بہرائچ، اتر پردیش کے بہرائچ ضلع کے مٹیرا علاقے میں کمبائن مشین کی ٹکر سے کار سوار چار افراد ہلاک جبکہ دو دیگر شدید زخمی ہوگئے۔

پولیس ذرائع نے پیر کو بتایا کہ نانپارا-بہرائچ روڈ پر اتوار دیر رات یہ حادثہ ڈیہوا پیٹرول پمپ کے سامنے پیش آیا۔ نانپارا سے بہرائچ کی جانب جا رہی ٹاٹا پنچ کار میں چھ افراد سوار تھے۔ اسی دوران مٹیرا کی طرف سے بہرائچ جا رہی ایک نامعلوم کمبائن مشین نے کار کو زور دار ٹکر مار دی۔

ٹکر اتنی شدید تھی کہ کار کے پرخچے اڑ گئے اور اس میں سوار افراد شدید زخمی ہوگئے۔ اطلاع ملتے ہی تھانہ مٹیرا اور تھانہ نانپارا کی پولیس موقع پر پہنچی اور مقامی لوگوں کی مدد سے زخمیوں کو باہر نکال کر ضلع اسپتال بہرائچ پہنچایا، جہاں ڈاکٹروں نے جانچ کے بعد چار افراد کو مردہ قرار دے دیا جبکہ دو کی حالت نازک بنی ہوئی ہے۔

مہلوکین کی شناخت انل کمار (40) ولد سریش ساکن مکیریا تھانہ رام گاؤں بہرائچ، الطاف احمد (38) ولد عبدالقادر ساکن حمزاپورا تھانہ درگاہ شریف بہرائچ، انل کمار (42) ولد شیام نارائن ساکن میٹوکہا تھانہ رام گاؤں بہرائچ، اور مہندر پال (45) ولد رادھے شیام ساکن فتح پوروا محمدپور تھانہ رام گاؤں بہرائچ کے طور پر ہوئی ہے۔ جبکہ زخمیوں میں شیوم سریواستو (30) ولد وید پرکاش ساکن چترشالہ روڈ تھانہ کوتوالی نگر بہرائچ اور اشونی کمار (30) ولد رام کمل ساکن برہمنی پورہ تھانہ کوتوالی نگر بہرائچ شامل ہیں۔ دونوں کا ضلع اسپتال میں علاج جاری ہے۔

حادثے کی اطلاع ملتے ہی پولیس سپرنٹنڈنٹ بہرائچ وشوجیت سریواستو موقع پر پہنچے اور جائے حادثہ کا معائنہ کیا۔ انہوں نے بتایا کہ نانپارا کی طرف سے ایک ٹاٹا پنچ گاڑی آ رہی تھی، جس میں چھ لوگ سوار تھے۔ نانپارا کے قریب مٹیرا کی طرف سے بہرائچ جا رہی ایک نامعلوم کمبائن مشین نے کار کو زور دار ٹکر مار دی، جس کے نتیجے میں چار افراد کی موت ہوگئی۔

یواین آئی۔الف الف

نئی دہلی، ہندوستان نے سندھ طاس معاہدے کے سلسلے میں فیصلہ سنانے والی نام نہاد ثالثی عدالت (کورٹ آف آربیٹریشن) کو غیر قانونی قرار دیتے ہوئے اس کے فیصلے کو مسترد کر دیا ہے۔

ہندوستان نے اس سلسلے میں اپنے پہلے کے موقف کو دہراتے ہوئے کہا ہے کہ اس نے اس نام نہاد عدالت کو کبھی تسلیم نہیں کیا ہے، اس لیے اس کی طرف سے سنائے گئے فیصلے غیر قانونی ہیں۔ ہندوستان نے زور دے کر کہا ہے کہ سندھ طاس معاہدے کو معطل رکھنے کا اس کا فیصلہ اب بھی برقرار ہے۔ وزارت خارجہ کے ترجمان رندھیر جیسوال نے اس نام نہاد عدالت کے فیصلے سے متعلق میڈیا کے سوالات کے جواب میں ہفتہ کو کہا کہ غیر قانونی طور پر تشکیل دی گئی نام نہاد کورٹ آف آربیٹریشن نے 15 مئی کو ایک “فیصلہ” دیا ہے، جسے اس نے سندھ طاس معاہدے کی عمومی تشریح کے مسائل پر پہلے جاری کیے گئے فیصلے کے ضمیمے کے طور پر “زیادہ سے زیادہ آبی ذخائر” (میکسیمم ریزروائر) سے متعلق بتایا ہے۔

