے انصاف کو یقینی بنانے کے لیے پُرعزم ہے، جبکہ عوامی امن میں خلل ڈالنے کی کوشش کرنے والے ہر شخص کے خلاف سخت کارروائی کی جائے گی۔

یواین آئی۔الف الف

لوبلیانا، سلووینیا کی صدر ناتاشا پیرتس موسار نے کہا ہے کہ ایران کے خلاف جنگ ایک بڑی غلطی تھی، جس کا صدر ڈونلڈ ٹرمپ کو بھی اندازہ ہے۔

الجزیرہ انٹرویو کے مطابق سلووینیا کی صدر نتاشا پیرتس موسار نے کہا کہ ایران کے خلاف جنگ ایک غلطی تھی اور ان کے خیال میں امریکی صدر ڈونلڈ ٹرمپ بھی اس بات کو سمجھتے ہیں۔ انھوں نے قطر کے ثالثی کردار کی تعریف کرتے ہوئے کہا کہ قطر نے واشنگٹن اور تہران کے درمیان جنگ روکنے اور معاہدہ طے پانے میں اہم کردار ادا کیا۔ پیرتس موسار نے یہ بھی کہا کہ یورپی یونین بین الاقوامی سطح پر کم زور نظر آتی ہے، جس کی وجہ اس کی خارجہ پالیسی میں اتحاد کی کمی ہے۔

دوسری جانب روسی صدر ولادیمیر پوتن نے کہا ہے کہ ماسکو ایران کے معاملے پر امریکہ کے ساتھ بات چیت دوبارہ شروع کرنے کا خواہش مند ہے، جب موجودہ بحران کا فعال مرحلہ ختم ہو جائے گا۔

پوتن نے کہا ’’جب ایران کے حوالے سے موجودہ فعال مرحلے کی تمام پیش رفت مکمل ہو جائے گی، تو ہم امریکی انتظامیہ کے نمائندوں کا خیر مقدم کریں گے، جن سے ہم پہلے بھی ماسکو میں متعدد بار ملاقات کر چکے ہیں۔‘‘ انھوں نے مزید کہا کہ روس مذاکرات جاری رکھنے کے لیے تیار ہے اور ان تمام تفصیلات اور طریقہ کار پر بات کرے گا جو پہلے گزشتہ موسمِ گرما میں الاسکا کے شہر اینکریج میں ہونے والی بات چیت میں زیرِ بحث آئے تھے۔

واضح رہے کہ امریکی نیوز ویب سائٹ ایکسیوس نے خبر دی ہے کہ امریکہ اور ایران نے فوجی حملے روکنے اور اس ہفتے کے آخر میں نئے مذاکرات کرنے پر اتفاق کرلیا ہے۔ دونوں فریق منگل کو قطر کے دارالحکومت دوحہ میں ملاقات کی توقع رکھتے ہیں، جہاں آبنائے ہرمز سے متعلق تنازع پر بات چیت ہوگی۔

اس سے قبل ایک ایرانی عہدیدار نے کہا تھا کہ ایران نے اتوار کو ہونے والے تکنیکی مذاکرات میں شرکت نہیں کی، جس کی وجہ حالیہ حملے اور امریکہ کے ساتھ طے شدہ مفاہمتی یادداشت کی نامکمل شرائط تھیں۔

یو این آئی۔ ع ا۔