سری نگر، جموں و کشمیر پولیس کی اقتصادی جرائم ونگ (ای او ڈبلیو) نے منگل کے روز کپواڑہ کے ایک مقامی رہائشی کے خلاف دھوکہ دہی کے تین الگ الگ مقدمات درج کیے۔ حکام کے مطابق ملزم نے مختلف سرکاری محکموں اور مالیاتی اداروں میں ملازمتیں دلانے کے بہانے متعدد لوگوں سے لوٹ مار کی تھی۔

ای او ڈبلیو نے یہ مقدمات کپواڑہ کے لاستِیال کلاروس کے رہائشی عبدالمجید میر کے خلاف درج کیے ہیں۔ ابتدائی تحقیقات میں یہ انکشاف ہوا کہ ملزم نے متاثرین کو سرکاری ملازمتوں کی جھوٹی یقین دہانی کرا کے ان سے بھاری رقوم وصول کی تھیں۔

ای او ڈبلیو نے بتایا کہ ملزم نے متاثرین کو دھوکہ دینے اور ان کا اعتماد جیتنے کے لیے سرکاری ایجنسیوں اور جموں و کشمیر بینک کے نام سے جعلی اور فرضی تقرری کے احکامات تیار کیے اور انہیں سونپے۔

ایجنسی کا کہنا ہے کہ ’’ملزم کے یہ اقدامات بظاہر رنبیر پینل کوڈ (آر پی سی)، سابقہ انڈین پینل کوڈ (آئی پی سی) اور بھارتیہ نیائے سنہتا (بی این ایس) کی متعلقہ دفعات کے تحت قابلِ سزا جرائم کے زمرے میں آتے ہیں۔”

ای او ڈبلیو کے مطابق، عبدالمجید میر ایک عادی مجرم ہے جس کے خلاف کرائم برانچ کشمیر پہلے ہی ماضی میں دو مقدمات میں چارج شیٹ داخل کر چکی ہے۔

یو این آئی۔ م ع

سری نگر، جموں و کشمیر کے ضلع اننت ناگ میں پیر کی دیر رات ایک مدرسے میں شدید آگ لگنے سے 12 سالہ نوجوان جاں بحق اور چار دیگر جھلس کر زخمی ہو گئے۔ حکام نے یہ معلومات فراہم کی ہیں۔

انہوں نے بتایا کہ اننت ناگ کے مٹّن علاقے میں واقع دارالعلوم بابا حیدری ریشی میں رات تقریباً 1:30 بجے آگ بھڑک اٹھی، جس سے مدرسے کی عمارت میں مقیم طلبہ میں افراتفری مچ گئی۔ مقامی لوگوں اور پولیس کی مدد سے فائر بریگیڈ اور ایمرجنسی سروسز کا عملہ فوری طور پر موقع پر پہنچا اور امدادی کارروائیوں کے ساتھ آگ بجھانے کا کام شروع کیا۔

حکام کے مطابق، کئی طلبہ کو عمارت سے بحفاظت نکال لیا گیا جس سے ایک بڑا حادثہ ٹل گیا۔ تاہم، وارڈن گاؤں سے تعلق رکھنے والا ایک طالب علم بری طرح جھلس گیا اور بعد میں زخموں کی تاب نہ لاتے ہوئے دم توڑ گیا۔ اس واقعے میں چار دیگر طلبہ زخمی ہوئے جنہیں علاج کے لیے اسپتال منتقل کر دیا گیا ہے۔ ڈاکٹروں کا کہنا ہے کہ زخمی طلبہ کی حالت مستحکم ہے۔ ان میں سے تین جھلس گئے ہیں جبکہ ایک کو دم گھٹنے کی وجہ سے طبی امداد دی جا رہی ہے۔

فائر اینڈ ایمرجنسی سروس کے ایک افسر نے بتایا کہ محکمہ پہلے ہی ہرناگ میں آگ بجھانے کی مہم میں مصروف تھا جب کنٹرول روم کو مٹن میں آگ لگنے کی اطلاع ملی۔ انہوں نے کہا کہ ’’جب پہلی امدادی ٹیم موقع پر پہنچی تو عمارت کا پورا بالائی حصہ آگ کے شعلوں کی زد میں تھا۔ بچے سو رہے تھے اور دھویں کی وجہ سے دم گھٹنے کے باعث حرکت کرنے سے قاصر تھے۔ ہمارے عملے نے انہیں بچایا اور بحفاظت نیچے لے آئے۔”

