تہران، ایران کی حکومتی ترجمان فاطمہ مہاجرانی نے کہا ہے کہ ایران کسی بھی ممکنہ جارحیت کا مقابلہ کرنے کے لیے مکمل طور پر تیار ہے، تاہم تہران کی توجہ اب بھی پائیدار امن پر مرکوز ہے۔

منگل کے روز پریس کانفرنس سے خطاب کرتے ہوئے فاطمہ مہاجرانی نے کہا ”ہماری انگلیاں ٹریگر پر ہیں” لیکن ایرانی حکام اب بھی سفارتی راستے اور ملکی مفادات پر مبنی حل کے لیے پرعزم ہیں۔

ایرانی خبر رساں ایجنسی ایسنا کے مطابق انہوں نے اشارہ دیا کہ 8 اپریل سے نافذ جنگ بندی معاہدہ ”انتہائی نازک صورتحال” میں داخل ہو چکا ہے، جس سے دوبارہ جنگ کے خدشات بڑھ گئے ہیں۔

دوسری جانب امریکی حکام کے مطابق مسٹر ڈونلڈ ٹرمپ اب فوجی کارروائی دوبارہ شروع کرنے کے امکان پر زیادہ سنجیدگی سے غور کر رہے ہیں۔

سی این این کی رپورٹ کے مطابق امریکی حکام کا کہنا ہے کہ ٹرمپ ایران کی جانب سے آبنائے ہرمز کی بندش برقرار رکھنے پر برہم ہیں جبکہ ایرانی قیادت کے اندرونی اختلافات بھی مذاکرات میں رکاوٹ بن رہے ہیں۔

ادھر پاکستان دونوں ممالک کے درمیان ثالثی کی کوششیں جاری رکھے ہوئے ہے تاکہ جنگ کے خاتمے کے لیے کسی ممکنہ معاہدے تک پہنچا جا سکے۔

رپورٹس کے مطابق سب سے بڑا اختلاف ایران کے جوہری پروگرام پر ہے، جہاں امریکہ مطالبہ کر رہا ہے کہ ایران افزودہ یورینیم بیرون ملک منتقل کرے اور اندرون ملک افزودگی مکمل طور پر روک دے۔

دوسری جانب تہران کا مؤقف ہے کہ ان حساس معاملات پر بات چیت بعد کے مرحلے میں ہونی چاہیے۔

اس دوران ایرانی پارلیمنٹ کے اسپیکر محمد باقر قالیباف نے بھی خبردار کیا ہے کہ ایرانی مسلح افواج کسی بھی جارحیت کا بھرپور جواب دینے کے لیے تیار ہیں۔

انہوں نے سوشل میڈیا پلیٹ فارم ایکس پر لکھا کہ ”غلط حکمت عملی اور غلط فیصلے ہمیشہ غلط نتائج تک لے جاتے ہیں”۔

انہوں نے مزید کہا کہ ایران تمام آپشنز کے لیے تیار ہے اور مخالفین حیران رہ جائیں گے۔

یواین آئی۔ م س

واشنگٹن، امریکہ اور ایران کے درمیان 8 اپریل سے نافذ جنگ بندی معاہدہ تعطل کا شکار دکھائی دے رہا ہے جبکہ امریکی صدر مسٹر ڈونلڈ ٹرمپ نے ایرانی ردعمل کو انتہائی کمزور قرار دیتے ہوئے اسے کچرا قرار دیا۔

مسٹر ڈونلڈ ٹرمپ نے پیر کے روز وائٹ ہاؤس میں صحافیوں سے گفتگو کرتے ہوئے کہا کہ ایران کے ساتھ جنگ بندی اب ’’وینٹی لیٹر پر‘‘ ہے اور آخری سانسیں لے رہی ہے۔

انہوں نے کہا کہ تہران یہ سمجھ رہا ہے کہ امریکہ بڑھتی توانائی قیمتوں کے دباؤ کے باعث پیچھے ہٹ جائے گا، تاہم واشنگٹن مکمل فتح کے اپنے ہدف سے دستبردار نہیں ہوگا۔

امریکی صدر نے ایران کے حالیہ ردعمل کو ’’انتہائی کمزور‘‘ قرار دیتے ہوئے کہا کہ ان پر کسی قسم کا دباؤ نہیں ہے۔