انہوں نے کہا، “ہندوستان اس نام نہاد فیصلے کو مکمل طور پر مسترد کرتا ہے، ٹھیک اسی طرح جیسے اس نے غیر قانونی طور پر تشکیل دی گئی ثالثی عدالت کے تمام سابقہ اعلانات کو مضبوطی سے مسترد کیا ہے۔ ہندوستان نے کبھی بھی اس نام نہاد عدالت کے قیام کو تسلیم نہیں کیا ہے۔ اس کے ذریعہ جاری کی گئی کوئی بھی کارروائی یا فیصلہ غیر قانونی ہے۔ ہندوستان کا سندھ طاس معاہدے کو معطل رکھنے کا فیصلہ اب بھی نافذ ہے۔” ہندوستان نے گزشتہ سال مئی میں پہلگام میں دہشت گردانہ حملے کے بعد سخت قدم اٹھاتے ہوئے اس معاہدے کو ‘معطل’ کر دیا تھا۔ ہندوستان نے واضح طور پر کہا ہے کہ سندھ طاس معاہدہ اس وقت تک معطل رہے گا جب تک کہ پاکستان سرحد پار دہشت گردی کو مکمل اور معتبر طریقے سے ختم نہیں کر دیتا۔ ہندوستان کا کہنا ہے کہ دہشت گردی اور بات چیت ساتھ ساتھ نہیں چل سکتے۔

یواین آئی۔ایف اے

نئی دہلی، فوجی سربراہ جنرل اوپیندر دیویدی نے پاکستان کو ایک بار پھر سخت پیغام دیتے ہوئے کہا ہے کہ اسے طے کرنا ہوگا کہ وہ عالمی نقشہ پر اپنی پہچان برقرار رکھنا چاہتا ہے یا دہشت گردوں کوپناہ دینے اور ہندوستان کے خلاف عداوت پرمبنی حرکتیں جاری رکھ کر خود کو تاریخ سے مٹانے کا خطرہ مول لینا چاہتا ہے۔

ہفتہ کو یہاں مانک شا سینٹر میں منعقدہ ایک مکالماتی سیشن میں یہ پوچھے جانے پر کہ اگر آپریشن سندور جیسی صورتحال دوبارہ پیدا ہوتی ہے تو ہندوستانی فوج کیسا جواب دے گی، تو جنرل دیویدی نے دو ٹوک جواب دیتے ہوئے کہا، “اگر آپ نے پہلے میری باتیں سنی ہیں، تو میں نے کہا ہے کہ پاکستان اگر دہشت گردوں کو پناہ دیتا رہا اور ہندوستان کے خلاف سرگرمیاں جاری رکھیں، تو اسے طے کرنا ہوگا کہ وہ جغرافیائی نقشے کا حصہ رہنا چاہتا ہے یا تاریخ کا۔”

آرمی چیف کے اس تبصرے کو ہندوستان کی اعلیٰ فوجی قیادت کی جانب سے ایک سخت انتباہ کے طور پر دیکھا جا رہا ہے جو یہ اشارہ دیتا ہے کہ سرحد پار دہشت گردی کے تعلق سے ہندوستان کا صبر محدود ہے اور مستقبل میں کسی بھی اشتعال انگیز کارروائی کا فیصلہ کن جواب دیا جائے گا۔

جنرل دیویدی نے گزشتہ سال نومبر میں ‘چانکیہ ڈیفنس ڈائیلاگ’ سے خطاب کرتے ہوئے کہا تھا، “آپریشن سندور محض ایک ٹریلر تھا، جو 88 گھنٹے میں ختم ہوا۔ ہم مستقبل میں کسی بھی صورتحال کے لیے تیار ہیں۔ اگر پاکستان موقع دے گا، تو ہم اسے یہ سکھائیں گے کہ پڑوسی ملک کے ساتھ ذمہ داری سے کیسا برتاؤ کرنا چاہیے۔”

آپریشن سندور کے وقت ڈائریکٹر جنرل ملٹری آپریشنز (ڈی جی ایم او) رہے لیفٹیننٹ جنرل راجیو گھئی نے اس آپریشن کی پہلی سالگرہ پر کہا تھا کہ ہندوستان کی فوجی کارروائی کی وجہ سے پاکستان کو لائن آف کنٹرول (ایل او سی) پر بھاری نقصان اٹھانا پڑا جس کے بعد اسے ہندوستان کے سامنے جنگ بندی کی التجا کرنی پڑی۔

یواین آئی ۔ایف اے