انہوں نے مزید بتایا کہ واقعے کے وقت مدرسے میں 33 طلبہ موجود تھے، جن میں سے باقی تمام کو بحفاظت نکال لیا گیا۔ افسر نے امدادی کارروائی میں مقامی لوگوں اور پولیس کے کردار کی بھی ستائش کی۔

افسر نے تعلیمی اداروں میں آگ سے بچاؤ کے بہتر اقدامات کی اپیل کرتے ہوئے کہا کہ بچوں کو عمارت کے بالائی حصوں میں سونے دینا غیر محفوظ ہے۔ انہوں نے عوام سے یہ بھی گزارش کی کہ ہنگامی حالات کے دوران فائر بریگیڈ کی گاڑیوں کی بروقت آمد و رفت یقینی بنانے کے لیے رات کے وقت سڑکوں پر رکاوٹیں کھڑی نہ کریں۔

پولیس نے معاملہ درج کر لیا ہے اور آگ لگنے کی وجوہات معلوم کرنے کے لیے تحقیقات شروع کر دی گئی ہیں۔

یو این آئی۔ م ع۔ایف اے

سری نگر، جموں و کشمیر کے لیفٹیننٹ گورنر منوج سنہا نے آج نوجوانوں سے اپیل کی کہ وہ دوسروں کی نقل کرنے کے بجائے اپنی انفرادیت کو اپنائیں، کیونکہ دنیا کو ایسے نوجوانوں کی ضرورت ہے جو منفرد شخصیت کے حامل ہوں، اپنی مکمل صلاحیتوں کو پہچانیں اور آنے والی نسلوں کے لیے مشعلِ راہ بنیں۔

سری نگر میں قومی یوتھ فیسٹیول ’آروہن 2026‘ کے افتتاحی اجلاس سے خطاب کرتے ہوئے سنہا نے کہا کہ یہ پروگرام “اٹھو، چمکو اور فتح حاصل کرو” کے نئے وژن کی عکاسی کرتا ہے، جس کا مقصد 2047 تک ایک ترقی یافتہ بھارت کی تعمیر ہے۔

انہوں نے کہاکہ “یہ پروگرام نوجوانوں کے لیے ‘اٹھو، چمکو اور فتح حاصل کرو’ کا نیا وژن پیش کرتا ہے، جو ایک مکمل فلسفے کی نمائندگی کرتا ہے، مستقبل کی راہ روشن کرتا ہے، ایک وعدہ ہے اور 2047 تک ترقی یافتہ بھارت کی تعمیر کا ایک جرات مندانہ چیلنج بھی۔”

لیفٹیننٹ گورنر نے کہا کہ قومی یوتھ فیسٹیول اس بات کا بھی اعلان ہے کہ اب وقت نوجوانوں کا آ چکا ہے۔ انہوں نے کہاکہ “یوتھ فیسٹیول کے ‘ینگ لیڈرز ڈائیلاگ’ کے ذریعے ہم اس بنیاد اور فریم ورک کو تیار کر رہے ہیں جس پر ہندوستان کی شاندار وراثت کا اگلا باب قائم ہوگا۔”

انہوں نے کہا کہ تاریخ ان لوگوں نے نہیں بنائی جو غیر معمولی بننے کے لیے اجازت کا انتظار کرتے رہے۔ انہوں نے ’وکست جے کے ینگ لیڈرز ڈائیلاگ‘، ’ہیکاتھون‘ اور ’ثقافتی پروگرام‘ میں شریک نوجوانوں سے اپیل کی کہ وہ ایک ترقی یافتہ بھارت کی تعمیر کے لیے خود کو وقف کریں، جس پر آنے والی نسلیں فخر کریں گی۔

انہوں نے کہا کہ نوجوانوں کی آواز کے بغیر حکمرانی کامیاب نہیں ہو سکتی، اور جامع حکمرانی کا مطلب یہ ہے کہ نوجوانوں کو ہر اہم شعبے میں جاری کاموں میں حقیقی شراکت داری دی جائے۔

لیفٹیننٹ گورنر نے کہاکہ “ہر نوجوان لڑکے اور لڑکی میں بے پناہ صلاحیت موجود ہے۔ انہیں صرف مواقع اور خود پر یقین کی ضرورت ہے۔ میں چاہتا ہوں کہ ہندوستان کے نوجوان اپنی راہیں خود بنائیں، نہ کہ پرانی راہوں پر چلیں، کیونکہ جدت اور اختراع ہمیشہ نئی راہوں سے جنم لیتی ہے۔ ہندوستان کو ایسے نوجوانوں کی ضرورت ہے جو پہلے سے بنے ہوئے سانچوں کو توڑنے کا حوصلہ رکھتے ہوں۔”

یواین آئی۔ ظا