ٹرمپ،ایران کے سرکاری نشریاتی ادارے آئی آر آئی بی نے امریکی صدر ڈونلڈ ٹرمپ کی جانب سے ایرانی جواب مسترد کیے جانے پر سخت ردعمل دیتے ہوئے کہا ہے کہ امریکی منصوبہ دراصل ’ٹرمپ کی لالچ کے سامنے ایران کی ہتھیار ڈالنے‘ کے مترادف تھا۔

الجزیرہ کے مطابق ایرانی سرکاری میڈیا نے اپنے ٹیلیگرام بیان میں کہا کہ تہران کی جانب سے دیے گئے جواب میں ایرانی قوم کے بنیادی حقوق پر زور دیا گیا ہے اور ایران کسی ایسے معاہدے کو قبول نہیں کرے گا جو اس کی خودمختاری یا قومی مفادات کے خلاف ہو۔

بیان میں مزید کہا گیا کہ ایران کی تازہ تجاویز میں امریکا سے جنگی نقصانات کے ازالے کا مطالبہ بھی شامل ہے۔ ایران نے آبنائے ہرمز پر اپنی خودمختاری کے مؤقف کو بھی دہرایا اور کہا کہ خطے میں سلامتی اور بحری گزرگاہوں کے معاملات پر ایران کا مؤقف واضح اور غیر متزلزل ہے۔

ایرانی جواب میں یہ مطالبہ بھی کیا گیا ہے کہ امریکا ایران پر عائد تمام پابندیاں ختم کرے اور بیرونِ ملک منجمد ایرانی اثاثے فوری طور پر بحال کیے جائیں۔

دوسری جانب امریکی صدر ڈونلڈ ٹرمپ پہلے ہی ایرانی تجاویز کو ’ناقابل قبول‘ قرار دے چکے ہیں، جس کے بعد دونوں ممالک کے درمیان کشیدگی مزید بڑھنے کا خدشہ ظاہر کیا جا رہا ہے۔ ماہرین کے مطابق آبنائے ہرمز، پابندیوں کے خاتمے اور ایران کے جوہری پروگرام سے متعلق اختلافات اب بھی کسی بڑے معاہدے کی راہ میں سب سے بڑی رکاوٹ بنے ہوئے ہیں۔

تہران، ایران نے یورپی ممالک کو تنبیہ کرتے ہوئے آبنائے ہرمز میں مداخلت سے گریز کا مشورہ دیتے ہوئے کہا ہے کہ یورپی ممالک امریکی اور اسرائیلی اقدامات کے زیر اثر نہ آئیں۔

غیر ملکی ذرائع ابلاغ کے مطابق ترجمان ایرانی وزارت خارجہ اسماعیل بقائی کا کہنا تھا کہ یورپی اقدامات ان کے اپنے مفادات کو نقصان پہنچا سکتے ہیں۔ ترجمان ایرانی وزارت خارجہ اسماعیل بقائی کا کہنا تھا کہ آبنائے ہرمز یا خلیج فارس میں کسی بھی مداخلت سے صورتحال پیچیدہ ہوجائے گی۔

انہوں نے کہا کہ ایران پر مسلط کی گئی جنگ غیر اخلاقی اور غیرقانونی ہے، امریکا اور اسرائیل نے ایران کیخلاف جارحیت شروع کی، یورپی ممالک کو تنازع میں شامل ہونے سے گریز کرنا چاہیے۔

اُن کا مزید کہنا تھا کہ یورپی مداخلت سے توانائی کی قیمتوں میں مزید اضافہ ہوسکتا ہے، عالمی برادری ذمہ دارانہ رویہ اپنائے اور جنگ کے خاتمے کیلئے کردار ادا کرے۔

