نئی دہلی، ہندوستان نے کہا ہے کہ آپریشن سندور کے دوران پاکستان کی بالواسطہ مدد کرنے کے حوالے سے چین کا حالیہ اعتراف، ہندوستان کے دعووں اور حقائق کی تصدیق کرتا ہے  ہندوستان نے مزید کہا کہ پاکستان کی پراکسی حمایت کرنے والے ممالک کو اس بات پر غور کرنا چاہیے کہ دہشت گرد ٹھکانوں کو بچانے کی ان کی کوششیں ان کی ساکھ اور عالمی حیثیت پر کیا اثرات مرتب کرتی ہیں وزارت خارجہ کے ترجمان رندھیر جیسوال نے منگل کو ہفتہ وار بریفنگ کے دوران چین کے اس اعتراف سے متعلق پوچھے گئے سوال کے جواب میں کہا کہ متعلقہ رپورٹس سے ہندوستان کے موقف کی توثیق ہوئی ہے۔ انہوں نے زور دیا کہ جو ممالک خود کو ذمہ دار ریاستیں سمجھتے ہیں، انہیں خود احتسابی کرنی چاہیے کہ پاکستان میں دہشت گردی کے ڈھانچے کے تحفظ کی حمایت سے ان کی عالمی ساکھ کس طرح متاثر ہوتی ہے۔

ترجمان نے کہا، “ہم نے ایسی رپورٹس دیکھی ہیں جو پہلے سے معلوم حقائق کی تصدیق کرتی ہیں۔ آپریشن سندور، پہلگام میں ہونے والے دہشت گردانہ حملوں کے جواب میں ایک درست، ٹارگٹڈ اور متوازن کارروائی تھی، جس کا مقصد پاکستان سے چلنے والے اور اس کی پشت پناہی سے سپانسر شدہ دہشت گرد ڈھانچے کو تباہ کرنا تھا۔ وہ اقوام جو خود کو ذمہ دار سمجھتی ہیں، انہیں اس بات پر غور کرنا چاہیے کہ دہشت گردی کے ڈھانچے کی حفاظت کی کوششوں کی حمایت ان کے وقار اور عالمی مقام کو کس طرح متاثر کرتی ہے۔”

قابل ذکر ہے کہ ہندوستان نے آپریشن سندور کے بعد کہا تھا کہ چین اور ترکیہ جیسے ممالک نے اس آپریشن کے دوران پاکستان کی بالواسطہ حمایت کی تھی۔ حال ہی میں چینی میڈیا میں شائع ہونے والی ایک رپورٹ میں یہ انکشاف ہوا ہے کہ چین نے تسلیم کیا ہے کہ اس نے آپریشن سندور کے دوران پاکستان کو تکنیکی مدد فراہم کی تھی۔

یواین آئی۔ایف اے

ٹوکیو، جاپان کے وزیر دفاع شنجیرو کوئزومی نے منگل کے روز کہا ہے کہ اگر جاپان کی طرف سے دوسرے ممالک کو فراہم کردہ ہتھیاروں یا ان کے پرزوں کا استعمال کسی تیسرے ملک کے خلاف جارحانہ کارروائی میں کیا گیا، تو ٹوکیو سپلائی کی معطلی سمیت سخت اقدامات اٹھا سکتا ہے۔

جناب کوئزومی نے پارلیمنٹ میں خطاب کرتے ہوئے کہا، “اگر اس بات کی تصدیق ہو جاتی ہے کہ کوئی وصول کنندہ ملک جاپان کے فراہم کردہ دفاعی ساز و سامان کو کسی دوسرے ملک کے خلاف جارحیت کے لیے استعمال کر رہا ہے، تو جاپان اس ملک سے صورتحال بہتر بنانے کا سخت مطالبہ کرے گا، جس میں دفاعی آلات کے استعمال کو روکنا بھی شامل ہو گا۔”

انہوں نے مزید کہا کہ ایسے معاملات میں ہتھیاروں کی دیکھ بھال اور مرمت کے لیے ضروری پرزوں کی فراہمی بھی روکی جا سکتی ہے۔ جاپان ہتھیاروں کے ذخیرہ کرنے، حفاظتی اقدامات اور آلات کے ضائع ہونے کی صورت میں اپنائے جانے والے طریقہ کار کی بھی نگرانی کرے گا۔

وزیر دفاع نے کہا، “حکومت وصول کنندہ ممالک کو اس بات کا پابند بنائے گی کہ وہ منتقل کردہ دفاعی ساز و سامان اور ٹیکنالوجی کا استعمال اقوام متحدہ کے چارٹر کے مقاصد اور اصولوں کے مطابق کریں۔ اس کے علاوہ، کسی دوسرے مقصد کے لیے استعمال یا تیسرے ممالک کو منتقلی سے پہلے جاپان کی پیشگی رضامندی لازمی ہوگی۔”

یواین آئی۔ م س

نئی دہلی، لوک سبھا میں اپوزیشن لیڈر راہل گاندھی نے نیٹ یو جی 2026 امتحان کی منسوخی پر مرکزی حکومت کی سخت مذمت کی ہے اور کہا ہے کہ حکومت نے 22 لاکھ سے زائد طلبہ کی محنت پر پانی پھیر دیا ہے۔

مسٹر گاندھی نے سوشل میڈیا پر جاری کردہ ایک بیان میں کہا، “کسی باپ نے بچوں کی پڑھائی کے لیے قرض لیا، کسی ماں نے زیورات بیچے اور لاکھوں طلبہ نے راتوں کو جاگ کر تیاری کی، لیکن بدلے میں انہیں ‘پیپر لیک، حکومتی غفلت اور تعلیم میں منظم بدعنوانی’ ملی۔ یہ محض ناکامی نہیں بلکہ نوجوانوں کے مستقبل کے ساتھ کھلواڑ ہے۔ ہر بار پیپر مافیا بچ نکلتے ہیں اور ایماندار طلبہ اس کا خمیازہ بھگتتے ہیں۔” انہوں نے کہا کہ امتحان کی منسوخی کی وجہ سے لاکھوں طلبہ کو دوبارہ ذہنی تناؤ، معاشی بوجھ اور غیر یقینی صورتحال کا سامنا کرنا پڑے گا۔ انہوں نے سوال کیا کہ اگر طلبہ کی تقدیر محنت سے نہیں بلکہ “پیسے اور رسوخ” سے طے ہوگی تو نظام تعلیم کا کیا فائدہ رہ جائے گا۔

کانگریس لیڈر نے وزیر اعظم نریندر مودی کو نشانہ بناتے ہوئے کہا، “وزیر اعظم کا نام نہاد امرت کال ملک کے لیے وش کال (زہریلا دور) بن گیا ہے۔” واضح رہے کہ مرکزی حکومت نے نیٹ یو جی 2026 امتحان کو منسوخ کرنے کا فیصلہ کیا ہے۔

امتحان منعقد کرنے والی نیشنل ٹیسٹنگ ایجنسی (این ٹی اے) نے ایک بیان جاری کرتے ہوئے کہا ہے کہ مرکزی حکومت کی منظوری کے بعد امتحان منسوخ کر دیا گیا ہے اور نئی تاریخوں کا اعلان جلد کیا جائے گا۔

یواین آئی ۔ایف اے