دوسری جانب ایرانی پارلیمنٹ کے اسپیکر اور سینیئر مذاکرات کار محمد باقر قالیباف نے خبردار کیا کہ ایران کی مسلح افواج کسی بھی جارحیت کا بھرپور جواب دینے کے لیے تیار ہیں۔

انہوں نے سوشل میڈیا پلیٹ فارم ایکس پر جاری بیان میں امریکہ کو کشیدگی بڑھانے سے گریز کرنے کا مشورہ دیا۔

رپورٹس کے مطابق ایران نے امریکی تجویز کے جواب میں تمام محاذوں، بالخصوص لبنان میں جنگ کے خاتمے پر زور دیا ہے جہاں اسرائیل اور حزب اللہ کے درمیان کشیدگی جاری ہے۔

تہران نے اپنے جواب میں جنگی نقصانات کے معاوضے، آبنائے ہرمز پر ایرانی خود مختاری کے اعتراف، بحری ناکہ بندی کے خاتمے، مزید حملے نہ کرنے کی ضمانت اور اقتصادی پابندیاں ختم کرنے کا مطالبہ بھی کیا ہے۔

ادھر مسٹر ڈونلڈ ٹرمپ کے متوقع دورۂ چین سے قبل صورتحال مزید اہمیت اختیار کر گئی ہے۔ توقع ہے کہ وہ چینی صدر شی جن پنگ سے ملاقات میں ایران بحران اور آبنائے ہرمز کو دوبارہ کھولنے کے معاملے پر بات کریں گے۔

دریں اثنا امریکی بحریہ نے اعلان کیا ہے کہ اوہائیو کلاس کی ایک ایٹمی آبدوز جبرالٹر کی بندرگاہ پہنچ گئی ہے۔

امریکی بحریہ کے چھٹے بیڑے کے مطابق یہ دورہ امریکہ کی دفاعی صلاحیت اور نیٹو اتحادیوں کے ساتھ وابستگی کا مظہر ہے، تاہم محکمہ دفاع نے آبدوز کا نام ظاہر نہیں کیا۔
یواین آئی۔ م س

تہران، ایران کی پارلیمنٹ کی قومی سلامتی کمیٹی نے کہا ہے کہ یورینیم کی افزودگی ناقابلِ مذاکرات ہے جبکہ ایٹمی معاملہ مذاکرات کے ایجنڈے میں شامل نہیں۔

مہر نیوز ایجنسی کے مطابق قومی سلامتی اور خارجہ پالیسی کمیٹی کے ترجمان ابراہیم رضائی نے بتایا کہ یہ مؤقف پارلیمانی اجلاس کے دوران ایٹمی توانائی تنظیم کے سربراہ محمد سلامی نے پیش کیا۔

انہوں نے کہا کہ اجلاس میں محمد سلامی نے واضح کیا کہ دشمن اسلامی جمہوریہ ایران کی طاقت کو کمزور کرنے کی کوشش کر رہا ہے، جس میں ایٹمی صنعت بھی شامل ہے۔

ایرانی ایٹمی توانائی تنظیم کے سربراہ نے زور دے کر کہا کہ ایران کی ایٹمی سرگرمیاں مکمل طور پر پُرامن ہیں اور پُرامن ہی رہیں گی۔

انہوں نے کہا کہ ایٹمی ٹیکنالوجی مذاکرات کا حصہ نہیں ہے اور یورینیم کی افزودگی پر کوئی سمجھوتا نہیں کیا جا سکتا۔
ابراہیم رضائی کے مطابق اجلاس میں یہ بھی بتایا گیا کہ ایٹمی مراکز اور اثاثوں کے تحفظ کے لیے ضروری اقدامات مکمل کر لیے گئے ہیں جبکہ ان پر مسلسل عمل درآمد جاری ہے۔

انہوں نے کہا کہ ایران کی ایٹمی صنعت پوری قوت کے ساتھ اپنا کام جاری رکھے گی اور ملک کی ایٹمی کامیابیوں کا ہر صورت تحفظ کیا جائے گا۔

واضح رہے کہ امریکی صدر مسٹر ڈونلڈ ٹرمپ نے حالیہ بیان میں ایران کے ساتھ جنگ بندی کو ’’لائف سپورٹ‘‘ پر قرار دیتے ہوئے کہا تھا کہ تہران کی تازہ تجاویز میں ایٹمی معاملے پر کوئی رعایت شامل نہیں تھی۔

یواین آئی۔ م س