یواین آئی ۔م اع

تل ابیب، اسرائیل کے وزیر اعظم بنجامن نیتن یاہو نے ایک بار پھر کہا ہے کہ ایران کے ساتھ جنگ اُس وقت تک “ختم نہیں ہوگی” جب تک اہم اسٹریٹجک مسائل کا حل نہیں نکل آتا، جن میں ایران کے افزودہ یورینیم کے ذخائر کو ہٹانا، جوہری مراکز کو تباہ کرنا اور ایران کے علاقائی اثر و رسوخ کو محدود کرنا شامل ہے۔

سی بی ایس نیوز کے پروگرام ’60 منٹس‘ کو دیے گئے انٹرویو میں مسٹر نیتن یاہو نے کہاکہ “یہ ابھی ختم نہیں ہوا، کیونکہ وہاں اب بھی جوہری مواد اور افزودہ یورینیم موجود ہے۔ اسے ایران سے باہر نکالنا ہوگا۔ وہاں اب بھی افزودگی کے مراکز موجود ہیں، جنہیں تباہ کرنا باقی ہے۔”

انہوں نے کہا کہ ایران اب بھی علاقائی پراکسی گروپوں کی حمایت کر رہا ہے اور اپنی بیلسٹک میزائل صلاحیتوں میں اضافہ کر رہا ہے۔

امریکہ اور اسرائیل کی جانب سے ایران پر حملوں کے بعد ہونے والی پیش رفت کو تسلیم کرتے ہوئے مسٹر نیتن یاہو نے زور دیا کہ ایران کے جوہری پروگرام کے حوالے سے اب بھی بڑے چیلنجز موجود ہیں۔

انہوں نے اشارہ دیا کہ کسی بھی عملی معاہدے کے تحت افزودہ یورینیم کو وہاں سے ہٹانا ضروری ہوگا۔ انہوں نے کہاکہ “اگر آپ کے پاس کوئی معاہدہ ہے اور آپ اندر جا کر اسے باہر نکال لیتے ہیں تو کیوں نہیں؟ یہی بہترین طریقہ ہے۔”

مسٹر نیتن یاہو اس بات سے متفق ہیں کہ معاہدہ ہونا چاہیے، لیکن جوہری مسئلہ قابلِ سمجھوتہ نہیں ہے۔ ان کا یہ بیان ایسے وقت میں آیا ہے جب امریکہ کا مؤقف ہے کہ کسی بھی جامع امن معاہدے کے تحت ایران کو یورینیم کی افزودگی مکمل طور پر روکنی ہوگی۔ صدر ڈونالڈ ٹرمپ نے حال ہی میں امن تجویز پر ایران کے تازہ ردعمل کو “مکمل طور پر ناقابلِ قبول” قرار دیا تھا۔

دوسری جانب ایران نے افزودگی مکمل طور پر روکنے کے مطالبات کو مسترد کر دیا ہے۔ اطلاعات کے مطابق ایرانی حکام نے انتہائی افزودہ یورینیم کے ذخائر کو کم کرنے اور کچھ مواد کو بین الاقوامی نگرانی میں کسی تیسرے ملک منتقل کرنے کی تجویز دی ہے۔

مسٹر نیتن یاہو نے ایک ممکنہ حکمت عملی کا خاکہ بھی پیش کیا، جس کے مطابق اگر سفارت کاری ناکام ہو جاتی ہے تو افزودہ یورینیم کو جسمانی طور پر ہٹایا جا سکتا ہے، تاہم انہوں نے “فوجی آپشنز” کی تفصیلات بتانے سے انکار کر دیا۔

میڈیا رپورٹس کے مطابق ایران نے محدود مدت کے لیے افزودگی معطل کرنے کی خواہش ظاہر کی ہے، اگرچہ یہ مدت امریکہ کی تجویز کردہ 20 سالہ پابندی سے کم ہوگی۔ ساتھ ہی ایران نے اپنے جوہری انفراسٹرکچر کو تباہ کرنے کی بات مسترد کر دی ہے۔

یواین آئی۔ ظ ا